Read Pashto (Nangahari) — د پښتو مقدس کتاب شمېر 13 Bible Online

شمېر 13 - Pashto (Nangahari) — د پښتو مقدس کتاب bible

شمېر 13

¹څښتن حضرت موسیٰ ته وفرمايل:

²”د هرې قبيلې څخه يو يو مشر انتخاب کړه او کنعان ته يې د جاسوسانو په توګه ولېږه چې هغه وطن وګوري چې زه يې اسرائيليانو ته ورکوم.“

³نو حضرت موسیٰ د څښتن د حکم سره سم د فاران له دښتې څخه دولس قبيلوي مشران ولېږل

⁴۴‏-۱۶ او حکم يې ورکړ چې د کنعان ځمکه وګوري. د هغوی نومونه دا دي: د روبين له قبيلې څخه د زکور زوی شموع د شمعون له قبيلې څخه د حوري زوی شافاط د يهودا له قبيلې څخه د يفنه زوی کاليب د يساکار له قبيلې څخه د يوسف زوی يجال د افرايم له قبيلې څخه د نون زوی هوشع (حضرت موسیٰ په هغه باندې يوشع نوم کېښود.) د بنيامين له قبيلې څخه د رافو زوی فلطي د زبولون له قبيلې څخه د سودي زوی جديئيل د منسي له قبيلې څخه د سوسي زوی جدي د دان له قبيلې څخه د جملي زوی عميئيل د اشير له قبيلې څخه د ميکائيل زوی ستور د نفتالي له قبيلې څخه د وفسي زوی نحبي او د جاد له قبيلې څخه د ماکي زوی جاوئيل.

¹⁷مخکې له دې چې حضرت موسیٰ هغوی کنعان ته ولېږي، داسې يې ورته وفرمايل: ”کله چې د کنعان د جنوبي دښتې څخه تېر شوئ، غرنۍ سيمې ته چې په شمال کې ده لاړ شئ.

¹⁸دا معلومه کړئ چې هغه هېواد څه ډول دی، په هغه ځای کې څومره خلک اوسيږي او هغوی څومره قوي دي.

¹⁹هغه ځمکه ښه ده يا خرابه او آيا خلک په بې دېواله ښارونو کې اوسيږي يا په دېوال لرونکو ښارونو کې؟

²⁰خاوره يې حاصلخېزه ده او يا ځمکه يې ځنګلي ده؟ د هغو مېوو څخه چې هلته پيدا کيږي لږه خامخا د ځان سره راوړئ.“ (دا د اولنيو پخو شويو انګورو موسم ؤ.)

²¹نو نفر د شمال خواته لاړل او هغه ځمکه يې د صين د دښتې څخه چې په جنوب کې وه تر رحوب پورې چې په شمال کې د حمات غاښي ته نژدې وه، وکتله.

²²هغوی اول د هغه وطن جنوبي برخې ته لاړل او حبرون ته ورغلل. هلته د اخيمان، شيشای او تلمای طايفې اوسېدلې، دا د عناقيانو د قوم اولاده وه، چې ډېر لوړ قدونه يې درلودل. (حبرون اوه کاله مخکې د صوعن څخه چې په مصر کې ؤ جوړ شوی ؤ.)

²³هغوی د اشکول درې ته ورغلل او هلته يې يوه څانګه پرې کړه چې د انګورو يو وږی په کې ؤ او دومره درنده وه چې دوه تنو هغه د يوې ميلې په وسيله انتقال کړه. هغوی لږ انار او انځر هم راوړل.

²⁴(د انګورو د وږي له کبله چې اسرائيليانو هلته پرې کړ، هغه ځای د اشکول * د درې په نوم ياد شو.)

²⁵د کنعان د خاورې د کتلو څخه وروسته چې څلوېښت ورځې يې دوام وموند،

²⁶هغه دولس نفره قادش ته چې د فاران په دښته کې ؤ راستانه شول او څه يې چې ليدلي ؤو، حضرت موسیٰ، حضرت هارون او د اسرائيلو ټول قوم ته وويل او هغه مېوه چې هغوی راوړې وه هغوی ته يې وروښودله.

²⁷هغوی حضرت موسیٰ ته وويل: ”مونږ هغه ځمکه وکتله او معلومه شوه چې هغه غني او حاصلخېزه ده او دا د هغې ځمکې لږه مېوه ده.

²⁸مګر د هغه ځای خلک قوي او ښارونه يې ډېر لوی او دېوال لرونکي دي. برسېره پردې، مونږ هلته د عناقيانو اولاده هم وليدله.

²⁹عماليقيان په جنوبي دښته کې اوسيږي، حيتيان، يبوسيان او اموريان په غرنۍ سيمه کې دي او کنعانيان د مديترانې د بحيرې او د اردن د سيند په غاړه اوسيږي.“

³⁰کاليب هغه خلک غلي کړل چې د حضرت موسیٰ په ضد يې شکايتونه کول او ويې ويل: ”راځئ چې اوس لاړ شو او دا ځمکه ونيسو. زه پوهېږم چې مونږ دا کار کولی شو!“

³¹مګر هغو نفرو چې د کاليب سره تللي ؤو وويل: ”نه، مونږ دومره قوي نه يو چې په هغوی باندې حمله وکړو، د هغه ځای خلک زمونږ څخه ډېر قوي دي.“

³²نو هغوی د هغې ځمکې په باره کې چې هغوی کتلې وه د اسرائيليانو په منځ کې غلط خبر خپور کړ. هغوی وويل: ”هغه ځمکه دومره حاصل هم نه ورکوي چې د هغه ځای د خلکو د مړولو دپاره کفايت وکړي. هرڅوک چې مونږ ليده ډېر لوړ قد يې درلود،

³³حتیٰ مونږ په هغه ځای کې د عناقيانو اولاده وليدله. هغوی دومره قوي ؤو او لوړ قدونه يې درلودل چې مونږ ته خپل ځانونه داسې کوچني ښکاره شول لکه د ملخانو په شان او هغوی ته هم همداسې ښکاره کېدو.“