Read Pashto (Nangahari) — د پښتو مقدس کتاب لاويان 4 Bible Online

لاويان 4 - Pashto (Nangahari) — د پښتو مقدس کتاب bible

لاويان 4

¹څښتن حضرت موسیٰ ته وفرمايل:

²”اسرائيليانو ته ووايه: کله چې څوک ګناه کوي او په سهوې سره د څښتن حکمونه ماتوي، هغه بايد دا لانديني مقررات مراعت کړي.

³که چېرې مشر کاهن ګناه وکړي او په دې ډول قوم ګناهکار کړي، هغه به يو داسې ځوان غويی وړاندې کوي چې کوم عيب په کې نه وي او د خپلې ګناه دپاره به يې څښتن ته قرباني کوي.

⁴هغه دې غويی د مقدسې خېمې د دروازې خولې ته راولي، خپل لاس دې د هغه په سر باندې کېږدي او د څښتن په حضور کې دې هلته حلال کړي.

⁵بيا به مشر کاهن د غويي له وينې څخه لږه وينه واخلي او دننه خېمې ته به يې يوسي.

⁶هغه دې خپله ګوته په وينه کې غوټه کړي او لږه وينه دې واخلي او اوه ځلې دې د څښتن په حضور کې د مقدس ځای د پردې مخې ته وشيندي.

⁷بيا به کاهن لږه وينه په خېمه کې د خوشبويۍ د قربانګاه په برجونو باندې وسولوي. هغه به پاتې وينه د خېمې د دروازې په خوله کې د سوزېدونکې نذرانې د قربانګاه په بېخ کې توی کړي.

⁸هغه به له دې غويي څخه ټوله وازګه واخلي، يعنې هغه وازګه چې په کولمو باندې پرته وي،

⁹پښتورګي د وازګې سره چې دپاسه ورباندې پرته وي او د اينې ډېره ښه برخه،

¹⁰لکه څنګه چې وازګه له غويي څخه چې د سلامتۍ د نذرانې په توګه قرباني کيږي لېرې کيږي. بيا به کاهن هغه د سوزېدونکې نذرانې په قربانګاه باندې وسوزوي.

¹¹مګر هغه به د هغه پوستکی، ټوله غوښه، سر، پښې او د هغه د نس دننۍ برخې د خوشايو سره واخلي،

¹²هغه به ټول د کمپ څخه دباندې پاک ځای ته چېرته چې ايرې غورزول کيږي يوسي او هلته به يې د لرګيو په اور باندې وسوزوي.

¹³که چېرې د اسرائيلو ټول قوم په سهوې سره ګناه وکړي او د څښتن د حکمونو څخه کوم حکم مات کړي نو هغوی به ګناهکار وګڼل شي.

¹⁴کله چې هغوی په خپله ګناه پوه شي، بايد د ګناه د نذرانې په توګه يو ځوان غويی راولي او د مقدسې خېمې په مخ کې دې هغه وړاندې کړي.

¹⁵د قوم مشران دې خپل لاسونه د غويي په سر باندې کېږدي او غويی دې د څښتن په حضور کې حلال شي.

¹⁶بيا دې مشر کاهن د غويي له وينې څخه لږه وينه واخلي او دننه خېمې ته دې يوسي.

¹⁷هغه دې خپله ګوته په وينه کې غوټه کړي او هغه دې د څښتن په حضور کې اوه ځلې د پردې مخې ته وشيندي.

¹⁸بيا دې هغه لږه وينه په مقدسه خېمه کې د څښتن په حضور کې د خوشبويۍ د قربانګاه په برجونو باندې وسولوي. هغه به پاتې وينه د مقدسې خېمې د دروازې په خولې کې د سوزېدونکې نذرانې د قربانګاه په بېخ کې توی کړي.

¹⁹بيا به هغه د غويي ټوله وازګه لېرې کړي او په قربانګاه باندې به يې وسوزوي.

