Read Pashto (Nangahari) — د پښتو مقدس کتاب شمېر 18 Bible Online

شمېر 18 - Pashto (Nangahari) — د پښتو مقدس کتاب bible

شمېر 18

¹څښتن حضرت هارون ته داسې وفرمايل: ”هرڅه چې په مقدسه خېمه کې پېښيږي ته، ستا زامن او نور لاويان د هغو په مقابل کې مسئوليت لرئ خو څه چې کاهنان کوي د هغه په مقابل کې ته او ستا زامن مسئوليت لرئ.

²خپل خپلوان يعنې لاويان راوله چې ستا سره کار وکړي او ستا او ستا د زامنو سره د خېمې په کار کې مرسته وکړي.

³هغوی به تاته مسئول وي او د مقدسې خېمې ټولې وظيفې به ترسره کوي، خو هغوی بايد د قربانۍ ځای يا هغو پاکو شيانو ته چې په مقدس ځای کې دي نژدې ورنشي. که چېرې دا کار وکړي هغوی او تاسو دواړه به ووژل شئ.

⁴هغوی بايد ستاسو سره کار وکړي او د خېمې د ټولو کارونو په اړه دې خپل مسئوليت ترسره کړي، مګر بل هيڅوک نشي کولی چې تاسو سره کار وکړي.

⁵يوازې ته او ستا زامن بايد د مقدس ځای او د قربانۍ د ځای دپاره وظيفې اجرا کړئ، ترڅو زما قهر بيا د اسرائيلو په قوم باندې نازل نشي.

⁶دا زه يم چې ستاسو خپلوان لاويان مې تاسو ته د مرستيالانو په توګه د اسرائيليانو څخه انتخاب کړي دي. هغوی ماته وقف شوي دي، ترڅو وکولی شي چې په مقدسه خېمه کې خپلې وظيفې سرته ورسوي.

⁷مګر يوازې ته او ستا زامن کولی شئ چې د قربانۍ په ځای او ډېر مقدس ځای کې د کاهنانو په توګه خدمت وکړئ. د کاهنانو په توګه ستاسو کار زما له خوا تاسو ته يو سوغات دی او که بل څوک هڅه وکړي چې دا کار وکړي، هغه بايد ووژل شي.“

⁸څښتن حضرت هارون ته وفرمايل: ”دا په ياد وساته چې زه تاته هغه نذرانې درکوم، يعنې هغه ټولې خاصې نذرانې چې اسرائيليان يې ماته راکوي او د قربانيو په توګه نه سوزول کيږي. زه هغه تا او ستا اولادې ته د هغې برخې په توګه درکوم چې تل ترتله به درکول کيږي.

⁹د ډېرو مقدسو نذرانو څخه چې په قربانګاه باندې نه سوزول کيږي، دا لاندينۍ نذرانې ستاسو دي: د غلې دانې نذرانې، د ګناه نذرانې او د تاوان نذرانې. هرڅه چې ماته د يوې مقدسې نذرانې په توګه وړاندې کيږي ستا او ستا د زامنو دي.

¹⁰څرنګه چې دا شيان مقدس دي نو بايد په مقدس ځای کې وخوړل شي، مګر يوازې نارينه اجازه لري چې هغه وخوري.

¹¹برسېره پردې، نورې خاصې نذرانې چې اسرائيليان يې ماته وړاندې کوي هغه به ستا وي. هغه به د تل دپاره تا، ستا زامنو او ستا لورګانو ته درکوم. ستا د کورنۍ هر غړی چې په مذهبي لحاظ پاک وي هغه خوړلی شي.

¹²د هغو ټولو اولنيو ښو محصولاتو څخه چې اسرائيليان يې هر کال ماته راکوي زه يې تاسو ته درکوم، يعنې د زيتونو تېل، د انګورو شربت او غلې دانې.

¹³د هغوی د پټيو او د انګورو د باغونو د فصلونو اوله برخه هم ستاسو ده. قوم به هغه ماته وړاندې کړي، بيا هرڅوک چې ستاسو په کورنۍ کې پاک وي له هغې څخه لږه اخيستلی شي.

¹⁴هرڅه چې په اسرائيلو کې بې له کوم قيد او شرط څخه ماته وقف شوي وي ستاسو به شي.

