Read Pashto (Nangahari) — د پښتو مقدس کتاب لاويان 8 Bible Online

لاويان 8 - Pashto (Nangahari) — د پښتو مقدس کتاب bible

لاويان 8

¹څښتن حضرت موسیٰ ته وفرمايل:

²”هارون او د هغه زامن راوله. د هغوی د کاهنتوب کالي، د مسح کولو تېل، د ګناه د نذرانې دپاره غويی، دوه پسونه او هغه ټوکرۍ چې فطيره ډوډۍ په کې ده ټول راوړه.

³بيا ټول قوم د مقدسې خېمې د دروازې خوله ته راغونډ کړه.“

⁴حضرت موسیٰ د څښتن امر په ځای کړ او کله چې قوم راغونډ شو

⁵هغه ورته وفرمايل: ”اوس چې زه کوم کار کوم هغه د څښتن امر دی.“

⁶بيا حضرت موسیٰ حضرت هارون او د هغه زامن راوستل او غسل يې ورباندې وکړ.

⁷هغه حضرت هارون ته کميس او چپنه واغوستل، د هغه په ملا باندې يې يوه پټۍ وتړله او مقدس پېشبند يې ورباندې واچاوه او هغه يې په هغه ښه اوبدل شوي کمربند باندې وتاړه چې د هغه د ملا څخه تاو ؤ.

⁸د هغه په سينه باندې يې سينه پوښ وتاړه او په هغه کې يې اوريم او تميم کېښودل.

⁹لکه څنګه چې څښتن په حضرت موسیٰ باندې امر کړی ؤ، هغه حضرت هارون ته لونګۍ ور په سر کړه او د هغې په مخه کې يې د سرو زرو ګل يعنې د وقف کولو پاک نښان کېښود.

¹⁰بيا حضرت موسیٰ د مسح کولو تېل واخيستل او هغه يې په خېمه او ټول شيان چې په هغې کې ؤو په هغو باندې وشيندل او په دې ډول يې هغه ټول څښتن ته وقف کړل.

¹¹هغه لږ تېل واخيستل او اوه ځلې يې په قربانګاه باندې وشيندل او قربانګاه يې د لوښو او تشت سره چې پايه يې درلودله مسح کړه چې څښتن ته يې وقف کړي.

¹²همدارنګه هغه د مسح کولو لږ تېل د حضرت هارون په سر باندې توی کړل او هغه يې د کاهنۍ د وظيفې دپاره مسح کړ.

¹³بيا لکه څنګه چې څښتن په حضرت موسیٰ باندې امر کړی ؤ، هغه د حضرت هارون زامن مخکې راوستل او هغوی ته يې کميسونه واغوستل، په ملا ګانو باندې يې ورته پټۍ ګانې وتړلې او خولۍ ګانې يې ورته په سر کړې.

¹⁴بيا حضرت موسیٰ د ګناه د نذرانې دپاره غويی راوست او حضرت هارون او د هغه زامنو د هغه په سر باندې خپل لاسونه کېښودل.

¹⁵حضرت موسیٰ غويی حلال کړ او لږه وينه يې راواخيستله او هغه يې په خپله ګوته باندې د قربانۍ د ځای په ټولو برجونو باندې وسولوله، د دې دپاره چې د قربانۍ ځای مقدس شي. بيا هغه پاتې وينه د قربانۍ د ځای په بېخ کې توی کړه. په دې ډول د قربانۍ ځای پاک شو او هغه د ګناه په خاطر د قربانۍ د نذرانې دپاره يو مناسب ځای شو.

¹⁶همدارنګه حضرت موسیٰ ټوله وازګه چې په کولمو باندې پرته وه، د اينې ډېره ښه برخه او پښتورګي چې وازګه ورباندې پرته وي واخيستل او ټول يې په قربانګاه باندې وسوزول.

¹⁷څنګه چې څښتن امر کړی ؤ هغه پاتې غويی د پوستکي، غوښې او خوشايو سره واخيست او هغه يې د کمپ څخه دباندې وسوزاوه.

¹⁸بيا حضرت موسیٰ د سوزېدونکې نذرانې دپاره پسه راوست او حضرت هارون او د هغه زامنو د پسه په سر باندې خپل لاسونه کېښودل.

¹⁹حضرت موسیٰ پسه حلال کړ او وينه يې د قربانۍ د ځای په څلورو خواو باندې وشيندله.

²⁰هغه پسه ټوټې ټوټې کړ او سر، ټوټې او وازګه يې وسوزول.

