Read Pashto (Nangahari) — د پښتو مقدس کتاب لاويان 20 Bible Online

لاويان 20 - Pashto (Nangahari) — د پښتو مقدس کتاب bible

لاويان 20

¹څښتن حضرت موسیٰ ته وفرمايل:

²”اسرائيليانو ته ووايه: که ستاسو څخه يو څوک يا کوم بېګانه نفر چې په اسرائيلو کې اوسيږي د خپلو ماشومانو څخه کوم ماشوم د مولک بت ته ورکړي، هغه بايد ووژل شي. د قوم خلک دې هغه سنګسار کړي.

³زه به د هغه نفر په ضد شم او د خپل قوم څخه به يې وشړم، ځکه چې مولک ته د خپلو ماشومانو په ورکولو سره يې زما مقدس ځای ناپاک کړی او زما مقدس نوم يې رسوا کړی دی.

⁴کله چې هغه نفر داسې کار وکړي او قوم ورباندې خپلې سترګې پټې کړي او هغه نفر ونه وژني،

⁵نو زه به په خپله د هغه نفر، د هغه د ټولې کورنۍ او هغو ټولو په ضد شم چې د هغه سره يوځای زما سره بې وفايي کوي او د مولک عبادت کوي. زه به هغوی د خپل قوم څخه وشړم.

⁶که چېرې تاسو هغو خلکو ته ورشئ چې دا دعوه کوي چې دوی کولی شي د مړو سره خبرې وکړي، نو زه به ستاسو په ضد شم او تاسې به د خپل قوم څخه وشړم.

⁷خپل ځانونه وقف کړئ او مقدس اوسئ، ځکه چې زه ستاسو څښتن خدای يم.

⁸زما د فرمانونو څخه پيروي وکړئ. زه څښتن يم چې تاسو مقدس کوم.

⁹که چېرې يو څوک خپل پلار يا خپلې مور ته ښکنځلې وکړي نو هغه بايد ووژل شي. خون به يې په خپله غاړه وي.

¹⁰که چېرې يو سړی د بل سړي د ښځې سره زنا وکړي، هغه سړی او هغه ښځه دواړه بايد ووژل شي.

¹¹که چېرې يو سړی د خپل پلار له ښځو څخه د يوې ښځې سره زنا وکړي هغه خپل پلار سپکوي نو هغه سړی او ښځه دواړه بايد ووژل شي. خون به يې په خپله غاړه وي.

¹²که چېرې يو سړی د خپلې انږور سره زنا وکړي، هغوی دواړه بايد ووژل شي. کوم کار چې هغوی کړی دی هغه ډېر بد کار دی او خون به يې په خپله غاړه وي.

¹³که چېرې يو سړی د يو بل سړي سره بد کار وکړي، هغوی د کرکې وړ کار کړی دی او دواړه بايد ووژل شي. خون به يې په خپله غاړه وي.

¹⁴که چېرې يو سړی د يوې انجلۍ او د هغې د مور دواړو سره واده وکړي نو درې واړه بايد د خپل ډېر بد کار له کبله وسوزول شي چې مړه شي، ترڅو ستاسو په منځ کې بدکاري نه وي.

¹⁵که چېرې يو سړی د يو حيوان سره جنسي اړيکې ولري، هغه بايد د حيوان سره يوځای ووژل شي.

¹⁶که چېرې يوه ښځه د يو حيوان سره د جنسي اړيکو د لرلو هڅه وکړي، هغه بايد د حيوان سره يوځای ووژل شي. خون به يې په خپله غاړه وي.

¹⁷که چېرې يو سړی د خپلې سکه يا ناسکه خور سره واده وکړي، دا يوه رسوايي ده. هغوی بايد په عام محضر کې د قوم څخه وشړل شي. هغه د خپلې خور سپکاوی کړی دی او مسئوليت به يې په خپله غاړه وي.

¹⁸که چېرې يو سړی د يوې ښځې سره د مياشتينۍ ناروغۍ په دوران کې يوځای شي، هغوی دواړه دې د قوم څخه وشړل شي، ځکه چې هغوی د پاکوالي په اړه مقررات مات کړي دي.

¹⁹د خپلې مور د خور يا د خپل پلار د خور سره زنا مه کوئ، ځکه چې دا کار به د يو نژدې خپلوان سپکاوی وي، د دغه ناوړه کار مسئوليت به ستاسو دواړو په غاړه وي.

²⁰که چېرې يو سړی د خپل تره د ښځې سره زنا کوي هغه خپل تره سپکوي. مسئوليت به د هغوی په غاړه وي، هغوی به بې اولاده پاتې شي.

²¹که چېرې يو سړی د خپلې وريندار سره واده وکړي، هغوی به بې اولاده وي. هغه يو ناپاکه کار کړی او د خپل ورور سپکاوی يې کړی دی.“

²²څښتن وفرمايل: ”زما د ټولو فرمانونو او قوانينو څخه پيروي وکړئ، ترڅو تاسو د کنعان د ځمکې څخه چې هلته مو راولم ونه شړم.

²³د هغو خلکو د رواجونو څخه پيروي مه کوئ چې هلته اوسيږي او زه يې د دې په خاطر شړم ترڅو تاسو وکولی شئ هغې خاورې ته ورننوزئ. زه د هغوی څخه د هغوی د ټولو بدو عملونو له کبله کرکه کوم.

²⁴مګر ستاسو سره مې د دې غني او حاصلخېزې ځمکې وعده کړې ده ترڅو هغه ستاسو ملکيت شي او هغه به تاسو ته درکوم. زه ستاسو څښتن خدای يم او تاسو مې د نورو قومونو څخه جدا کړي يئ.

²⁵له دې کبله تاسو بايد د پاکو او ناپاکو حيواناتو او مرغانو ترمنځ ښکاره فرق وکړئ. هغه حيوانات يا مرغان چې هغه مې ناپاک اعلان کړي دي مه خورئ. د هغو په خوړلو به ناپاک شئ.

²⁶تاسو به مقدس شئ او يوازې زما به شئ، ځکه چې زه څښتن مقدس يم. ما تاسو له نورو قومونو څخه جدا کړي يئ ترڅو يوازې زما شئ.

²⁷هر سړی يا هره ښځه چې دا دعوه کوي چې د مړو سره مشورې کوي، بايد ووژل شي. تاسو بايد هغه سنګسار کړئ، خون به يې په خپله غاړه وي.“