Read Pashto (Nangahari) — د پښتو مقدس کتاب شمېر 16 Bible Online

شمېر 16 - Pashto (Nangahari) — د پښتو مقدس کتاب bible

شمېر 16

¹۱‏-۲ د يصهار زوی قورح چې د لاوي د زوی قهات اولاده وه د حضرت موسیٰ د مشرۍ په ضد سرکشي وکړه. هغه د روبين د قبيلې د دريو غړو يعنې د الياب د زامنو داتان او ابيرام او اون د فالت زوی او د نورو دوه سوه پنځوسو مشهورو اسرائيلي مشرانو سره چې د قوم له خوا ټاکل شوي ؤو يوځای شو.

³هغوی حضرت موسیٰ او حضرت هارون ته ورغلل او ويې ويل: ”تاسو ولې داسې فکر کوئ چې د نورو څخه بهتر يئ؟ د قوم ټول غړي د څښتن مقدس خلک دي او څښتن زمونږ ټولو سره مل دی. نو موسیٰ، بيا ولې خپل ځان د څښتن د قوم څخه لوړ ګڼې؟“

⁴کله چې حضرت موسیٰ دا خبرې واورېدلې، په ځمکه باندې پړمخې پرېوت.

⁵بيا هغه قورح او د هغه پيروانو ته داسې وفرمايل: ”سبا سهار به څښتن مونږ ته هغه نفر راوښايي چې د خپل کاهن په توګه يې انتخاب کړی دی او هغه نفر به پرېږدي چې نژدې ورشي.

⁶۶‏-۷ قورح، اوس بايد ته او ستا پيروان داسې کار وکړئ: يو څو د اور لوښي راپيدا کړئ، د سکرو او خوشبويۍ څخه يې ډک کړئ او مقدسې خېمې ته يې نژدې راوړئ. بيا به وګورو چې څښتن زمونږ څخه څوک انتخاب کړی دی. قورح، دا ځل تاسو لاويانو له خپل حد څخه تېری کړی دی!“

⁷

⁸حضرت موسیٰ د قورح سره خپلو خبرو ته دوام ورکړ: ”ای لاويانو، واورئ!

⁹تاسو فکر کوئ چې دا وړه خبره ده چې د اسرائيلو خدای تاسو د خپل قوم څخه انتخاب کړي يئ د دې دپاره چې هغه ته ورنژدې شئ، په مقدسه خېمه کې خپل کار وکړئ او د قوم خدمت وکړئ؟

¹⁰څښتن تاسو ته يو ځانګړی مسئوليت در په غاړه کړی دی او اوس فکر کوئ چې تاسو به هم کاهنان شئ.

¹¹تا او ستا پيروانو د څښتن په مقابل کې سرکشي کړې ده، د حضرت هارون په مقابل کې مو نه ده کړې.“

¹²بيا حضرت موسیٰ داتان او ابيرام راوغوښتل، مګر هغوی بېرته دا پيغام ورولېږه: ”مونږ نه راځو!

¹³آيا دا کافي نه ده چې مونږ دې د مصر د حاصلخېزې ځمکې څخه راوستلو چې دلته په دښته کې مو ووژنې؟ اوس ته غواړې چې په مونږ باندې خپل ځان بادار کړې؟

¹⁴بله دا چې تا مونږ حاصلخېزې ځمکې ته رانه وستلو او نه دې مونږ ته هغه ځمکه د خپل ملکيت په توګه راکړه چې پټي او د انګورو باغونه په کې دي او اوس هڅه کوې چې مونږ وغولوې. مونږ به رانشو.“

¹⁵حضرت موسیٰ ډېر په قهر شو او څښتن ته يې وفرمايل: ”د هغوی نذرانې مه قبلوه! ما د هغوی سره هيڅ غلطي نه ده کړې. حتیٰ د هغوی څخه مې يو خر هم نه دی اخيستی.“

¹⁶بيا حضرت موسیٰ قورح ته وفرمايل: ”سبا ته او ستا دوه سوه پنځوس تنه پيروان بايد د حضرت هارون سره د څښتن حضور ته مقدسې خېمې ته لاړ شئ.

