Read Pashto (Nangahari) — د پښتو مقدس کتاب لاويان 22 Bible Online

لاويان 22 - Pashto (Nangahari) — د پښتو مقدس کتاب bible

لاويان 22

¹څښتن حضرت موسیٰ ته وفرمايل:

²”هارون او د هغه زامنو ته ووايه چې د هغو پاکو نذرانو احترام وکړي چې اسرائيليان يې ماته وقف کوي، ترڅو هغوی زما مقدس نوم سپک نه کړي. زه څښتن يم.

³که چېرې ستاسو د اولادې څخه کوم يو د ناپاکۍ په حال کې هغو مقدسو نذرانو ته ورنژدې شي چې د اسرائيلو قوم ماته وقف کړې دي، هغه بيا هيڅکله د قربانۍ په ځای کې خدمت نشي کولی. دا خبره به تل ترتله عملي کيږي. زه څښتن يم.

⁴که چېرې د هارون د اولادې څخه کوم يو د پوستکي په ساري ناروغۍ اخته وي يا د بدن څخه يې زوه راوزي، هغه تر هغه وخته پورې دا پاکې نذرانې نشي خوړلی ترڅو پورې چې پاک نشي. هر کاهن چې داسې کوم شي ته لاس وروړي چې د مړي سره د لګېدلو په وسيله ناپاک شوی وي يا که چېرې د کاهن څخه مني ووزي،

⁵يا که چېرې هغه په ناپاک حيوان يا ناپاک نفر باندې لاس وهلی وي هغه ناپاک کيږي.

⁶هر کاهن چې دغو شيانو ته لاس وروړي هغه به ناپاک شي، هغه تر ماښامه پورې ناپاک پاتې کيږي. بياهم هغه پاکې نذرانې نشي خوړلی ترڅو پورې چې غسل ونه کړي.

⁷کله چې لمر پرېوزي، هغه به پاک شي او د هغې څخه وروسته هغه کولی شي چې پاکې نذرانې وخوري ځکه چې دا د هغه خواړه دي.

⁸هغه دې د داسې حيوان غوښه ونه خوري چې په خپل مرګ مړ شوی وي يا د وحشي حيواناتو په وسيله وژل شوی وي، په دې باندې به هغه ناپاک شي. زه څښتن يم.

⁹ټول کاهنان دې زما د مقرراتو څخه چې هغوی ته مې ورکړي دي پيروي وکړي. که نه، نو هغوی به ګناهکاران او مړه شي، ځکه چې هغوی مقدسو مقرراتو ته په سپکه سترګه کتلي دي. زه څښتن يم چې هغوی مقدس کوم.

¹⁰څوک چې د کاهن د کورنۍ غړی نه وي، هغه پاکې نذرانې نشي خوړلی. د کاهن مېلمه يا مزدور هم هغه نشي خوړلی.

¹¹خو که چېرې يو کاهن په خپلو پيسو باندې يو غلام اخيستی وي يا که چېرې يو غلام د هغه په کورنۍ کې زېږېدلی وي، هغه غلام کولی شي چې د هغه خواړه وخوري.

¹²که چېرې د يو کاهن لور د يو داسې سړي سره واده وکړي چې هغه کاهن نه وي، هغه نشي کولی چې پاکې نذرانې وخوري.

¹³مګر که چېرې د يو کاهن لور کونډه يا طلاقه شوې وي او اولادونه ونلري او بېرته راشي او د خپل پلار په کور کې اوسيږي، هغه کولی شي چې هغه خواړه وخوري چې د هغې پلار يې د کاهن په توګه ترلاسه کوي. په هر حال د کاهن د کورنۍ د غړو څخه پرته هيڅوک نشي کولی چې هغه وخوري.

¹⁴که چېرې داسې خلک چې د کاهن د کورنۍ غړي نه وي په غير ارادي توګه پاکې نذرانې وخوري، هغوی بايد کاهن ته د اضافه شلو فيصدو سره پوره تاوان ورکړي.