¹⁵په هرې اسرائيلي کورنۍ کې مشر زوی او د هغوی د رمو او پادو اولني زېږېدلي نران حيوانات زما دي. مګر مشر زوی او هر اولنی زېږېدلی ناپاک نر حيوان بايد بېرته په بيه واخيستل شي.

¹⁶د مشر زوی بيه به چې لږ تر لږه د يوې مياشتې وي پنځه مثقاله سپين زر وي چې وزن يې د مقدس ځای د اندازې په مطابق وي.

¹⁷مګر د غواګانو، مېږو او وزو اولني زېږېدلي بچي بېرته په بيه نه اخيستل کيږي. هغه بيخي زما دي او بايد قرباني شي. وينه يې په قربانګاه باندې وشيندئ او وازګه يې د داسې نذرانې په توګه وسوزوئ چې په اور باندې تياريږي، دا بوی په څښتن باندې ښه لګيږي.

¹⁸تاسو کولی شئ چې د دې حيواناتو غوښه وخورئ لکه څنګه چې د خاصې نذرانې سينه او شاتنۍ ښي پښه خوړلی شئ.

¹⁹هغه ټولې خاصې نذرانې چې اسرائيليان يې ماته وړاندې کوي هغه به تل تا، ستا زامنو او لورګانو ته درکوم. دا يو نه ماتېدونکی لوظ دی چې زه يې تا او ستا د اولادې سره کوم.

²⁰تاسو ته به په اسرائيلو کې ځمکه درنکړل شي چې ستاسو ميراث شي او نه به د جايداد کومه برخه درکړل شي. زه څښتن يم او زه ستاسو دپاره هم برخه يم او هم ستاسو ميراث.“

²¹څښتن حضرت هارون ته وفرمايل: ”د اسرائيليانو لس فيصده فصلونه او د هرو لسو نويو زېږېدلو حيواناتو څخه يو حيوان زما دی. مګر دا ټول لاويانو ته د هغوی د کار او خدمت په بدل کې چې په مقدسه خېمه کې يې کوي ورکوم.

²²نور اسرائيليان بايد خېمې ته ورنژدې نشي او په دې ډول دې خپل ځانونه د مرګ سزا ته نه جوړوي.

²³له همدې وخت څخه به يوازې لاويان په خېمې باندې پام کوي او د هغې پوره مسئوليت به په غاړه اخلي. دا دايمي اصول دی چې ستاسو په اولادې باندې به هم عملي کيږي. لاويان بايد په اسرائيلو کې خپله ځمکه ونلري.

²⁴د هغې په ځای به هغوی ته هغه حاصلات او هغه نوي زېږېدلي حيوانات ورکول کيږي چې اسرائيليان يې ماته وړاندې کوي.“

²⁵څښتن حضرت موسیٰ ته وفرمايل:

²⁶”لاويانو ته داسې ووايه: کله چې تاسو د اسرائيليانو څخه د حاصلاتو او نوي زېږېدلو حيواناتو عشر واخلئ، بايد د هغو عشر ما څښتن ته وړاندې کړئ.

²⁷۲۷‏-۲۸ لکه څنګه چې اسرائيليان ماته د غلو دانو او د انګورو د شربت برخه راکوي، نو تاسو هم بايد د هغه ټول عشر څخه چې د اسرائيليانو څخه يې اخلئ يوه برخه ماته د نذرانې په توګه جدا کړئ. هغه بايد هارون ته ورکړل شي.

²⁹نو څه چې تاسو اخلئ، ډېره ښه برخه به يې زما وي.

³⁰کله چې تاسو ډېره ښه برخه وړاندې کړه نو کولی شئ چې پاتې برخه يې خپل ځان ته وساتئ، لکه څنګه چې دهقان د نذرانې له ورکولو څخه وروسته څه چې پاتې شوي وي هغه ساتي.

³¹تاسو او ستاسو کورنۍ کولی شئ چې پاتې شوې برخه په هرځای کې وخورئ، ځکه چې دا په مقدسه خېمه کې د کار کولو دپاره ستاسو اجوره ده.

³²د هغې په خوړلو به تاسو ته سزا نه درکول کيږي په دې شرط چې تاسو مخکې ماته ډېرې ښې برخې وړاندې کړې وي. هغه سوغاتونه او قربانۍ ګانې چې قوم يې راوړي بايد مقدسې پاتې شي او مخکې له دې چې ماته وړاندې شي تاسو د هغو څخه کومه برخه وخورئ نو وبه وژل شئ.“