Read Pashto (Nangahari) — د پښتو مقدس کتاب شمېر 15 Bible Online

شمېر 15 - Pashto (Nangahari) — د پښتو مقدس کتاب bible

شمېر 15

¹څښتن حضرت موسیٰ ته وفرمايل:

²”د اسرائيلو قوم ته دا مقررات ورکړه چې هغوی يې په هغې خاوره کې چې زه يې ورته ورکوم مراعت کړي:

³تاسو کولی شئ چې د رمې يا پادې څخه يو حيوان د سوزېدونکې نذرانې يا د نذر د قربانۍ يا د رضاکارانه نذرانې يا ستاسو د مذهبي اخترونو د نذرانو په توګه څښتن ته وړاندې کړئ. د دغو نذرانو بوی په څښتن باندې ښه لګيږي.

⁴۴‏-۵ هرڅوک چې يو وری يا سېرلی د سوزېدونکې نذرانې په توګه څښتن ته وړاندې کوي، هغه دې د هر حيوان سره يو کيلوګرام داسې ښه اوړه چې يو ليتر د زيتونو تېل ورسره ګډ وي د غلې دانې د نذرانې په توګه او يو ليتر د انګورو شربت دې هم د څښلو د نذرانې په توګه راوړي.

⁶کله چې يو پسه وړاندې کيږي، دوه کيلوګرامه داسې اوړه چې يونيم ليتر د زيتونو تېل ورسره ګډ وي د غلې دانې د نذرانې په توګه دې وړاندې شي.

⁷يونيم ليتر د انګورو شربت دې هم د څښلو د نذرانې په توګه ورسره وي. د دغو قربانيو بوی په څښتن باندې ښه لګيږي.

⁸کله چې يو غويی څښتن ته د سوزېدونکې نذرانې يا د نذر د قربانۍ يا د سلامتۍ د نذرانې په توګه وړاندې کيږي،

⁹د غلې دانې نذرانه دې د درې کيلوګرامو داسې اوړو سره وړاندې شي چې دوه ليتره د زيتونو تېل ورسره ګډ وي.

¹⁰دوه ليتره د انګورو شربت دې هم د څښلو د نذرانې په توګه ورسره وي. د دې نذرانې بوی په څښتن باندې ښه لګيږي.

¹¹۱۱‏-۱۳ که چېرې څوک اصلي اسرائيلی وي نو هر وخت چې غويی، پسه، مېږه يا وزه په اور باندې د تيارې شوې نذرانې په توګه چې بوی يې په څښتن باندې ښه لګيږي وړاندې کوي نو په دې اصولو باندې بايد عمل وکړي.

¹⁴همدارنګه هغه بېګانه خلک چې ستاسو په منځ کې اوسيږي، که هغوی د موقت وخت دپاره وي يا دايمي وي هم بايد د دغو مقرراتو څخه پيروي وکړي.

¹⁵۱۵‏-۱۶ همدغه اصول د تل دپاره په تاسو او هغو بېګانه خلکو باندې چې ستاسو په منځ کې اوسيږي عملي کيږي. د څښتن په نظر کې تاسو او هغوی يوشان يئ.

¹⁷۱۷‏-۱۹ کله چې تاسو په هغه ځمکه کې چې زه يې درکوم خواړه خورئ، دا خبره په ياد ساتئ چې د هغو څه لږ څښتن ته د خاصې نذرانې په توګه بېل کړئ.

²⁰کله چې تاسو ډوډۍ پخوئ نو اولنۍ ډوډۍ چې د نوې غلې دانې څخه پخيږي هغه دې څښتن ته د خاصې نذرانې په توګه وړاندې شي. دا دې په هماغه ډول وړاندې شي لکه څنګه چې د غوبل شويو غلو دانو څخه تياره شوې خاصه نذرانه وړاندې کيږي.

²¹دا خاص سوغات دې د تل دپاره د هغې ډوډۍ څخه څښتن ته ورکول کيږي چې تاسو يې پخوئ.

²²مګر فرض کوو که چېرې يو څوک په غير ارادي توګه د دغو مقرراتو څخه د ځينو په عملي کولو کې چې څښتن موسیٰ ته ورکړي دي غفلت وکړي.