¹⁷تاسو هر يو د ځان سره خپل د اور لوښی چې خوشبويي په کې وي يوسئ او څښتن ته خوشبويي وړاندې کړئ.“

¹⁸نو بله ورځ هغوی هر يو خپل د اور لوښی واخيست او بل شوي سکاره او خوشبويي يې په کې واچول او د حضرت موسیٰ او حضرت هارون سره د مقدسې خېمې د دروازې په خوله کې ودرېدل.

¹⁹بيا قورح ټول قوم راغونډ کړ او هغوی حضرت موسیٰ او حضرت هارون ته مخامخ د مقدسې خېمې د دروازې په خوله کې ودرېدل. يوناڅاپه د څښتن جلال ټول قوم ته ښکاره شو

²⁰او څښتن حضرت موسیٰ او حضرت هارون ته وفرمايل:

²¹”د دې خلکو څخه لېرې شئ، زه به همدا اوس هغوی ووژنم!“

²²مګر حضرت موسیٰ او حضرت هارون په ځمکه باندې پړمخې پرېوتل او داسې دعا يې وکړه: ”زمونږ خدايه، تا دغو خلکو ته ژوند ورکړ. ولې د يو سړي د ګناه په خاطر ټول قوم ته سزا ورکوې؟“

²³څښتن حضرت موسیٰ ته وفرمايل:

²⁴”خلکو ته ووايه چې د قورح، داتان او ابيرام د خېمو څخه لېرې شي.“

²⁵حضرت موسیٰ داتان او ابيرام ته ورغی او د اسرائيلو نور مشران ورپسې شول.

²⁶بيا حضرت موسیٰ قوم ته داسې خبرداری ورکړ: ”د دغو بدکارو خلکو د خېمو څخه لېرې شئ! د هغوی شيانو ته لاس مه وروړئ. که نه، نو د هغوی د ګناهونو له کبله به تاسو هم له منځه لاړ شئ.“

²⁷نو هغوی د قورح، داتان او ابيرام له خېمو څخه لېرې شول. داتان او ابيرام راوتلي ؤو او د خپلو ښځو او ماشومانو سره د خپلو خېمو په دروازو کې ولاړ ؤو.

²⁸حضرت موسیٰ قوم ته وفرمايل: ”تاسو به په دې پوه شئ چې څښتن زه رالېږلی يم چې دا ټول کارونه وکړم، دا کارونه مې په خپله خوښه نه دي کړي.

²⁹که چېرې دا خلک د خدای پاک له سزا څخه پرته په خپل مرګ مړه شي، د دې معنیٰ به دا وي چې څښتن زه نه يم رالېږلی.

³⁰مګر فرض کړئ څښتن داسې کار وکړي چې پخوا هيڅکله نه وي شوی. که چېرې ځمکه پرانيستل شي او هغوی د خپلو ټولو شيانو سره ژوندي تېر کړي ترڅو هغوی ژوندي په ځمکه کې ښخ شي، بيا به تاسو پوه شئ چې هغوی د څښتن څخه مخ اړولی دی!“

³¹څنګه چې د حضرت موسیٰ خبرې خلاصې شوې، د داتان او ابيرام د پښو لاندې ځمکه سره جدا شوه

³²او هغوی او د هغوی کورنۍ يې د قورح د ټولو پيروانو او د هغوی د مالونو سره ژوندي تېر کړل.

³³نو هغوی د خپلو مالونو سره ژوندي په ځمکه ننوتل. ځمکه بېرته په هغوی باندې بنده شوه او هغوی له سترګو څخه پناه شول.

³⁴کله چې د اسرائيلو ټولو خلکو چې په هغه ځای کې ؤو د هغوی فريادونه واورېدل، نو وتښتېدل. هغوی چيغې ووهلې: ”تښتئ، کېدای شي چې ځمکه مونږ هم ژوندي تېر کړي!“

³⁵بيا څښتن اور نازل کړ او هغه دوه سوه پنځوس نفره يې چې څښتن ته يې خوشبويي وړاندې کړې وه، وسوزول.

