Read Pashto (Nangahari) — د پښتو مقدس کتاب شمېر 10 Bible Online

شمېر 10 - Pashto (Nangahari) — د پښتو مقدس کتاب bible

شمېر 10

¹څښتن حضرت موسیٰ ته وفرمايل:

²”د ټکول شويو سپينو زرو څخه دوه سرني جوړ کړه. له هغو څخه به د خلکو د راغونډولو او د کمپ د لېرې کولو دپاره کار اخيستل کيږي.

³کله چې دواړه سرني په اوږد آواز سره ووهل شي، ټول قوم دې د مقدسې خېمې د دروازې په خوله کې تاته راغونډ شي.

⁴که چېرې يو سرنی ووهل شي، يوازې د قبيلو مشران دې درته راغونډ شي.

⁵کله چې هغه په لنډ آواز سره ووهل شي، کومې قبيلې چې په ختيځ کې کمپ لري، هغه به حرکت کوي.

⁶کله چې هغه د دوهم ځل دپاره په لنډ آواز سره ووهل شي، کومې قبيلې چې په جنوب کې دي، هغه به حرکت کوي. نو هغه دې په لنډ آواز سره ووهل شي د دې دپاره چې کمپ ته حرکت ورکړای شي.

⁷مګر د دې دپاره چې ټول خلک راغونډ شي، هغه دې په اوږده آواز سره ووهل شي.

⁸د هارون زامن چې کاهنان دي، سرني دې ووهي. دا قانون بايد د همېش دپاره ستاسو او ستاسو د راتلونکو نسلونو له خوا مراعت شي.

⁹کله چې تاسو په خپله خاوره کې جنګېږئ او د هغو دښمنانو په مقابل کې چې په تاسو باندې يې حمله کړې ده د خپلو ځانونو څخه دفاع کوئ، نو په دې سرنيو باندې د جګړې دپاره اشاره ورکړئ. زه يعنې ستاسو څښتن خدای به ستاسو سره مرسته وکړم او د خپلو دښمنانو څخه به مو وژغورم.

¹⁰همدارنګه د خپلې خوشالۍ په وختونو کې، ستاسو د نوې مياشتې په اخترونو او په نورو اخترونو کې کله چې تاسو سوزېدونکې او د سلامتۍ نذرانې وړاندې کوئ بايد سرني ووهئ. بيا به زه درسره مرسته وکړم. زه ستاسو څښتن خدای يم.“

¹¹د دوهم کال د دوهمې مياشتې په شلمه ورځ يعنې وروسته له دې چې اسرائيليان د مصر څخه راووتل، هغه ورېځ چې په مقدسې خېمې باندې ولاړه وه پورته شوه.

¹²نو اسرائيليان د سينا له دښتې څخه روان شول او د يو ځای څخه يې بل ځای ته سفر کاوه ترڅو چې ورېځ د فاران په دښته کې ودرېدله.

¹³دا اول ځل ؤ چې څښتن حضرت موسیٰ ته وفرمايل چې د اسرائيلو په قوم باندې امر وکړي چې حرکت وکړي.

¹⁴هغه کمپ چې د يهودا قبيلې يې مشري کوله، د خپل بيرغ لاندې د عميناداب د زوی نحشون په مشرۍ اول حرکت وکړ.

¹⁵نتنائيل د صوغر زوی د يساکار د قبيلې مشر ؤ

¹⁶او الياب د حيلون زوی د زبولون د قبيلې مشر ؤ.

¹⁷بيا مقدسه خېمه راټوله کړای شوه او جرشونيانو او مراريانو چې هغه يې وړله، حرکت وکړ.

¹⁸ورپسې هغه کمپ چې د روبين قبيلې يې مشري کوله، د خپل بيرغ لاندې د شديئور د زوی اليصور په مشرۍ حرکت وکړ.

¹⁹شلوميئيل د صوريشدای زوی د شمعون د قبيلې مشر ؤ

²⁰او الياساف د دعوئيل زوی د جاد د قبيلې مشر ؤ.

²¹د هغوی پسې قهاتيانو چې د لاويانو د طايفو څخه ؤو حرکت وکړ او مقدس شيان يې وړل. کله چې هغوی بل کمپ ته ورسېدل، خېمه ودرول شوې وه.

²²ورپسې هغه کمپ چې د افرايم قبيلې يې مشري کوله، د خپل بيرغ لاندې د عميهود د زوی اليشمع په مشرۍ حرکت وکړ.

²³جمليئيل د فدهصور زوی د منسي د قبيلې مشر ؤ

²⁴او ابيدان د جدعوني زوی د بنيامين د قبيلې مشر ؤ.

²⁵په آخره کې هغه کمپ چې د دان قبيلې يې مشري کوله او د شا له خوا حملې په مقابل کې به يې د اسرائيليانو ساتنه کوله د خپل بيرغ لاندې د عميشدای د زوی اخيعزر په مشرۍ حرکت وکړ.

²⁶فجعيئيل د عکران زوی د اشير د قبيلې مشر ؤ

²⁷او اخيرع د عينان زوی د نفتالي د قبيلې مشر ؤ.

²⁸په دې ترتيب هرځل چې هغوی خپل کمپ د يو ځای څخه بل ځای ته وړه نو د اسرائيلو خلکو به حرکت کاوه.

²⁹حضرت موسیٰ خپل د ښځې ورور حوباب ته چې د مدياني يترون زوی ؤ، وفرمايل: ”مونږ هغه ځای ته روان يو چې څښتن فرمايلي دي چې هغه مونږ ته راکوي. هغه زمونږ سره دا وعده کړې ده چې اسرائيليان به خوشبخته کړي. نو زمونږ سره راشه او مونږ به دا خوشبختي ستاسو سره شريکه کړو.“

³⁰حوباب په ځواب کې وويل: ”نه، زه نه ځم، زه بېرته خپل وطن او خپلو خلکو ته ځم.“

³¹حضرت موسیٰ ورته وفرمايل: ”مهرباني وکړه زمونږ سره لاړ شه! ته به زمونږ لارښودونکی اوسې، ځکه چې په دښته کې د خېمو د ودرولو ځايونه پېژنې.

³²که چېرې ته زمونږ سره لاړ شې، مونږ به درته د هغو ښو شيانو برخه درکړو چې څښتن يې مونږ ته راکوي.“

³³نو د اسرائيلو قوم د سينا يعنې د مقدس غره څخه روان شو او هغوی درې ورځې سفر وکړ. د څښتن د لوظ صندوق همېشه د هغوی په مخ کې روان ؤ ترڅو د هغوی دپاره ځای پيدا کړي چې خېمې په کې ودروي.

³⁴څنګه به چې هغوی د هر کمپ څخه حرکت کاوه، د څښتن ورېځ به د ورځې له خوا د هغوی په سر باندې ولاړه وه.

³⁵هرکله به چې د لوظ صندوق روان شو، حضرت موسیٰ به ويل: ”ای څښتنه، خپل دښمنان دې خپاره واره کړه او هغوی چې ستا څخه کرکه کوي په تېښته مجبور کړه!“

³⁶او چې کله به د لوظ صندوق ودرېد، حضرت موسیٰ به داسې دعا کوله: ”ای څښتنه، د اسرائيلو د زرګونو، زرګونو خلکو سره نژدې اوسه.“