²³او فرض کوو چې په راتلونکي کې د هغو ټولو شيانو په سرته رسولو کې چې څښتن د موسیٰ په وسيله د هغو حکم کړی دی قوم غفلت وکړي.

²⁴که چېرې دا کار په غير ارادي توګه په ناخبرۍ سره د قوم له خوا وشي، نو بايد ټول قوم يو غويی د سوزېدونکې نذرانې دپاره چې بوی يې په څښتن باندې ښه لګيږي وړاندې کړي. دا نذرانه دې د پورته يادې شوې غلې دانې د نذرانې او څښلو د نذرانې سره يوځای او د يو وز سره چې د ګناه د نذرانې په توګه وړاندې کيږي وړاندې شي.

²⁵کاهن به د اسرائيلو د ټول قوم دپاره کفاره ادا کړي او هغوی به وبخښل شي، ځکه چې دا کار په قصدي توګه نه ؤ شوی او هغوی څښتن ته د خپلې غلطۍ دپاره يوه داسې نذرانه چې په اور باندې تياريږي او د ګناه يوه نذرانه راوړله.

²⁶د اسرائيلو ټول قوم او هغه بېګانه خلک به چې د هغوی په منځ کې اوسيږي وبخښل شي، ځکه چې ټول په دې غلطۍ کې شامل ؤو.

²⁷مګر که چېرې ستاسو څخه يو تن په غير ارادي توګه ګناه وکړي، بايد يوه يو کلنه وزه د ګناه د نذرانې په توګه قرباني کړي.

²⁸کاهن دې د څښتن په حضور کې د هغه چا دپاره چې په غير ارادي توګه يې ګناه کړې ده کفاره ادا کړي، نو هغه به وبخښل شي.

²⁹همدا قانون به په هغو ټولو خلکو باندې عملي کيږي چې په غير ارادي توګه يې ګناه کړې وي، که هغوی اصلي اسرائيليان وي يا بېګانه اوسېدونکي وي.

³⁰مګر که چېرې ستاسو څخه څوک په قصدي توګه ګناه وکړي، که هغه اصلي اوسېدونکی وي يا بېګانه وي، هغه څښتن ته په سپکاوي کولو سره ګناهکار دی او بايد ووژل شي.

³¹ځکه څه چې څښتن فرمايلي دي هغه نه دي منلي او په قصدي توګه يې د هغه يو حکم مات کړی دی. نو خون به يې په خپله غاړه وي.“

³²يو ځل کله چې اسرائيليانو په دښته کې سفر کاوه، د سبت په ورځ يو سړی د لرګيو په راټولولو ونيول شو.

³³هغه حضرت موسیٰ، حضرت هارون او ټول قوم ته وروستل شو

³⁴او هغه يې تر څارنې لاندې وساته، ځکه دا معلومه نه وه چې د هغه سره به څه کيږي.

³⁵بيا څښتن حضرت موسیٰ ته وفرمايل: ”هغه سړی بايد ووژل شي، ټول قوم دې هغه د کمپ څخه بيرون سنګسار کړي چې مړ شي!“

³⁶نو لکه څنګه چې څښتن امر کړی ؤ، ټول قوم هغه د کمپ څخه بيرون وويست او سنګسار يې کړ.

³⁷څښتن حضرت موسیٰ ته وفرمايل:

³⁸”د اسرائيلو قوم ته ووايه: د خپلو کاليو په څنډو پورې زونډي وګنډئ او په هر زونډي پورې يو يو آبي تار وتړئ. دا کار بايد د تل دپاره وکړئ.

³⁹۳۹‏-۴۰ دا زونډي به تاسو ته دا خبره در په ياده کړي چې تاسو بايد زما د قوانينو او زده کړو څخه پيروي وکړئ. کله چې تاسو داسې وکړئ، نو ماته به وقف کړای شئ او د خپلو له ګناه څخه ډکو خواهشاتو پسې به نه ګرځئ.

⁴¹زه ستاسو څښتن خدای يم چې تاسو مې له مصر څخه راوويستلئ چې ستاسو خدای اوسم.“