Read Pashto (Nangahari) — د پښتو مقدس کتاب لاويان 5 Bible Online

لاويان 5 - Pashto (Nangahari) — د پښتو مقدس کتاب bible

لاويان 5

¹په دې لاندينيو حالتونو کې د ګناه نذرانې ضروري دي: که چېرې څوک د شاهدۍ ورکولو دپاره محکمې ته وغوښتل شي او د هغو شيانو په باره کې چې هغه ليدلي يا اورېدلي دي معلومات ورنه کړي، نو هغه ته دې د خپلو بدو سزا ورکړل شي.

²که چېرې د چا لاس په سهوې سره د يو شي سره چې په مذهبي لحاظ ناپاک وي لکه مړ شوي حيوان سره ولګيږي، نو کله چې پوه شي چې هغه څه کړي دي، نو هغه نفر ناپاکه او ګناهکار دی.

³که چېرې څوک په سهوې سره د انساني ناپاکۍ سره که هغه هرڅه وي ولګيږي، نو څنګه چې پوه شي چې څه يې کړي دي، هغه به ګناهکار وګڼل شي.

⁴که چېرې د يو چا فکر نه وي او قسم وخوري، مهمه نه ده چې د څه شي په هکله وي، څنګه چې ورڅخه خبر شي نو هغه به ګناهکار وګڼل شي.

⁵کله چې څوک له دغو ګناهونو څخه يوه ګناه وکړي، هغه بايد د هغې ګناه اقرار وکړي

⁶او د خپلې ګناه د جريمې په توګه بايد څښتن ته د ګناه د نذرانې په توګه يوه مېږه يا وزه راولي او کاهن به د هغه د ګناه دپاره کفاره ادا کړي.

⁷که چېرې هغه نفر مېږه يا وزه نشي اخيستلی، نو څښتن ته دې د خپلې ګناه د جريمې په توګه دوه کوترې يا دوه قمري ګانې راوړي يعنې يوه د ګناه د نذرانې او بله د سوزېدونکې نذرانې دپاره.

⁸هغه دې کاهن ته راوړي او کاهن به اول يوه د ګناه د نذرانې دپاره وړاندې کړي. هغه دې په داسې طريقې سره د هغې اورمېږ تاو کړي چې سر ورڅخه جلا نشي.

⁹هغه دې د ګناه د نذرانې څخه لږه وينه د قربانګاه په اړخ کې وشيندي، پاتې وينه بايد د قربانګاه په بېخ کې وڅڅول شي. دا د ګناه نذرانه ده.

¹⁰بيا به د مقرراتو په مطابق هغه دوهمه مرغۍ د سوزېدونکې نذرانې په توګه وړاندې کړي. په دې ډول به کاهن د هغه نفر د ګناه دپاره کفاره ادا کړي او هغه به وبخښل شي.

¹¹که چېرې هغه نفر دوه کوترې يا دوه قمري ګانې هم نشي اخيستلی، نو د خپلې ګناه د نذرانې دپاره دې يو کيلوګرام ښه اوړه راوړي. په هغو باندې دې د زيتونو تېل يا خوشبويي نه اچوي، ځکه چې دا د ګناه نذرانه ده.

¹²هغه بايد کاهن ته راوړي، کاهن به له هغو اوړو څخه چې ټول څښتن ته وړاندې کيږي يو موټی د نمونې په توګه راواخلي او د نورو نذرانو سره به يې په قربانګاه باندې وسوزوي. دا د ګناه د لېرې کولو نذرانه ده.

¹³په دې ډول به کاهن د هغه د ګناهونو دپاره کفاره ادا کړي او هغه به وبخښل شي. پاتې نذرانه به د غلې دانې د نذرانې په شان د کاهن وي.“

¹⁴څښتن حضرت موسیٰ ته وفرمايل:

¹⁵”که چېرې څوک په سهوې سره هغه شيان چې څښتن ته وقف شوي دي يا د هغو بيه کاهن ته ورنه کړي، نو هغه دې د تاوان د نذرانې په توګه څښتن ته يو داسې پسه راولي چې کوم عيب په کې نه وي. د هغه بيه دې د هغو پيسو په مطابق وي چې په مقدس ځای کې ورڅخه کار اخيستل کيږي.

¹⁶برسېره پردې، نوموړی بايد هغه پيسې ورکړي چې د هغو په ورکولو نه دی بريالی شوی او شل فيصده دې زياتې هم ورکړي. هغه به دا ټولې پيسې کاهن ته ورکوي. کاهن به د هغه دپاره په پسه باندې د تاوان د نذرانې په توګه کفاره ادا کړي او هغه به وبخښل شي.

¹⁷که چېرې څوک په سهوې سره ګناه وکړي او د څښتن د حکمونو څخه کوم حکم مات کړي، نو هغه ګناهکار دی او د هغې جرمانه به ورکوي.

¹⁸هغه دې د تاوان د نذرانې په توګه کاهن ته يو داسې پسه راولي چې کوم عيب په کې نه وي او مناسبه بيه ولري. په دې ډول به کاهن د هغه د ګناه دپاره چې په سهوې سره يې کړې ده کفاره ادا کړي او هغه به وبخښل شي.

¹⁹دا د هغې ګناه دپاره د تاوان يوه نذرانه ده چې د څښتن په مقابل کې يې کړې ده.“