³⁶بيا څښتن حضرت موسیٰ ته وفرمايل:

³⁷”د هارون زوی العازار ته ووايه چې د سوزېدل شويو خلکو څخه د اور لوښي لېرې کړي او سکاره دې په يو لېرې ځای کې وشيندي. دا لوښي مقدس دي،

³⁸ځکه چې ماته د خوشبويۍ د وړاندې کولو دپاره ورڅخه کار اخيستل شوی ؤ. هغه په چا باندې په څټک وټکوه چې د قربانګاه دپاره نری پوښ ورڅخه جوړ شي. هغه خلک د خپلې ګناه له کبله مړه شول او اوس به د هغوی د اور لوښي د پاتې خلکو دپاره يو خبرداری وي.“

³⁹۳۹‏-۴۰ لکه څنګه چې څښتن العازار کاهن ته د حضرت موسیٰ په وسيله فرمايلي ؤو هغه لوښي راټول کړل او په يو چا باندې يې په څټک وټکول او د قربانګاه دپاره يې ورڅخه نری پوښ جوړ کړ. دا لوښي د اسرائيليانو دپاره يو خبرداری ؤ چې يوازې کاهنان يعنې د هارون اولاده به اجازه لري چې څښتن ته خوشبويي وړاندې کړي. که چېرې بل څوک دا هڅه وکړي، د قورح او د هغه د پيروانو په شان به ورته سزا ورکړل شي.

⁴⁰

⁴¹په راتلونکې ورځ د اسرائيلو قوم د حضرت موسیٰ او حضرت هارون په ضد شکايت وکړ او ويې ويل: ”تاسو د څښتن خلک ووژل!“

⁴²کله چې هغوی ټول راغونډ شول چې د حضرت موسیٰ او حضرت هارون په ضد احتجاج وکړي، حضرت موسیٰ او حضرت هارون د مقدسې خېمې په لور مخ واړاوه او ويې ليدل چې خېمه ناڅاپه په ورېځ کې پټه شوه او د څښتن جلال ښکاره شو.

⁴³نو حضرت موسیٰ او حضرت هارون د خېمې مخې ته ورغلل

⁴⁴او هلته څښتن حضرت موسیٰ ته وفرمايل:

⁴⁵”شاته شئ! زه دا اسرائيليان دلته ځای په ځای له منځه وړم.“ هغوی دواړه په ځمکه باندې پړمخې پرېوتل.

⁴⁶بيا حضرت موسیٰ هارون ته وفرمايل: ”خپل د اور لوښی راواخله او په هغه کې د قربانګاه څخه سره سکاره واچوه او په سکارو باندې لږه خوشبويي واچوه. بيا د هغه سره سمدستي خلکو ته ورشه او د هغوی دپاره کفاره ادا کړه. ژر شه! ځکه چې څښتن ډېر په قهر دی او وبا لا د مخکې څخه شروع شوې ده!“

⁴⁷نو څنګه چې حضرت موسیٰ فرمايلي ؤو حضرت هارون هماغسې وکړل او د خلکو منځ ته يې ورمنډه کړه. وبا لا مخکې په خلکو کې شروع شوې وه، خو حضرت هارون خوشبويي وړاندې کړه او د هغوی دپاره يې کفاره ادا کړه.

⁴⁸هغه د مړو او ژونديو ترمنځ ودرېد او وبا بنده شوه.

⁴⁹مګر ۱۴۷۰۰ تنه اسرائيليان مړه شوي ؤو، پرته له هغو خلکو څخه چې د قورح او د هغه د پيروانو سره مړه شوي ؤو.

⁵⁰کله چې وبا ودرېدله، حضرت هارون بېرته د مقدسې خېمې دروازې ته حضرت موسیٰ ته ورستون شو.