Read Pashto (Nangahari) — د پښتو مقدس کتاب لاويان 26 Bible Online

لاويان 26 - Pashto (Nangahari) — د پښتو مقدس کتاب bible

لاويان 26

¹څښتن وفرمايل: ”د خپلو ځانونو دپاره بتان يا مجسمې يا د تيږو ستنې مه جوړوئ چې د هغو عبادت وکړئ. زه ستاسو څښتن خدای يم.

²د سبت د ورځې څخه پيروي وکړئ او د هغه ځای احترام وکړئ چې زما عبادت په کې کيږي. زه څښتن يم.

³که چېرې تاسو زما د فرمانونو څخه پيروي وکړئ او زما امرونو ته غاړه کېږدئ،

⁴زه به په صحيح وخت په تاسو باندې باران واوروم، ترڅو ځمکه حاصلات ورکړي او ونې مېوې ونيسي.

⁵ستاسو فصلونه به دومره پرېمانه شي چې ستاسو د غلو دانو غوبل به تر هغه پورې دوام وکړي ترڅو د انګورو د راټولولو وخت راشي او ستاسو د انګورو د حاصل راټولول به تر هغه وخته پورې دوام وکړي ترڅو د غلو دانو د کرلو وخت راورسيږي. هرڅه چې تاسو يې غواړئ هغه به وخورئ او په خپله خاوره کې به په امن سره واوسېږئ.

⁶زه به ستاسو خاورې ته آرامي راولم او تاسو به بې د چا له وېرې خوب کولی شئ. زه به د هغې خاورې څخه خطرناک حيوانات لېرې کړم او هلته به نور جنګ نه وي.

⁷تاسو به په خپلو دښمنانو باندې بريالي شئ او په جګړه کې به يې ووژنئ.

⁸ستاسو پنځه تنه به وکولی شي چې سلو تنو ته ماتې ورکړي او ستاسو سل تنه به وکولی شي چې لسو زرو تنو ته ماتې ورکړي.

⁹زه به تاسو ته برکت درکړم او ډېر اولادونه به درکړم او په هغه لوظ باندې به ودرېږم چې تاسو سره مې کړی دی.

¹⁰ستاسو حاصلات به دومره پرېمانه شي چې هغه به تر کاله پورې ورسيږي او حتیٰ څه چې د زاړه حاصل څخه پاتې دي هغه به لېرې وغورزوئ ترڅو د نوي حاصل دپاره ځای پيدا شي.

¹¹زه به راشم او ستاسو په منځ کې به اوسېږم او هيڅکله به ستاسو څخه کرکه ونه کړم.

¹²زه به ستاسو سره مل يم او ستاسو خدای به يم او تاسو به زما قوم يئ.

¹³زه ستاسو څښتن خدای يم چې تاسو مې له مصر څخه راوويستلئ ترڅو نور د مصريانو غلامان نه اوسئ. ما ستاسو د غلامۍ جغونه مات کړل او تاسو ته مې د دې توان درکړ چې په سرلوړۍ سره واوسېږئ.“

¹⁴څښتن وفرمايل: ”مګر که چېرې زما امرونو ته غاړه کېنږدئ نو تاسو ته به سزا درکړل شي.

¹⁵که چېرې تاسو زما د قوانينو او حکمونو د منلو څخه انکار وکړئ او هغه لوظ مات کړئ چې ستاسو سره مې کړی دی،

¹⁶نو زه به تاسو ته داسې سزا درکړم: په تاسو باندې به آفت نازل کړم، داسې ناروغي چې د علاج وړ نه وي او تبې چې تاسو به ړانده کړي او ستاسو ژوند به خراب کړي. تاسو به خپل فصلونه وکرئ، مګر هيڅ ګټه به درته ونه رسوي ځکه چې څه چې تاسو کرئ ستاسو دښمنان به يې وخوري.

¹⁷زه به ستاسو په ضد شم، ترڅو ستاسو دښمنان تاسو ته ماتې درکړي او هغوی چې ستاسو څخه کرکه کوي په تاسو باندې به حکومت کوي. تاسو به دومره وېرېږئ چې بې له دې چې څوک مو تعقيب کړي تاسو به تښتئ.

¹⁸که چېرې د دغو ټولو شيانو څخه وروسته بياهم ماته غوږ ونه نيسئ، زه به تاسو ته ستاسو د ګناهونو په خاطر اوه چنده زياته سزا درکړم.

¹⁹زه به ستاسو سخت غرور مات کړم. هيڅ باران به نه وي او ستاسو ځمکه به وچه شي او د اوسپنې په شان به کلکه شي.

²⁰ستاسو ټول زيار به تاسو ته هيڅ ګټه ونه رسوي، ځکه چې ستاسو ځمکه به فصلونه نه کوي او ونې به مېوه ونه نيسي.

²¹که چېرې تاسو زما په خلاف اوسئ او ماته غوږ ونه نيسئ، زه به بيا ستاسو سزا اوه چنده زياته کړم.

²²زه به ستاسو منځ ته خطرناک حيوانات درولېږم او هغوی به ستاسو اولادونه ووژني، ستاسو حيوانات به له منځه يوسي او ستاسو شمېر به دومره کم کړي چې لارې به مو خوشې پاتې شي.

