Read Pashto (Nangahari) — د پښتو مقدس کتاب لاويان 24 Bible Online

لاويان 24 - Pashto (Nangahari) — د پښتو مقدس کتاب bible

لاويان 24

¹څښتن حضرت موسیٰ ته وفرمايل:

²”په اسرائيليانو باندې امر وکړه چې د هغو څراغونو دپاره چې په مقدسه خېمه کې دي د زيتونو سوچه تېل راوړئ، ترڅو هغه په منظمه توګه بل وساتل شي.

³هارون دې هر ماښام هغه بل کړي او هغه دې تر سهاره پورې د څښتن په حضور کې د پردې څخه بيرون د لوظ د صندوق په مخ کې چې په ډېر مقدس ځای کې دی بل وساتي. دا حکم دې د تل دپاره مراعت شي.

⁴هارون بايد په هغو څراغونو باندې پام وکړي چې د سوچه سرو زرو په څراغدان باندې دي او وګوري چې هغه په منظمه توګه د څښتن په حضور کې بل وي.

⁵څلورويشت کيلوګرامه ښه اوړه واخله او دولس ډوډۍ ورڅخه پخې کړه.

⁶دا ډوډۍ په دوه قطارونو کې چې په هر قطار کې شپږ ډوډۍ وي، په هغه مېز باندې کېږده چې په سوچه سرو زرو پوښل شوی دی او د څښتن په حضور کې دی.

⁷په هر قطار باندې لږه سوچه خوشبويي واچوه چې دا خوشبويي به څښتن خدای ته په اور باندې د تيارېدونکې نذرانې د يوې نښې په شان وي چې د ډوډۍ په ځای وړاندې کيږي.

⁸دا ډوډۍ دې په هر سبت کې د څښتن په حضور کې کېښودل شي. دا د همېش دپاره د اسرائيلو وظيفه ده.

⁹دا ډوډۍ د هارون او د هغه د اولادې ده. هغوی دې هغه په يو مقدس ځای کې وخوري، ځکه چې دا د هغو نذرانو يوه ډېره مقدسه برخه ده چې څښتن ته په اور باندې تياريږي.“

¹⁰۱۰‏-۱۱ داسې وشو چې يو سړی ؤ چې پلار يې مصری او مور يې اسرائيلۍ وه چې شلوميت نومېدله، هغه د دبري لور وه چې د دان د قبيلې څخه ؤ. دغه سړي په کمپ کې د يو اسرائيلي سره شخړه وکړه. د شخړې په وخت کې هغه څښتن ته ښکنځلې وکړې، نو هغوی دا سړی حضرت موسیٰ ته راوست.

¹²هغه يې تر څارنې لاندې وساته او څښتن ته يې انتظار کاوه چې دوی ته ووايي چې د هغه سره څه وکړي.

¹³بيا څښتن حضرت موسیٰ ته وفرمايل:

¹⁴”کفر ويونکی د کمپ څخه بيرون وباسه. هرچا چې د هغه ښکنځلې چې څښتن ته يې کړې دي اورېدلې وي، خپل لاسونه دې د هغه په سر باندې کېږدي او ټول قوم دې هغه سنګسار کړي.

¹⁵اسرائيليانو ته ووايه: که چېرې څوک خدای ته ښکنځلې وکړي، نو هغه به د خپلو بدو سزا وويني.

¹⁶هرڅوک چې د څښتن په نوم کفر ووايي بايد ووژل شي. ټول قوم بايد هغه سنګسار کړي. که هغه يو بېګانه نفر وي يا اسرائيلی وي، کله چې هغه د خدای په نوم کفر ووايي بايد ووژل شي.

¹⁷هرڅوک چې قتل وکړي بايد ووژل شي

¹⁸او هرڅوک چې د بل چا حيوان ووژني بايد تاوان يې ورکړي. قانون دا دی چې د ژوند په بدل کې ژوند واخيستل شي.

¹⁹که چېرې يو څوک يو بل نفر ټپي کړي، هرڅه چې هغه کړي وي هماغه شان عمل به ورسره کيږي.

²⁰که چېرې تاسو د چا يو هډوکی مات کړئ، ستاسو يو هډوکی به مات شي. که چېرې تاسو د چا يوه سترګه وباسئ، ستاسو يوه سترګه به وويستل شي. که چېرې تاسو د چا يو غاښ مات کړئ، ستاسو يو غاښ به مات شي. څنګه چې تاسو يو بل نفر ټپي کړئ، ستاسو سره به په بدل کې هماغه شان کار کيږي.

²¹هرڅوک چې يو حيوان ووژني تاوان به يې ورکوي، مګر څوک چې يو انسان ووژني، هغه به ووژل شي.

²²دا قانون په تاسو ټولو باندې عملي کيږي، يعنې په اسرائيليانو او په هغو بېګانه خلکو باندې چې ستاسو په منځ کې اوسيږي، ځکه چې زه ستاسو څښتن خدای يم.“

²³کله چې حضرت موسیٰ د اسرائيلو قوم ته دا خبرې وکړې، هغوی دا سړی له کمپ څخه دباندې وويست او سنګسار يې کړ. په دې ډول د اسرائيلو قوم هغه څه وکړل چې څښتن يې په حضرت موسیٰ باندې امر کړی ؤ.