Read Pashto (Nangahari) — د پښتو مقدس کتاب لاويان 23 Bible Online

لاويان 23 - Pashto (Nangahari) — د پښتو مقدس کتاب bible

لاويان 23

²”د اسرائيلو خلکو ته ووايه چې ما ستاسو دپاره څو مذهبي اخترونه ټاکلي دي چې سره راغونډ شئ او زما عبادت وکړئ.

³تاسو د خپل کار دپاره شپږ ورځې لرئ، مګر اوومه ورځ چې د سبت ورځ ده، د آرام کولو دپاره ده. په هغه ورځ کار مه کوئ، مګر د عبادت دپاره راغونډ شئ. دا مهمه نه ده چې چېرته اوسېږئ، سبت د څښتن ورځ ده.

⁴دغه اخترونه بايد په ټاکل شويو وختونو کې اعلان کړئ.

⁵څښتن ته د احترام کولو دپاره د فسحې د اختر لمانځل هر کال د اولې مياشتې په څوارلسمه ورځ د لمرپرېواته په وخت کې پيل کيږي.

⁶په پنځلسمه ورځ د فطيرې ډوډۍ اختر پيل کيږي او اوه ورځې دوام کوي. تاسو بايد په دې موده کې فطيره ډوډۍ وخورئ.

⁷د دغو ورځو څخه په اوله ورځ د عبادت دپاره سره راغونډ شئ او خپل ورځينی کار هيڅ مه کوئ.

⁸اوه ورځې هغه نذرانې وړاندې کړئ چې څښتن ته په اور باندې تياريږي او په اوومه ورځ به بيا د عبادت دپاره سره راغونډ شئ، مګر هيڅ خپل ورځينی کار مه کوئ.“

⁹څښتن حضرت موسیٰ ته وفرمايل:

¹⁰”د اسرائيليانو سره خبرې وکړه او ورته ووايه: کله چې تاسو هغې خاورې ته چې زه يې درکوم ورننوزئ او فصل يې ورېبئ، نو کاهن ته اولنۍ ګېډۍ ورکړئ.

¹¹هغه دې دا ګېډۍ د څښتن په حضور کې پورته کړي، ترڅو هغه ستاسو په خاطر قبوله شي. کاهن دې هغه د سبت له ورځې څخه وروسته په بله ورځ پورته کړي.

¹²په هماغه ورځ يوه سوزېدونکې نذرانه هم څښتن ته قرباني کړئ يعنې يو يو کلن وری چې هيڅ عيب په کې نه وي.

¹³له هغې سره به تاسو د دوو کيلوګرامو ښو اوړو د غلې دانې يوه نذرانه چې د زيتونو تېل ورسره ګډ وي وړاندې کړئ. دا يوه داسې نذرانه ده چې په اور باندې څښتن ته تياريږي او بوی يې په هغه باندې ښه لګيږي. همدارنګه له هغې سره به تاسو د څښلو د نذرانې په توګه يو ليتر د انګورو د شربت نذرانه هم وړاندې کړئ.

¹⁴ترڅو پورې چې تاسو خدای ته دا نذرانه راوړې نه وي نو نوې غلې دانې هيڅ مه خورئ. که هغه خامې وي، نينې شوې وي، يا ډوډۍ ورڅخه پخه شوې وي هغه دې ونه خوړل شي. په دې قانون باندې دې د تل دپاره ستاسو د ټولو نسلونو له خوا عمل وشي.

¹⁵د سبت د ورځې په سبا چې تاسو په کې څښتن ته د وړاندې کولو دپاره خپلې ګېډۍ راوړئ، پوره اوه هفتې وشمېرئ.

¹⁶په پنځوسمه ورځ، يعنې هغه ورځ چې د اووم سبت څخه وروسته وي، د نوي حاصل څخه څښتن ته د غلې دانې بله نذرانه وړاندې کړئ.

¹⁷هره کورنۍ دې دوه ډوډۍ راوړي چې ماته د وقف کولو دپاره پورته ونيول شي. هره يوه دې د دوو کيلوګرامو ښو اوړو څخه پخه شوې وي او خميره هم په کې وي. دا به څښتن ته د اولنيو رېبل شويو غلو دانو د نذرانې په توګه وړاندې شي.

¹⁸قوم دې د ډوډۍ سره اوه يو کلن وري، يو غويی او دوه پسونه وړاندې کړي، له دغو څخه دې په يو کې هم کوم عيب نه وي. دا به د غلې دانې او د څښلو د نذرانې سره څښتن ته يوه سوزېدونکې نذرانه وي، يوه داسې نذرانه چې بوی يې په څښتن باندې ښه لګيږي.

¹⁹بيا د ګناه د نذرانې دپاره يو وز او د سلامتۍ د نذرانې دپاره دوه يو کلن وري قرباني کړئ.

²⁰کاهن دې هغه ډوډۍ د دوه وريو سره څښتن ته د وقف کېدلو په خاطر پورته ونيسي. دا څښتن ته يوه مقدسه نذرانه ده چې بايد کاهنانو ته ورکړل شي.

²¹تاسو بايد په هماغه ورځ د عبادت دپاره سره راغونډ شئ او هيڅ ورځينی کار ونه کړئ. هرچېرته چې ستاسو اولاده اوسيږي دا مقررات دې تل ترتله مراعت کړي.

