Read Pashto (Nangahari) — د پښتو مقدس کتاب شمېر 1 Bible Online

شمېر 1 - Pashto (Nangahari) — د پښتو مقدس کتاب bible

شمېر 1

¹د مصر څخه د اسرائيلو د قوم د راوتلو څخه وروسته د دوهم کال د دوهمې مياشتې په اوله ورځ کله چې څښتن د حضرت موسیٰ سره د سينا په دښته کې په مقدسه خېمه کې خبرې وکړې هغه وفرمايل:

²”ته او هارون طايفه په طايفه او کورنۍ په کورنۍ د اسرائيلو د ټول قوم سرشمېرنه وکړئ او د هغو ټولو خلکو د نومونو لست وليکئ

³چې عمر يې شل کاله يا زيات وي او جنګ کولی شي.

⁴د هرې قبيلې د طايفې د يو مشر څخه مرسته وغواړئ.

⁵دا د هغو مشرانو نومونه دي چې تاسو سره بايد مرسته وکړي: د روبين له قبيلې څخه اليصور د شديئور زوی

⁶د شمعون له قبيلې څخه شلوميئيل د صوريشدای زوی

⁷د يهودا له قبيلې څخه نحشون د عميناداب زوی

⁸د يساکار له قبيلې څخه نتنائيل د صوغر زوی

⁹د زبولون له قبيلې څخه الياب د حيلون زوی

¹⁰د حضرت يوسف له زامنو څخه: د افرايم له قبيلې څخه اليشمع د عميهود زوی د منسي له قبيلې څخه جمليئيل د فدهصور زوی

¹¹د بنيامين له قبيلې څخه ابيدان د جدعوني زوی

¹²د دان له قبيلې څخه اخيعزر د عميشدای زوی

¹³د اشير له قبيلې څخه فجعيئيل د عکران زوی

¹⁴د جاد له قبيلې څخه الياساف د دعوئيل زوی

¹⁵د نفتالي له قبيلې څخه اخيرع د عينان زوی.“

¹⁶دا خلک قبيلوي مشران ؤو چې د اسرائيلو د قوم څخه د دې کار دپاره وټاکل شول.

¹⁷د دې دولسو نفرو په مرسته حضرت موسیٰ او حضرت هارون

¹⁸د دوهمې مياشتې په اوله ورځ ټول قوم راوغوښت. خلکو خپل نومونه طايفه په طايفه او کورنۍ په کورنۍ وليکل او هغه نفر چې عمر يې شل کاله يا زيات ؤ د هر يو نوم په لست کې وليکل شو.

¹⁹څنګه چې څښتن په حضرت موسیٰ باندې امر کړی ؤ، هغوی يې د سينا په دښته کې وشمېرل:

²⁰۲۰‏-۴۶ ټول نفر چې عمر يې شل کاله يا زيات ؤ او جنګ يې کولی شو نومونه يې په لست کې وليکل شول. د هر يو نوم د خپلو طايفو او کورنيو د سوانحو په مطابق وليکل شو او د حضرت يعقوب د مشر زوی روبين د قبيلې څخه شروع وشوه. د روبين د اولادې شمېر: ۴۶۵۰۰ تنه د شمعون د اولادې څخه: ۵۹۳۰۰ تنه د جاد د اولادې څخه: ۴۵۶۵۰ تنه د يهودا د اولادې څخه: ۷۴۶۰۰ تنه د يساکار د اولادې څخه: ۵۴۴۰۰ تنه د زبولون د اولادې څخه: ۵۷۴۰۰ تنه د حضرت يوسف د زامنو څخه: د افرايم د اولادې څخه: ۴۰۵۰۰ تنه د منسي د اولادې څخه: ۳۲۲۰۰ تنه د بنيامين د اولادې څخه: ۳۵۴۰۰ تنه د دان د اولادې څخه: ۶۲۷۰۰ تنه د اشير د اولادې څخه: ۴۱۵۰۰ تنه د نفتالي د اولادې څخه: ۵۳۴۰۰ تنه د هغو نفرو شمېر چې د حضرت موسیٰ، حضرت هارون او د دولسو قبيلو د مشرانو له خوا ليکل شوی ؤ، ټول ۶۰۳۵۵۰ تنه ؤو.

⁴⁷مګر هغه خلک چې د لاوي د قبيلې څخه ؤو په دې کې شامل نه ؤو،

⁴⁸ځکه چې څښتن حضرت موسیٰ ته فرمايلي ؤو:

⁴⁹”کله چې ته د هغو نفرو سرشمېرنه کوې چې جنګ کولی شي، نو د لاوي قبيله په کې مه شاملوه.

⁵⁰د هغې په ځای لاويان د مقدسې خېمې او د هغې د ټول سامان مسئولان وټاکه. هغوی به دا خېمه او د هغې سامان انتقالوي، ساتنه به يې کوي او د هغې په شاوخوا کې به خپلې خېمې ودروي.

⁵¹هرکله چې تاسو خپلې خېمې بل ځای ته وړئ، نو لاويان دې مقدسه خېمه راټوله کړي او په نوي ځای کې دې بيا ودروي. که بل هرڅوک ورته نژدې ورشي وبه وژل شي.

⁵²پاتې اسرائيليان به د خپلو ډلو په اساس خېمې ودروي، هر سړی به د خپل بيرغ لاندې د خپلې ډلې سره وي.

⁵³خو لاويان به خپلې خېمې د مقدسې خېمې په شاوخوا کې ودروي ترڅو د اسرائيلو په قوم باندې زما قهر نازل نشي. لاويان دې د مقدسې خېمې د ساتلو مسئوليت په غاړه واخلي.“

⁵⁴څنګه چې څښتن په حضرت موسیٰ باندې امر کړی ؤ، اسرائيليانو کټ مټ هماغسې وکړل.