Read Pashto (Nangahari) — د پښتو مقدس کتاب لاويان 3 Bible Online

لاويان 3 - Pashto (Nangahari) — د پښتو مقدس کتاب bible

لاويان 3

¹کله چې څوک د خپلې پادې يو حيوان د سلامتۍ د نذرانې په توګه د څښتن په حضور کې وړاندې کوي، هغه دې يو داسې غويی يا غوا وي چې کوم عيب په کې نه وي.

²هغه به خپل لاس د حيوان په سر باندې کېږدي او هغه به د مقدسې خېمې د دروازې په خولې کې حلال کړي. بيا به د هارون زامن چې کاهنان دي، هغه وينه د قربانۍ د ځای په څلورو خواو باندې وشيندي.

³هغه نفر دې د حيوان دغه برخې څښتن ته د داسې قربانۍ په توګه چې په اور باندې تياريږي وړاندې کړي: ټوله وازګه چې په کولمو باندې پرته وي،

⁴پښتورګي د وازګې سره چې دپاسه ورباندې پرته وي او د اينې ډېره ښه برخه.

⁵بيا دې کاهنان هغه ټوله د سوزېدونکې نذرانې سره په قربانګاه باندې وسوزوي. د داسې نذرانې بوی په څښتن باندې ښه لګيږي.

⁶که چېرې هغه نفر د خپلې رمې څخه يو حيوان څښتن ته د سلامتۍ د نذرانې په توګه وړاندې کوي، هغه دې يو داسې ښځينه يا نر حيوان وي چې کوم عيب په کې نه وي.

⁷که چېرې هغه پسه وړاندې کوي،

⁸نو خپل لاس دې د حيوان په سر باندې کېږدي او هغه دې د خېمې په مخ کې حلال کړي. کاهنان به د هغه وينه د قربانۍ د ځای په څلورو خواو باندې وشيندي.

⁹هغه دې د سلامتۍ د نذرانې څخه يوه داسې قرباني راوړي چې په اور باندې څښتن ته تياريږي: لکه د هغې وازګه، ټول لم چې له شمزۍ څخه پرې کړل شوی وي او ټوله وازګه چې په کولمو باندې پرته وي،

¹⁰پښتورګي د هغې وازګې سره چې دپاسه ورباندې پرته وي او د اينې ډېره ښه برخه.

¹¹کاهن دې هغه د خواړو د نذرانې په توګه څښتن ته په قربانګاه باندې وسوزوي.

¹²که چېرې د هغه نفر نذرانه يوه وزه يا وز وي،

¹³نو خپل لاس دې د حيوان په سر باندې کېږدي او د مقدسې خېمې په مخکې دې حلال کړي. بيا به کاهنان د هغه وينه د قربانۍ د ځای په څلورو خواو باندې وشيندي.

¹⁴هغه دې د خپلې نذرانې يوه برخه چې په اور باندې څښتن ته تياريږي وړاندې کړي: ټوله وازګه چې په کولمو باندې پرته وي،

¹⁵پښتورګي د هغې وازګې سره چې دپاسه ورباندې پرته وي او د اينې ډېره ښه برخه.

¹⁶کاهن به دا ټول د خواړو د نذرانې په توګه چې څښتن ورباندې خوشاليږي په قربانګاه باندې وسوزوي. ټوله وازګه د څښتن ده.

¹⁷هيڅ اسرائيلی نشي کولی چې کومه وازګه يا وينه وخوري. دا يو دايمي حکم دی چې ټول اسرائيليان چې هرچېرته اوسيږي بايد د هغه څخه پيروي وکړي.“