²⁰هغه به د دې غويي سره هماغسې کار وکړي لکه څنګه چې د ګناه د نذرانې د غويي سره يې کړی ؤ. په دې ډول به کاهن د قوم دپاره کفاره ادا کړي او هغوی به وبخښل شي.

²¹بيا به هغه غويی له کمپ څخه دباندې يوسي او وبه يې سوزوي، لکه څنګه چې هغه غويی يې سوزولی ؤ چې د هغه د ګناه دپاره وړاندې شوی ؤ. دا هغه نذرانه ده چې د ټول قوم د ګناه د لېرې کولو دپاره ده.

²²کله چې يو مشر په سهوې سره ګناه وکړي او د څښتن د حکمونو څخه کوم حکم مات کړي نو هغه به ګناهکار وګڼل شي.

²³کله چې هغه د خپلې ګناه څخه خبر کړای شي، هغه بايد د خپلې نذرانې په توګه يو داسې وز راولي چې کوم عيب په کې نه وي.

²⁴هغه دې خپل لاس د وز په سر باندې کېږدي او په هغه ځای کې دې حلال کړي چېرته چې د څښتن په حضور کې د سوزېدونکې نذرانې دپاره حيوانات حلاليږي. دا د ګناه نذرانه ده.

²⁵بيا دې کاهن د هغه وز د وينې څخه په خپله ګوته باندې لږه وينه راواخلي او د قربانګاه په برجونو باندې دې وسولوي. پاتې وينه به د قربانۍ د ځای په بېخ کې توی کړي.

²⁶بيا دې هغه دا ټوله وازګه په قربانګاه باندې وسوزوي لکه څنګه چې هغه د سلامتۍ د نذرانې وازګه وسوزوله. په دې ډول به کاهن د هغه مشر د ګناه دپاره کفاره ادا کړي او هغه به وبخښل شي.

²⁷که چېرې کوم عام نفر په سهوې سره ګناه وکړي او د څښتن د حکمونو څخه کوم حکم مات کړي نو هغه به ګناهکار وګڼل شي.

²⁸کله چې هغه د خپلې ګناه څخه خبر کړای شي، بايد د خپلې نذرانې په توګه يوه داسې وزه راولي چې کوم عيب په کې نه وي.

²⁹هغه دې خپل لاس د هغې په سر باندې کېږدي او د سوزېدونکې نذرانې په ځای کې دې حلاله کړي.

³⁰بيا دې کاهن په خپله ګوته باندې د هغه حيوان لږه وينه راواخلي او د قربانګاه په برجونو باندې دې وسولوي او پاتې وينه دې د قربانګاه په بېخ کې توی کړي.

³¹هغه به د وزې ټوله وازګه لېرې کړي، لکه څنګه چې د سلامتۍ له نذرانې څخه لېرې کيږي او کاهن به هغه په قربانګاه باندې وسوزوي چې بوی يې په څښتن باندې ښه لګيږي. په دې ډول به کاهن د هغه نفر د ګناه دپاره کفاره ادا کړي او هغه به وبخښل شي.

³²که چېرې هغه د خپلې ګناه د نذرانې په توګه يوه مېږه راولي، هغه بايد داسې مېږه وي چې کوم عيب په کې نه وي.

³³هغه دې خپل لاس د هغې په سر باندې کېږدي او د سوزېدونکې نذرانې په ځای کې دې حلاله کړي.

³⁴بيا دې کاهن په خپله ګوته باندې د هغه حيوان لږه وينه راواخلي او د قربانګاه په برجونو باندې دې وسولوي او پاتې وينه دې د قربانګاه په بېخ کې توی کړي.

³⁵بيا به د هغې څخه ټوله وازګه لېرې کړي، لکه څنګه چې د سلامتۍ د نذرانې له پسه يا مېږې څخه لېرې کيږي او کاهن به هغه په قربانګاه باندې د هغو نذرانو سره يوځای وسوزوي چې څښتن ته تياريږي. په دې ډول به کاهن د هغه نفر د ګناه دپاره کفاره ادا کړي او هغه به وبخښل شي.