Read Pashto (Nangahari) — د پښتو مقدس کتاب لاويان 9 Bible Online

لاويان 9 - Pashto (Nangahari) — د پښتو مقدس کتاب bible

لاويان 9

¹د کاهنانو د ټاکنې د مراسمو څخه وروسته حضرت موسیٰ په اتمه ورځ حضرت هارون او د هغه زامن او د اسرائيلو مشران راوغوښتل.

²هغه حضرت هارون ته وفرمايل: ”يو خوسی او يو پسه چې کوم عيب په کې نه وي واخله او څښتن ته يې وړاندې کړه. خوسی د ګناه د نذرانې دپاره دی او پسه د سوزېدونکې نذرانې دپاره دی.

³بيا د اسرائيلو خلکو ته ووايه: يو وز د ګناه د نذرانې دپاره واخلئ. يو خوسی چې يو کلن وي او يو وری چې يو کلن وي او هيڅ عيب په کې نه وي، د سوزېدونکې نذرانې دپاره واخلئ

⁴او يو غويی او يو پسه د سلامتۍ د نذرانې دپاره. هغوی دې دا د څښتن په حضور کې د غلې دانې د نذرانې سره چې تېل ورسره ګډ وي قرباني کړي. هغوی بايد دا کار وکړي ځکه چې څښتن به نن هغوی ته ورښکاره شي.“

⁵نو هغوی ټول شيان د حضرت موسیٰ د حکم سره سم د مقدسې خېمې مخې ته راوړل او ټول قوم د څښتن د عبادت دپاره هلته راغونډ شو.

⁶حضرت موسیٰ وفرمايل: ”څښتن تاسو ته حکم کړی دی چې دا کار وکړئ، ترڅو د هغه جلال تاسو ته ښکاره شي.“

⁷بيا حضرت موسیٰ هارون ته وفرمايل: ”د قربانۍ ځای ته لاړ شه او لکه څنګه چې څښتن امر کړی دی اول د خپل ځان او بيا د قوم د ګناهونو د کفارې د ادا کولو په خاطر د ګناه نذرانه او سوزېدونکې نذرانه وړاندې کړه.“

⁸نو حضرت هارون د قربانۍ ځای ته لاړ او د ځان دپاره يې د ګناه د نذرانې په توګه خوسی حلال کړ.

⁹د هغه زامنو هغه ته وينه راوړله او هغه خپله ګوته په وينه کې غوټه کړه او له هغې څخه يې لږه د قربانۍ د ځای په برجونو باندې وسولوله. پاتې وينه يې د قربانۍ د ځای په بېخ کې توی کړه.

¹⁰لکه څنګه چې څښتن په حضرت موسیٰ باندې امر کړی ؤ، هغه په قربانګاه باندې د ګناه د نذرانې څخه وازګه، پختورګي او د اينې ډېره ښه برخه وسوزوله.

¹¹مګر غوښه او پوستکی يې د کمپ څخه دباندې وسوزول.

¹²حضرت هارون هغه حيوان حلال کړ چې د هغه د خپلې سوزېدونکې نذرانې دپاره ؤ. هغه ته خپلو زامنو وينه راوړله او هغه دا وينه د قربانۍ د ځای په څلورو خواو باندې وشيندله.

¹³هغوی حضرت هارون ته سر او د حيوان نورې ټوټې ورکړې او هغه يې په قربانګاه باندې وسوزول.

¹⁴هغه د نس دننۍ برخې او شاتنۍ پښې ومينځلې او په قربانګاه باندې يې د سوزېدونکې نذرانې دپاسه وسوزولې.

¹⁵بيا حضرت هارون هغه نذرانه راوړله چې د قوم دپاره وه. ده هغه وز چې د قوم د ګناه دپاره ؤ حلال کړ او هغه يې د ګناه د نذرانې دپاره وړاندې کړ، لکه څنګه چې هغه د خپلې ګناه دپاره وړاندې کړی ؤ.

¹⁶همدارنګه هغه سوزېدونکې نذرانه راوړله او هغه يې د مقرراتو په مطابق وړاندې کړه.

¹⁷بيا يې د غلې دانې نذرانه وړاندې کړه، له هغې څخه يې يو موټی واخيست او هغه يې په قربانګاه باندې برسېره پر هغې سوزېدونکې نذرانې چې هر سهار تياريږي وسوزاوه.

¹⁸حضرت هارون غويی او پسه د قوم دپاره د سلامتۍ د نذرانې په توګه حلال کړل. د هغه زامنو هغه ته وينه راوړله او هغه دا وينه د قربانۍ د ځای په څلورو خواو باندې وشيندله.

¹⁹هغوی د غويي او د پسه وازګينې برخې، لم، د وازګې پرده، پختورګي او د اينې ډېره ښه برخه واخيستل

²⁰او هغه يې د حيواناتو په سينو باندې کېښودل او بيا حضرت هارون وازګه په قربانګاه باندې وسوزوله.

²¹څنګه چې حضرت موسیٰ امر کړی ؤ، حضرت هارون د هغو حيواناتو سينې او شاتنۍ ښي پښې څښتن ته پورته ونيولې ترڅو دا وښايي چې هغه څښتن ته وقف شوې دي.

²²کله چې حضرت هارون د قربانيو مراسم سرته ورسول، نو خپل لاسونه يې د قوم خواته پورته ونيول او برکت يې ورته ورکړ او د قربانۍ د ځای څخه راکوز شو.

²³حضرت موسیٰ او حضرت هارون مقدسې خېمې ته ورننوتل. کله چې هغوی راووتل، قوم ته يې برکت ورکړ او د څښتن جلال ټول قوم ته ښکاره شو.

²⁴د څښتن له حضور څخه اور نازل شو او سوزېدونکې نذرانه او وازګينې برخې يې په قربانګاه باندې وسوزولې. کله چې ټول قوم هغه وليدل نو د خوشالۍ چيغې يې ووهلې او په سجده شول.