²¹څنګه چې څښتن په حضرت موسیٰ باندې امر کړی ؤ، هغه د نس دننۍ برخې او پښې ومينځلې او ټول پسه يې په قربانګاه باندې وسوزاوه. دا يوه سوزېدونکې نذرانه وه چې بوی يې په څښتن باندې ښه لګيږي.

²²بيا حضرت موسیٰ بل پسه راوست. دا پسه د کاهنانو د ټاکنې دپاره ؤ. حضرت هارون او د هغه زامنو خپل لاسونه د هغه په سر باندې کېښودل.

²³حضرت موسیٰ پسه حلال کړ او د هغه لږه وينه يې واخيستله او د حضرت هارون د ښي غوږ په نرمۍ، د ښي لاس په غټې ګوتې او د ښي پښې په غټې ګوتې يې وسولوله.

²⁴بيا يې د حضرت هارون زامن مخکې راوستل او د هغوی د ښي غوږونو په نرميو، د ښي لاسونو په غټو ګوتو او د ښي پښو په غټو ګوتو يې لږه وينه وسولوله او پاتې وينه يې د قربانۍ د ځای په څلورو خواو باندې وشيندله.

²⁵هغه وازګه، لم، هغه ټوله وازګه چې په کولمو باندې پرته وي، د اينې ډېره ښه برخه، پختورګي د وازګې سره چې ورباندې پرته وي او ښي ورون واخيستل.

²⁶بيا هغه د فطيرې ډوډۍ له ټوکرۍ څخه چې څښتن ته وقف شوې وه يوه ساده ډوډۍ، يوه غوړه ډوډۍ او يوه نرۍ ډوډۍ راواخيستله او د وازګې او ښي ورون دپاسه يې کېښودله.

²⁷حضرت موسیٰ هغه ټول د حضرت هارون او د هغه د زامنو په لاسونو کې کېښودل او دوی هغه پورته ونيول ترڅو دا وښايي چې هغه څښتن ته وقف شوي دي.

²⁸بيا حضرت موسیٰ دا شيان له هغوی څخه بېرته واخيستل او هغه يې د ټاکنې د نذرانې په توګه د سوزېدونکې نذرانې سره په قربانګاه باندې وسوزول. د داسې نذرانې بوی په څښتن باندې ښه لګيږي.

²⁹بيا حضرت موسیٰ د پسه سينه راواخيستله او د څښتن په حضور کې يې پورته ونيوله ترڅو دا وښايي چې هغه څښتن ته وقف شوې ده. دا د ټاکنې په پسه کې د حضرت موسیٰ برخه وه. حضرت موسیٰ دا ټول کارونه د څښتن د حکم سره سم سرته ورسول.

³⁰حضرت موسیٰ لږ د مسح کولو تېل او لږه وينه چې په قربانګاه باندې پرته وه واخيستل او په حضرت هارون، د هغه په زامنو او د هغو په کاليو باندې يې وشيندل. په دې ډول يې هغوی او د هغوی کالي څښتن ته وقف کړل.

³¹حضرت موسیٰ هارون او د هغه زامنو ته وفرمايل: ”لکه څنګه چې څښتن امر کړی دی دا غوښه د مقدسې خېمې د دروازې په خوله کې پخه کړئ او هلته يې د هغې ډوډۍ سره چې د ټاکنې د نذرانې په ټوکرۍ کې ده وخورئ.

³²کومه غوښه يا ډوډۍ چې پاتې شي هغه وسوزوئ.

³³تاسو به اوه ورځې د خېمې د دروازې له خولې څخه نه ځئ ترڅو پورې چې ستاسو د ټاکنې مراسم پوره شوي نه وي.

³⁴مونږ چې نن کوم کار وکړ څښتن د هغه د کولو حکم مونږ ته کړی ؤ، د دې په خاطر چې ستاسو د ګناه دپاره کفاره ادا کړو.

³⁵تاسو بايد د مقدسې خېمې د دروازې په خوله کې اوه شپې او اوه ورځې پاتې شئ او هغه کار به کوئ چې څښتن يې امر کړی دی. که چېرې داسې ونه کړئ نو مړه به شئ. ځکه چې څښتن په ما باندې داسې امر کړی دی.“

³⁶نو حضرت هارون او د هغه زامنو ټول کارونه د څښتن د هغه حکم په مطابق وکړل چې د حضرت موسیٰ په وسيله يې کړی ؤ.