Read Pashto (Nangahari) — د پښتو مقدس کتاب لاويان 25 Bible Online

لاويان 25 - Pashto (Nangahari) — د پښتو مقدس کتاب bible

لاويان 25

¹د سينا په غره باندې څښتن حضرت موسیٰ ته وفرمايل:

²”د اسرائيليانو سره خبرې وکړه او ورته ووايه: کله چې تاسو هغې خاورې ته چې زه يې درکوم ورننوزئ، بايد څښتن ته د احترام په خاطر هر اووم کال د ځمکې د کرلو څخه ډډه وکړئ.

³شپږ کاله خپل پټي وکرئ او شپږ کاله د خپلو انګورو د تاکونو څانګې اصلاح کړئ او حاصلات يې راټول کړئ.

⁴مګر په اووم کال دې ځمکه بيخي خاره پاتې شي، دا به څښتن ته وقف شوی کال وي. په دې کال کې خپل پټي مه کرئ او د خپلو انګورو د تاکونو څانګې مه اصلاح کوئ.

⁵هغه غلې دانې مه رېبئ چې بې له کرلو په خپله راشنې کيږي او د خپلو هغو تاکونو څخه انګور مه راټولوئ چې څانګې يې اصلاح شوې نه وي. دا يو کال دی چې ځمکه په کې بيخي خاره پاتې کيږي.

⁶۶‏-۷ خو بياهم تاسو، ستاسو غلامان، ستاسو مزدوران او هغه بېګانه خلک چې ستاسو په منځ کې اوسيږي او همدارنګه ستاسو اهلي او وحشي حيوانات کولی شي هغه څه چې په خپله راشنه کيږي وخوري.

⁷

⁸اوه ځلې اوه کاله وشمېرئ، چې ټول نهه څلوېښت کاله کيږي.

⁹بيا د اوومې مياشتې په لسمه ورځ چې د کفارې ورځ ده په ټول وطن کې سرني ووهئ.

¹⁰په دې ډول به تاسو پنځوسم کال خاص کال وګڼئ او د وطن ټولو اوسېدونکو ته به آزادي اعلان کړئ. د دې کال په دوران کې به هغه ټول جايداد چې خرڅ شوی وي خپل اصلي خاوند يا د هغه اولادې ته بېرته ورکړل شي او هرڅوک چې د غلام په توګه خرڅ شوی وي خپلې کورنۍ ته به ورستون شي.

¹¹پنځوسم کال به ستاسو دپاره د بېرته ورکولو کال وي. تاسو خپلې ځمکې ونه کرئ او هغه غلې دانې ونه رېبئ چې په خپله راشنې کيږي او د خپلو هغو تاکونو څخه انګور مه راټولوئ چې څانګې يې اصلاح شوې نه وي.

¹²د بېرته ورکولو ټول کال به ستاسو دپاره پاک وي، تاسو به يوازې هغه څه خورئ چې په پټي کې په خپل سر راشنه کيږي.

¹³په دې کال کې به ټول جايداد چې خرڅ شوی وي خپل اصلي خاوند ته بېرته ورکړل شي.

¹⁴که چېرې تاسو په خپل يو هېوادوال باندې ځمکه خرڅه کړئ يا يې ورڅخه واخلئ، د يو بل څخه ګټه مه اخلئ.

¹⁵د ځمکې بيه دې د هغو کلونو د شمېر له مخې حساب شي چې د بېرته ورکولو د بل کاله پورې په کې دا ځمکه حاصل ورکولی شي.

¹⁶که چېرې کلونه ډېر وي نو بيه به يې لوړه وي، مګر که چېرې کلونه کم وي، بيه به يې ټيټه وي ځکه چې څه چې خرڅيږي هغه به د فصلونو د شمېر په مطابق وي.

¹⁷د يو بل څخه ګټه مه اخلئ مګر زما څخه ووېرېږئ، ځکه چې زه ستاسو څښتن خدای يم.

¹⁸د څښتن د ټولو فرمانونو او قوانينو څخه پيروي وکړئ، ترڅو په دې خاوره کې په امن سره واوسېږئ.

¹⁹ځمکه به خپل حاصلات ورکړي او تاسو چې هرڅه غواړئ د خوړلو دپاره به يې ولرئ او په امن کې به واوسېږئ.

