Read Pashto (Nangahari) — د پښتو مقدس کتاب لاويان 6 Bible Online

لاويان 6 - Pashto (Nangahari) — د پښتو مقدس کتاب bible

لاويان 6

¹څښتن حضرت موسیٰ ته وفرمايل:

²”فرض کړئ د کوم نفر سره د بل چا کوم شی د امانت په توګه ايښی وي او هغه ورته دروغ ووايي چې هغه شی ورک شوی دی يا غلا شوی دی او په دې باندې د څښتن په مقابل کې ګناه وکړي. يا فرض کړئ کوم شی غلا کړي يا يې د چا څخه په زور واخلي.

³يا کوم ورک شوی شی پيدا کړي او دروغ ووايي او يا قسم وخوري چې هغه يې نه دی موندلی،

⁴۴‏-۵ نو په دې ډول که چېرې يو نفر ګناه کوي، نو کوم شی چې هغه په غلا ترلاسه کړی وي هغه دې بېرته ورکړي. په هغه ورځ چې دا ثابته شي چې هغه ګناهکار دی، نو د هغه خاوند ته دې پوره تاوان ورکړي او شل فيصده دې زيات هم ورکړي.

⁶نو هغه دې يو داسې پسه چې کوم عيب په کې نه وي او د تاوان د نذرانې په توګه څښتن ته وړاندې کيږي کاهن ته راولي. هغه دې مناسبه بيه ولري.

⁷په دې ډول به کاهن د څښتن په حضور کې د هغه دپاره کفاره ادا کړي او هغه به وبخښل شي.“

⁸څښتن حضرت موسیٰ ته وفرمايل:

⁹”هارون او د هغه زامنو ته دا حکم ورکړه چې د سوزېدونکې نذرانې دپاره دغه مقررات دي: سوزېدونکې نذرانه دې له شپې څخه تر سهاره پورې په قربانګاه باندې پاتې شي او په قربانګاه باندې بايد اور روښانه وساتل شي.

¹⁰بيا به کاهن خپل د کتان نيکرونه د کتان د چپنې سره واغوندي او د سوزېدونکې نذرانې ايرې به چې د قربانۍ په ځای باندې پاتې شوې دي لېرې کړي او د قربانۍ د ځای په څنګ کې به يې واچوي.

¹¹بيا دې هغه دا کالي وباسي او نور دې واغوندي او ايرې دې له کمپ څخه دباندې يو پاک ځای ته يوسي.

¹²په قربانګاه باندې بايد اور روښانه وساتل شي او بايد مړ نشي. کاهن دې هر سهار د اور لرګي ورزياتوي او په اور باندې دې سوزېدونکې نذرانه په ترتيب سره ږدي او په هغه باندې دې د سلامتۍ د نذرانې وازګه وسوزوي.

¹³په قربانګاه باندې بايد اور په دوامداره توګه روښانه وساتل شي او بايد مړ نشي.

¹⁴د غلې دانې د نذرانې دپاره دغه مقررات دي: د هارون زامن چې کاهنان دي دا نذرانه دې د قربانۍ د ځای مخې ته څښتن ته وړاندې کړي.

¹⁵کاهن دې له ښو اوړو او تېلو څخه چې خوشبويي ورباندې شيندل شوې ده او ټوله څښتن ته وړاندې کيږي يو موټی د نمونې په توګه واخلي او په قربانګاه باندې دې وسوزوي. د دې نذرانې بوی په څښتن باندې ښه لګيږي.

¹⁶۱۶‏-۱۷ د هغې پاتې برخه به کاهنان وخوري. د هغې څخه دې فطيره ډوډۍ پخه شي او په يو مقدس ځای يعنې د مقدسې خېمې په حويلۍ کې دې وخوړل شي. څښتن هغه کاهنانو ته د هغو نذرانو څخه چې په اور باندې ورته تياريږي د هغوی د برخې په توګه ورکړې ده. دا د ګناه او تاوان د نذرانو په شان ډېره مقدسه ده.

¹⁸د هارون هره اولاده چې نارينه وي هغه خوړلی شي. دا د هغو دوامدارو نذرانو يوه برخه ده چې تل به څښتن ته په اور باندې تياريږي. که بل څوک هغو نذرانو ته لاس وروړي، نو د هغو مقدس توب به ورته زيان ورسوي.“

¹⁹همدارنګه څښتن حضرت موسیٰ ته وفرمايل:

²⁰”دا هغه نذرانه ده چې هارون او د هغه زامن يې بايد په هغه ورځ چې هغوی په کې د کاهنانو په توګه ټاکل کيږي څښتن ته وړاندې کړي: هغوی دې يو کيلوګرام ښه اوړه د نذرانې په توګه څښتن ته وړاندې کړي (د غلې دانې د ورځينۍ نذرانې په اندازه). د هغې څخه دې نيم په سهار کې او نيم په ماښام کې وړاندې کړي.

²¹هغه دې د تېلو سره ګډ شي او په تبۍ باندې دې پاخه شي او بيا دې ميده ميده شي او د غلې دانې د نذرانې په توګه دې وړاندې شي. دا يو داسې بوی دی چې په څښتن باندې ښه لګيږي.

²²د هارون د اولادې څخه چې هرڅوک د مشر کاهن په توګه خدمت کوي، تل به دا نذرانه وړاندې کوي. هغه دې څښتن ته د قربانۍ په توګه ټول وسوزول شي.

²³د کاهن د غلې دانې هره نذرانه بايد ټوله وسوزول شي، هغه بايد ونه خوړل شي.“

²⁴څښتن حضرت موسیٰ ته وفرمايل:

²⁵”هارون او د هغه زامنو ته ووايه چې د ګناه د نذرانې دپاره دغه مقررات دي: د ګناه د نذرانې دپاره دې حيوان په هغه ځای کې چې د سوزېدونکې نذرانې دپاره حيوانات حلاليږي حلال شي. دا ډېره مقدسه نذرانه ده.

²⁶کاهن چې دا حيوان قرباني کوي، هغه دې په يو مقدس ځای يعنې د مقدسې خېمې په حويلۍ کې وخوري.

²⁷که يو څوک يا يو شی د دې حيوان د غوښې سره ولګيږي، د هغې مقدس توب به ورته زيان ورسوي. که چېرې د کاليو کوم ځای د دې حيوان په وينه ککړ شي، هغه بايد په يو مقدس ځای کې ومينځل شي.

²⁸د خاورو يو لوښی چې هغه غوښه په کې خوټول کيږي بايد مات شي او که چېرې د برنجو د لوښي څخه کار اخيستل کيږي، بايد وموښل شي او په اوبو کنګال شي.

²⁹د کاهنانو د کورنيو هر نارينه کولی شي چې دا نذرانه وخوري، هغه ډېره مقدسه ده.

³⁰مګر د ګناه کومه نذرانه چې وينه يې مقدسې خېمې ته راوړل کيږي چې په مقدس ځای کې يې کفاره ادا شي، هغه نذرانه بايد ونه خوړل شي، بايد وسوزول شي.