Read Pashto (Nangahari) — د پښتو مقدس کتاب شمېر 12 Bible Online

شمېر 12 - Pashto (Nangahari) — د پښتو مقدس کتاب bible

شمېر 12

¹حضرت موسیٰ د يوې ايتوپيايۍ ښځې سره واده کړی ؤ او مريم او حضرت هارون په هغه باندې د دې کار په خاطر انتقاد وکړ.

²هغوی وويل: ”آيا څښتن يوازې د موسیٰ په وسيله خبرې کړې دي؟ آيا هغه زمونږ په وسيله خبرې نه دي کړې؟“ څه چې هغوی وويل څښتن هغه واورېدل.

³(حضرت موسیٰ د ځمکې پر مخ ترټولو عاجز سړی ؤ.)

⁴څښتن سمدستي حضرت موسیٰ، حضرت هارون او مريم ته وفرمايل: ”زه غواړم چې تاسو درې واړه مقدسې خېمې ته راشئ.“ نو هغوی ورغلل.

⁵څښتن په ورېځ کې راکوز شو، د خېمې د دروازې په خوله کې ودرېد او غږ يې وکړ: ”ای هارونه! ای مريمې!“ هغوی دواړه رامخکې شول

⁶او څښتن وفرمايل: ”اوس زما خبرې ته غوږ ونيسئ! زه خپل ځان نبيانو ته په روياګانو کې ښکاره کوم او د هغوی سره په خوبونو کې خبرې کوم.

⁷خو کله چې د خپل خدمتګار موسیٰ سره خبرې کوم هغه د نورو سره فرق لري. هغه مې د خپل ټول قوم مشر ټاکلی دی.

⁸نو زه د هغه سره مخامخ او صفا خبرې کوم، نه په رموز سره، حتیٰ هغه زما څېره هم ويني! تاسو څنګه جرأت کوئ چې زما د خدمتګار موسیٰ په ضد خبرې وکړئ؟“

⁹څښتن په حضرت هارون او مريم باندې په قهر شو. د څښتن د تګ

¹⁰او د مقدسې خېمې د سر څخه د ورېځې د لېرې کېدو څخه وروسته مريم په جذام باندې اخته شوه او پوستکی يې لکه د واورې په شان سپين واوښت. کله چې حضرت هارون هغې ته وکتل نو ويې ليدل چې هغه په جذام باندې اخته شوه،

¹¹نو حضرت موسیٰ ته يې وفرمايل: ”زما باداره، مونږ ته د داسې ګناه په خاطر چې په بې عقلۍ سره مو کړې ده سزا مه راکوه.

¹²مه پرېږده چې د مريم غوښه د يو مړه زېږېدلي ماشوم په شان خوسا شي!“

¹³نو حضرت موسیٰ څښتن ته فرياد وکړ: ”ای خدايه، هغه روغه کړه!“

¹⁴مګر څښتن په ځواب کې وفرمايل: ”که چېرې پلار يې د هغې په مخ باندې لياړې توکړې وای هغه به اوه ورځې خجالت نه وای؟ نو پرېږده چې يوه هفته د کمپ څخه دباندې ايساره وي او له هغې وروسته کېدای شي چې کمپ ته راوستل شي.“

¹⁵مريم اوه ورځې د کمپ څخه دباندې ايساره پاتې شوه او قوم تر هغه وخته پورې حرکت ونه کړ ترڅو هغه بېرته کمپ ته راوستل شوه.

¹⁶بيا هغوی د حضيروت څخه لاړل او د فاران په دښته کې يې خېمې ودرولې.