²⁰مګر کېدای شي چې تاسو پوښتنه وکړئ: که چېرې مونږ څه شی ونه کرو او حاصل راټول نه کړو، نو په اووم کال به څه شی وخورو؟

²¹زه به په شپږم کال تاسو ته داسې برکت درکړم چې ځمکه به د دريو کلونو دپاره پوره حاصل ورکړي.

²²کله چې تاسو د اتم کال په دوران کې خپلې ځمکې وکرئ، د هغو حاصلاتو څخه به خواړه خورئ چې د شپږم کال په دوران کې راټول شوي ؤو او په نهم کال کې به هغه خواړه وخورئ کوم چې تاسو په اتم کال کې کرلي دي.

²³تاسو بايد خپله ځمکه په دايمي توګه خرڅه نه کړئ، ځکه چې دا ستاسو نه ده. هغه ځمکه زما ده او تاسو په کې د هغو بېګانو خلکو په شان يئ چې کولی شي د هغې څخه يوازې ګټه واخلي.

²⁴کله چې ځمکه خرڅيږي، د هغې اصلي خاوند حق لري چې هغه بېرته په بيه واخلي.

²⁵که چېرې له تاسو اسرائيليانو څخه يو نفر غريب شي او مجبور شي چې د خپلې ځمکې څخه يو څه ځمکه خرڅه کړي، د هغه ډېر نژدې خپلوان بايد هغه بېرته واخلي.

²⁶که چېرې يو نفر يو خپلوان هم ونلري چې هغه بېرته واخلي، کېدای شي چې هغه وروسته شتمن شي او پوره پيسې ولري چې هغه بېرته واخلي.

²⁷په دې صورت کې هغه بايد د حاصلاتو بيه د هغو کلونو دپاره معلومه کړي چې د بېرته ورکولو تر راتلونکي کاله پورې پاتې وي او د هغو پيسې دې هغه نفر ته ورکړي په چا باندې چې هغه خرڅه شوې وي. بيا هغه کولی شي چې بېرته خپله ځمکه واخلي.

²⁸مګر که چېرې اصلي خاوند نشي کولی چې هغه ځمکه بېرته په بيه واخلي، نو هغه به د بېرته ورکولو د راتلونکي کال پورې د نوي خاوند وي. د بېرته ورکولو په کال به هغه بېرته خپل اصلي خاوند ته ورکړل شي.

²⁹که چېرې يو نفر په دېوال لرونکي ښار کې يو کور خرڅ کړي، دا حق لري چې د اول کال په ټول دوران کې د خرڅېدلو د نېټې څخه را په دې خوا هغه بېرته واخلي.

³⁰مګر که چېرې هغه په دې کال کې بېرته وانخلي، د هغه د بېرته اخيستلو حق له لاسه ورکوي او هغه کور د اخيستونکي او د هغه د اولادې دايمي ملکيت کيږي. هغه به د بېرته ورکولو په کال کې بېرته ورنه کړای شي.

³¹مګر کوم کورونه چې په بې دېواله کليو کې دي په هغو باندې دې د پټيو په شان کار وشي. اصلي خاوند حق لري چې هغه بېرته واخلي او هغه دې د بېرته ورکولو په کال کې بېرته ورکړای شي.

³²لاويان دا حق لري چې خپل جايداد په هغو ښارونو کې چې هغوی ته ورکړل شوي دي په هر وخت کې بېرته په بيه واخلي.

³³که چېرې يو لاوي د دغو ښارونو څخه په يو ښار کې يو کور خرڅ کړي او بېرته يې وانخلي، هغه بايد د بېرته ورکولو په کال کې بېرته ورکړای شي، ځکه چې د اسرائيلو د قوم په منځ کې چې لاويان په خپلو ښارونو کې کوم کورونه لري، هغه د هغوی دايمي ملکيت دی.

³⁴مګر هغه څړځايونه چې د لاويانو د ښارونو په شاوخوا کې دي هغه به هيڅکله خرڅ نشي. دا د تل دپاره د هغوی ملکيت دی.

³⁵که چېرې يو اسرائيلی چې ستاسو سره نژدې اوسيږي غريب شي او خپل ځان ونشي ساتلی، تاسو بايد د هغه سره داسې مرسته وکړئ لکه څنګه يې چې د يو بېګانه يا موقتي اوسېدونکي سره کوئ، ترڅو هغه وکولی شي چې ستاسو په خوا کې واوسيږي.

³⁶د يو اسرائيلي څخه هيڅ سود مه اخلئ، مګر د خپل خدای څخه ووېرېږئ، ترڅو ستاسو هېوادوال وکولی شي چې ستاسو په خوا کې واوسيږي.