²²کله چې تاسو د خپلو ځمکو حاصلات لو کوئ، نو هغه د پټيو تر غاړو پورې مه لو کوئ او هغه وږي چې د لو څخه پاتې شوي وي هغه مه راټولوئ. هغه غريبانو او بېګانه خلکو ته پرېږدئ. زه ستاسو څښتن خدای يم.“

²³څښتن حضرت موسیٰ ته وفرمايل:

²⁴”د اسرائيلو قوم ته ووايه چې د هر کال د اوومې مياشتې اوله ورځ د آرام کولو خاصه ورځ ده او د اسرائيلو ټول خلک دې د سرني د آواز په اورېدلو سره د عبادت دپاره سره راغونډ شي.

²⁵په هماغه ورځ خپل عادي کار مه کوئ، مګر څښتن ته يوه داسې نذرانه وړاندې کړئ چې په اور باندې تياريږي.“

²⁶څښتن حضرت موسیٰ ته وفرمايل:

²⁷”هر کال د اوومې مياشتې لسمه ورځ د کفارې ورځ ده. د عبادت دپاره سره راغونډ شئ او روژه ونيسئ. يوه داسې نذرانه وړاندې کړئ چې څښتن ته په اور باندې تياريږي.

²⁸په هغه ورځ هيڅ کار مه کوئ، ځکه چې دا د کفارې ورځ ده چې ستاسو دپاره ستاسو د څښتن خدای په حضور کې کفاره ادا کيږي.

²⁹هرڅوک چې په هغه ورځ روژه ونه نيسي بايد د خدای له قوم څخه وشړل شي.

³⁰که چېرې څوک په هغه ورځ کوم کار وکړي، زه به په خپله هغه ووژنم.

³¹دا قانون ستاسو په ټوله اولاده باندې هرچېرته چې اوسيږي عملي کيږي.

³²د مياشتې په نهمه ورځ د لمرپرېواته څخه نيولې د مياشتې د لسمې ورځې د لمرپرېواته پورې دا ورځ د آرام کولو د يوې خاصې ورځې په توګه ولمانځئ او په دې دوران کې بايد تاسو روژه ونيسئ.“

³³څښتن حضرت موسیٰ ته وفرمايل:

³⁴”اسرائيليانو ته ووايه چې د اوومې مياشتې په پنځلسمه ورځ څښتن ته د احترام کولو دپاره د جونګړو اختر پيل کيږي. هغه اوه ورځې دوام کوي.

³⁵په دغو ورځو کې اوله ورځ د عبادت دپاره سره راغونډ شئ او خپل ورځينی کار مه کوئ.

³⁶اوه ورځې څښتن ته داسې نذرانې وړاندې کړئ چې په اور باندې تياريږي او په اتمه ورځ بيا د عبادت دپاره سره راغونډ شئ او د پخوا په شان نذرانه وړاندې کړئ. دا د عبادت ورځ ده او تاسو به خپل عادي کار نه کوئ.

³⁷دا هغه اخترونه دي چې د څښتن له خوا ټاکل شوي دي. هغه داسې ولمانځئ چې سره راغونډ شئ او هغه ډول ډول نذرانې چې په اور باندې څښتن ته تياريږي يعنې سوزېدونکې نذرانې، د غلو دانو نذرانې، قربانۍ ګانې او د څښلو نذرانې، دا هره يوه دې په خپله مناسبه ورځ هغه ته وړاندې شي.

³⁸دا اخترونه د سبت د ورځو څخه جدا دي او دا نذرانې د عادي سوغاتونو څخه جدا دي، يعنې ستاسو د هغو نذرانو څخه چې د نذرونو دپاره دي او د هغو رضاکارانه نذرانو څخه چې څښتن ته يې ورکوئ.

³⁹نو کله چې تاسو خپل پټي ورېبل اوه ورځې دا اختر چې د اوومې مياشتې په پنځلسمه ورځ پيل کيږي ولمانځئ. اوله ورځ به د آرام کولو ورځ وي او اتمه ورځ به هم د آرام کولو ورځ وي.

⁴⁰په اوله ورځ تاسو د خپلو ونو څخه ډېره ښه مېوه، د خرما د ونې څانګې، پاڼې لرونکې څانګې او د سيند د غاړو څخه ولې واخلئ او اوه ورځې د خپل څښتن خدای په حضور کې خوشالي وکړئ.

⁴¹دا هر کال اوه ورځې څښتن ته د احترام دپاره د يو اختر په توګه ولمانځئ. ستاسو راتلونکې اولاده دې تل ترتله د دې قانون څخه پيروي وکړي. هغه په اوومه مياشت ولمانځئ.

⁴²د اسرائيلو ټول خلک بايد اوه ورځې په جونګړو کې واوسيږي،

⁴³ترڅو ستاسو اولاده په دې پوه شي کله چې ما د اسرائيلو قوم له مصر څخه راوويست، هغوی مې دې ته مجبور کړل چې په ساده جونګړو کې واوسيږي. زه ستاسو څښتن خدای يم.“

⁴⁴نو په دې ډول حضرت موسیٰ د اسرائيلو خلکو ته لارښودنه وکړه چې د څښتن اخترونه ولمانځي.