²³که چېرې د دغو ټولو سزاګانو سره سره زما خبرو ته غوږ ونه نيسئ او زما په خلاف پاتې شئ،

²⁴زه به په خپله ستاسو په خلاف شم او تاسو ته به له مخکې څخه اوه چنده سخته سزا درکړم.

²⁵زه به په تاسو باندې جنګ راولم د دې په خاطر چې تاسو ته د خپل لوظ د ماتولو دپاره سزا درکړم او که چېرې تاسو د خوندي پاتې کېدلو دپاره په خپلو ښارونو کې راغونډ شئ، زه به په تاسو باندې ناعلاجه ناروغۍ نازلې کړم او تاسو به مجبور شئ چې خپلو دښمنانو ته تسليم شئ.

²⁶زه به په تاسو باندې خواړه بند کړم چې لس ښځې به يو تنور ډوډۍ پخوي. ستاسو جيره به دومره کمه کړم چې کله تاسو هغه ټوله وخورئ، بيا به هم ماړه نشئ.

²⁷که چېرې له دې سره سره بياهم تاسو ماته غوږ ونه نيسئ او زما په خلاف پاتې شئ،

²⁸بيا به زه په تاسو باندې خپل غضب نازل کړم او ستاسو سزا به له پخوا څخه اوه چنده زياته کړم.

²⁹ستاسو لوږه به دومره زياته شي چې خپل اولادونه به وخورئ.

³⁰زه به ستاسو هغه عبادتخانې له منځه يوسم چې په غونډيو باندې دي. ستاسو د خوشبويۍ قربانګاوې به له منځه يوسم او ستاسو مړي به ستاسو په بې ساه بتانو باندې وغورزوم. زه به ستاسو څخه کرکه وکړم.

³¹ستاسو ښارونه به په کنډوالو بدل کړم، ستاسو عبادتخانې به له منځه يوسم او ستاسو قربانۍ ګانې به قبولې نه کړم.

³²زه به ستاسو خاوره بيخي له منځه يوسم چې دښمنان مو هغه ونيسي، نو دې ورانۍ ته به هک حيران پاتې شي.

³³زه به په تاسو باندې جنګ راولم او تاسو به په پرديو هېوادونو کې خپاره کړم. ستاسو ځمکه به خوشې پاتې شي او ښارونه به مو په کنډوالو بدل شي.

³⁴۳۴‏-۳۵ بيا به ځمکه د خاره پاتې کېدلو د کلونو څخه چې تاسو پريښې نه وه ګټه واخلي. نو ترڅو پورې چې تاسو د خپلو دښمنانو په خاوره کې په جلاوطنۍ کې اوسېږئ هغه به خوشې او خاره پاتې شي.

³⁵

³⁶ستاسو هغه خلک چې په جلاوطنۍ کې دي، د هغوی په زړونو کې به داسې وېره واچوم چې د هغې پاڼې له آواز څخه به هم تښتي چې باد يې رپوي. هغوی به داسې منډې وهي لکه څوک چې يې په جګړه کې تعقيبوي. د هغوی په څنګ کې به هيڅ دښمن نه وي مګر هغوی به غورزيږي.

³⁷هيڅ څوک به هغوی نه تعقيبوي خو هغوی به د يو بل دپاسه غورزيږي او دا توان به نه لري چې د خپلو دښمنانو په مقابل کې ودريږي.

³⁸هغوی به په پردي وطن کې مړه شي او د خپلو دښمنانو خاوره به يې ژوندي تېر کړي.

³⁹د هغوی څخه چې څوک د خپلو دښمنانو په خاوره کې ژوندي پاتې شي، د هغوی ژوند به ستاسو او ستاسو د نيکونو د ګناه له کبله برباد شي.

⁴⁰مګر ستاسو اولاده به د خپلو ګناهونو او خپلو نيکونو د ګناهونو اقرار کوي چې زما سره يې بې وفايي او دښمني وکړه

⁴¹او زه يې د خپل ځان په ضد کړم ترڅو هغوی د خپلو دښمنانو خاورې ته وشړم. په آخر کې کله چې ستاسو د اولادې سخت زړونه نرم شي او د خپلې ګناه دپاره سزا ومومي،

⁴²زه به د يعقوب، اسحاق او ابراهيم سره خپل لوظ او خپل قوم ته د ځمکې د ورکولو وعده راياده کړم.

⁴³اول بايد د دې وطن خلک دا ځمکه پرېږدي ترڅو د خاره پاتې کېدلو څخه ګټه واخلي او هغوی بايد زما د قوانينو او فرمانونو د ردولو په سبب د خپلو ګناهونو پوره بيه ادا کړي.

⁴⁴بياهم، کله چې هغوی د خپلو دښمنانو په خاوره کې وي، زه به يې بيخي له منځه نه وړم. هغوی به نه پرېږدم او خپل لوظ به ورسره مات نه کړم، ځکه چې زه د هغوی څښتن خدای يم.

⁴⁵مګر زه به د هغوی په خاطر هغه لوظ راياد کړم چې د هغوی د نيکونو سره مې هغه وخت کړی ؤ چې هغوی مې له مصر څخه راوويستل د دې دپاره چې زه به د هغوی خدای اوسم او په دې ډول مې نورو قومونو ته خپل قدرت وروښود.“

⁴⁶دا هغه فرمانونه، قوانين او مقررات دي چې څښتن د سينا په غره باندې د اسرائيليانو دپاره حضرت موسیٰ ته ورکړل.