³⁷په هغو پيسو باندې چې تاسو يې ورته په قرض ورکوئ د هغوی څخه سود مه اخلئ او په هغو خواړو باندې چې تاسو يې ورباندې خرڅوئ، ګټه مه اخلئ.

³⁸زه ستاسو څښتن خدای يم چې تاسو مې له مصر څخه راوويستلئ د دې په خاطر چې د کنعان ځمکه درکړم او ستاسو خدای اوسم.

³⁹که چېرې يو اسرائيلی چې ستاسو سره نژدې اوسيږي دومره غريب شي چې خپل ځان په تاسو باندې د غلام په توګه خرڅ کړي، تاسو به په هغه باندې د غلامانو کار نه کوئ.

⁴⁰د هغه سره دې د مزدور يا هغه موقتي اوسېدونکي په شان رويه وشي کوم چې ستاسو په منځ کې اوسيږي. هغه اسرائيلی دې د بېرته ورکولو تر بل کاله پورې ستاسو خدمت وکړي.

⁴¹په هغه وخت کې به هغه او د هغه اولادونه ستاسو څخه لاړ شي او خپلې کورنۍ او د خپلو نيکونو ملکيت ته به ورستانه شي.

⁴²اسرائيليان زما غلامان دي چې ما له مصر څخه راوويستل. په دې خاطر بايد هغوی د غلامانو په توګه خرڅ نشي.

⁴³د خپل خدای څخه ووېرېږئ او د هغوی سره سخته رويه مه کوئ.

⁴⁴که چېرې تاسو غلامانو ته ضرورت لرئ، کولی شئ چې د خپل شاوخوا قومونو څخه يې په بيه واخلئ.

⁴⁵همدارنګه تاسو کولی شئ چې ځينې بېګانه خلک چې ستاسو په منځ کې اوسيږي او د هغوی اولادونه چې ستاسو په خاوره کې پيدا شوي دي هم په بيه واخلئ. هغوی به ستاسو ملکيت شي.

⁴⁶وروسته تاسو هغوی خپلو اولادونو ته د ميراث په توګه پرېښودلی شئ او د ټول عمر دپاره ورڅخه غلامان جوړولی شئ. مګر د خپلو اسرائيليانو سره بايد سخته رويه ونه کړئ.

⁴⁷فرض کړئ يو بېګانه يا يو داسې موقتي اوسېدونکی چې ستاسو په منځ کې اوسيږي شتمن شي، مګر کوم اسرائيلی غريب شي او خپل ځان په هغه بېګانه نفر يا د هغه نفر د کورنۍ په غړي باندې د غلام په توګه خرڅ کړي.

⁴⁸هغه د خرڅېدلو څخه وروسته بياهم حق لري چې بېرته په بيه واخيستل شي. يو ورور،

⁴⁹يا يو تره يا يو د تره زوی يا يو بل نژدې خپلوان يې بېرته اخيستلی شي. که چېرې هغه په خپله پوره پيسې لاس ته راوړي، خپله آزادي په خپله اخيستلی شي.

⁵⁰هغه بايد د هغه چا سره چې دی يې اخيستی دی مشوره وکړي او د هغه وخت څخه چې خپل ځان يې خرڅ کړی ؤ د بېرته ورکولو د بل کاله پورې کلونه دې وشمېري او د هغه د آزادېدو بيه دې د پاتې کلونو د هغه نرخ په اساس وي چې يو مزدور ته د هغو کلونو د شمېر په حساب ورکول کيږي.

⁵¹۵۱‏-۵۲ که چېرې د بېرته ورکولو تر کاله پورې زياته موده پاتې وي هغه به د خپلې آزادۍ دپاره زياتې پيسې ورکوي او که چېرې لږه موده پاتې وي نو لږې پيسې به ورکوي

⁵²

⁵³د هغه سره دې د داسې مزدورانو په شان رويه وشي چې د کال په حساب اجيران نيول کيږي. تاسو بايد وګورئ چې د هغه خاوند د هغه سره سخته رويه ونه کړي.

⁵⁴حتیٰ که چېرې هغه په دغو طريقو آزاد نشي، د بېرته ورکولو په راتلونکي کال بايد هغه او د هغه اولادونه آزاد شي.

⁵⁵دا ځکه چې اسرائيليان زما غلامان دي چې ما له مصر څخه راوويستل. زه د هغوی څښتن خدای يم.“