¹⁵۱۵‏-۱۶ کاهنان بايد نورو خلکو ته اجازه ورنه کړي چې د دې پاکو نذرانو په خوړلو سره چې د اسرائيلو قوم يې زما دپاره وقف کوي د هغو سپکاوی وکړي، ځکه چې په دې کار سره به هغوی ګناهکار وګڼل شي او سزا به ومومي. زه څښتن يم او هغه نذرانې مقدسې کوم.“

¹⁷څښتن حضرت موسیٰ ته وفرمايل:

¹⁸”هارون او د هغه د زامنو او ټولو اسرائيليانو سره خبرې وکړه او ورته ووايه: که چېرې له تاسو څخه يو نفر که هغه يو اسرائيلی يا يو داسې بېګانه نفر وي چې په اسرائيلو کې اوسيږي، ماته د سوزېدونکې نذرانې دپاره يو سوغات وړاندې کوي، که هغه د نذر د ورکولو په توګه وي يا رضاکارانه نذرانه وي،

¹⁹تاسو بايد د پادې يا رمې څخه يو نر حيوان وړاندې کړئ چې کوم عيب په کې نه وي د دې دپاره چې هغه ستاسو په خاطر قبول شي.

²⁰که چېرې تاسو يو داسې حيوان وړاندې کړئ چې کوم عيب په کې وي، زه څښتن به هغه ستاسو په خاطر قبول نه کړم.

²¹کله چې يو نفر څښتن ته د رمې او يا پادې څخه د سلامتۍ نذرانه راوړي چې يو نذر ورکړي يا د رضاکارانه نذرانې په توګه وي، د دې دپاره چې د قبلېدلو وړ وي نو په هغې کې بايد هيڅ عيب نه وي.

²²څښتن ته داسې حيوان مه وړاندې کوئ چې ړوند، ګوډ يا معيوب وي، زخم ولري او يا د پوستکي په دوامداره ناروغۍ اخته وي. هغه په قربانګاه باندې د يوې داسې نذرانې په توګه مه ږدئ چې په اور باندې څښتن ته تياريږي.

²³که څه هم تاسو کولی شئ چې د رضاکارانه نذرانې په توګه يو حيوان چې بې ډوله يا کوچنی وي وړاندې کړئ، مګر هغه به د نذر په توګه قبول نشي.

²⁴څښتن ته هيڅ داسې حيوان مه وړاندې کوئ چې خصيه يې ټکول شوې، پرېکړل شوې، زخمي شوې يا ويستل شوې وي. تاسو بايد په خپله خاوره کې داسې کار ونه کړئ.

²⁵تاسو بايد له بېګانه خلکو څخه داسې حيوانات وانخلئ چې د خواړو د نذرانو په توګه يې وړاندې کړئ. هغه به ستاسو په خاطر قبول نشي ځکه چې هغه بې ډوله دي يا عيبونه په کې دي.“

²⁶څښتن حضرت موسیٰ ته وفرمايل:

²⁷”کله چې يو خوسکی، يو وری يا يوه وزه پيدا شي، که هغه نر وي يا ښځه، د خپلې مور سره دې اوه ورځې پاتې شي. له اتمې ورځې څخه به هغه د يوې داسې نذرانې په توګه د منلو وړ وي چې څښتن ته په اور باندې تياريږي.

²⁸يوه غوا او د هغې خوسکی يا يوه مېږه او د هغې وری يا يوه وزه او د هغې بچی په يوه ورځ مه حلالوئ.

²⁹کله چې تاسو څښتن ته د شکرانې يوه نذرانه قرباني کوئ نو د مقرراتو څخه پيروي وکړئ ترڅو هغه ستاسو په خاطر قبوله شي.

³⁰هغه بايد په هماغه ورځ وخوړل شي، له هغې څخه تر سهاره پورې هيڅ شی مه پرېږدئ. زه څښتن يم.

³¹زما د حکمونو څخه پيروي وکړئ. زه څښتن يم.

³²زما مقدس نوم مه سپکوئ. د اسرائيلو ټول قوم بايد د دې خبرې اقرار وکړي چې زه مقدس يم. زه څښتن يم چې تاسو مقدس کوم

³³او تاسو مې د دې دپاره له مصر څخه راوويستلئ چې ستاسو خدای اوسم. زه څښتن يم.“