Read Pashto (Nangahari) — د پښتو مقدس کتاب شمېر 17 Bible Online

شمېر 17 - Pashto (Nangahari) — د پښتو مقدس کتاب bible

شمېر 17

¹څښتن حضرت موسیٰ ته وفرمايل:

²”د اسرائيلو خلکو ته ووايه چې دولس امساګانې درکړي يعنې د هرې قبيلې د مشر څخه يوه يوه دانه. د هر سړي نوم د هغه په امسا باندې وليکه

³او بيا د هارون نوم د لاويانو په امسا باندې وليکه. د هر قبيلوي مشر دپاره دې يوه يوه امسا وي.

⁴دا امساګانې په مقدسه خېمه کې د لوظ د صندوق په مخ کې چېرته چې زه تاسو سره ملاقات کوم کېږده.

⁵بيا به د هغه نفر امسا غوټۍ ونيسي چې زه يې انتخابوم. په دې ډول به ستاسو په ضد د دغو اسرائيليانو پرله پسې شکايتونو ته د پای ټکی کېږدم.“

⁶حضرت موسیٰ د اسرائيليانو سره خبرې وکړې او د هغوی هر يو مشر حضرت موسیٰ ته امسا ورکړه، يعنې د هرې قبيلې څخه يوه يوه دانه چې ټولې دولس وې او د حضرت هارون امسا هم په کې شامله وه.

⁷بيا حضرت موسیٰ ټولې امساګانې په خېمه کې د څښتن د لوظ د صندوق مخې ته کېښودلې.

⁸په سبا ورځ کله چې حضرت موسیٰ خېمې ته ورننوت، هغه وليدل چې د حضرت هارون امسا چې د لاوي د قبيلې نماينده ګي يې کوله تېغ وهلی. هغې غوټۍ کړې وې، ګلان يې نيولي ؤو او بادام يې کړي ؤو!

⁹حضرت موسیٰ هغه دولس امساګانې له خېمې څخه راوويستلې او خلکو ته يې ورښکاره کړې. هر مشر خپله امسا راپيدا کړه او هغه يې واخيسته.

¹⁰مګر څښتن حضرت موسیٰ ته وفرمايل: ”د هارون امسا بېرته د لوظ صندوق ته مخامخ کېږده! پرېږده چې هغه هلته پاتې وي او د هغه چا دپاره چې د سرکشۍ کولو په باره کې فکر کوي د خبرداري په توګه وي. که چېرې دا خلک زما په هکله شکايت بس نه کړي نو زه به يې له منځه يوسم.“

¹¹لکه څنګه چې څښتن امر کړی ؤ، حضرت موسیٰ هماغسې وکړل.

¹²اسرائيليانو حضرت موسیٰ ته فرياد وکړ او ويې ويل: ”مونږ مړه کېږو! زمونږ دپاره کوم اميد نشته، مونږ ټول له منځه ځو!

¹³حتیٰ هرڅوک چې مقدسې خېمې ته ورنژدې شي هغه به مړ شي. نو مونږ ټول به مړه شو!“