Read Pashto (Nangahari) — د پښتو مقدس کتاب لاويان 21 Bible Online

لاويان 21 - Pashto (Nangahari) — د پښتو مقدس کتاب bible

لاويان 21

¹څښتن حضرت موسیٰ ته وفرمايل: ”د کاهنانو يعنې د هارون د زامنو سره خبرې وکړه او ورته ووايه: هيڅ يو کاهن بايد د خپلوانو د مړي د جنازې په مراسمو کې په ګډون کولو سره خپل ځان ناپاک نه کړي،

²پرته له يو نژدې خپلوان څخه لکه د هغه مور يا پلار، د هغه زوی يا لور، د هغه سکه ورور،

³يا يوه پېغله خور چې واده شوې نه وي او مېړه نه لري چې هغه وساتي.

⁴هغه به خپل ځان د هغه چا په مرګ باندې نه ناپاکه کوي کوم چې د واده په وسيله د هغه خپلوان شوی وي.

⁵هيڅ کاهن به په دې خاطر چې هغه داسې ښکاره شي چې د چا په مرګ باندې غمجن دی، نه به د خپل سر کومه برخه خرايي، نه به خپله ږيره لنډوي او نه به خپل بدن غوڅوي.

⁶هغه بايد مقدس وي او زما نوم سپک نه کړي، ځکه چې هغه ماته په اور باندې د خواړو نذرانې تياروي او بايد مقدس وي.

⁷يو کاهن بايد د يوې داسې ښځې سره واده ونه کړي چې هغه فاحشه وه يا پېغله نه وي او يا د خپل مېړه له خوا ورته طلاق ورکړای شوی وي، ځکه چې هغه خپل خدای ته مقدس دی.

⁸خلک بايد کاهن مقدس وګڼي، ځکه چې هغه ماته د خواړو نذرانې وړاندې کوي. زه څښتن يم، زه مقدس يم او خپل خلک مقدس کوم.

⁹که چېرې د يو کاهن لور فاحشه شي، نو هغه خپل پلار رسوا کوي او بايد وسوزول شي چې مړه شي.

¹⁰مشر کاهن چې په سر باندې يې د مسح کولو تېل اچول شوي دي او د دې دپاره وقف شوی دی چې د کاهنتوب لباس واغوندي، نو بايد خپل ويښتان ګډوډ پرېنږدي او خپل کالي ونه شلوي چې داسې ښکاره شي چې هغه د چا په مرګ باندې غمجن دی.

¹¹۱۱‏-۱۲ هغه ماته وقف شوی دی. خپل ځان بايد ناپاک نه کړي او نه دې زما د مقدسې خېمې څخه په وتلو او هغه کور ته په ننوتلو سره چې مړی په کې وي دا خېمه ناپاکه کړي که څه هم هغه د ده د خپل پلار مړی وي يا د مور.

¹³هغه بايد د داسې ښځې سره واده وکړي چې پېغله وي.

¹⁴هغه بايد د يوې کونډې يا طلاق شوې يا د داسې ښځې سره واده ونه کړي چې هغه فاحشه وه، مګر يوازې د خپلې قبيلې څخه د يوې پېغلې سره دې واده وکړي.

¹⁵که نه، نو د هغه اولادونه چې بايد مقدس وي، هغوی به ناپاک وي. زه څښتن يم او ما هغه د مشر کاهن په توګه انتخاب کړی دی.“

¹⁶څښتن حضرت موسیٰ ته وفرمايل:

¹⁷”هارون ته ووايه چې ستا د اولادې څخه هيڅ يو سړی چې جسماني عيبونه ولري نشي کولی چې ماته د خواړو نذرانه وړاندې کړي. دا خبره به تل ترتله عملي کيږي.

¹⁸هيڅ يو سړی چې جسماني عيبونه په کې وي نشي کولی چې هغه نذرانه وړاندې کړي لکه څوک چې ړوند وي، ګوډ وي، بدشکله يا بې ډوله وي،

¹⁹د چا لاس يا پښه چې معيوبه وي،

²⁰څوک په ملا باندې کړوپ وي يا ټيټ قدی وي، څوک چې د سترګې يا د پوستکي په ناروغۍ اخته وي او څوک چې خصي وي.

²¹د هارون کاهن د اولادې څخه هيڅ يو سړی چې کوم جسماني عيبونه په کې وي نشي کولی چې ماته د خواړو يوه داسې نذرانه وړاندې کړي چې په اور باندې تياريږي.

²²داسې سړی کولی شي چې هغه خواړه وخوري چې ماته وړاندې شوي وي يعنې د خواړو مقدسه نذرانه او د خواړو ډېره مقدسه نذرانه.

²³مګر په دې خاطر چې په هغه کې جسماني عيب دی، هغه دې مقدسې پردې او د قربانۍ ځای ته نژدې رانشي او زما مقدس ځای او هرڅه چې په کې دي هغه دې نه ناپاکه کوي، ځکه چې زه څښتن يم او کاهنان مقدس کوم.“

²⁴نو حضرت موسیٰ دا هرڅه حضرت هارون او د هغه زامنو او ټولو اسرائيليانو ته وويل.