Read Pashto (Nangahari) — د پښتو مقدس کتاب شمېر 19 Bible Online

شمېر 19 - Pashto (Nangahari) — د پښتو مقدس کتاب bible

شمېر 19

¹څښتن حضرت موسیٰ او حضرت هارون ته وفرمايل:

²”د اسرائيلو قوم بايد موسیٰ ته يوه داسې سره غوا راولي چې کوم عيب په کې نه وي او هيڅکله ورباندې قلبه نه وي شوې.

³هغوی به هغه العازار کاهن ته ورکړي، بيا به هغه د کمپ څخه بيرون وويستل شي او د هغه په حضور کې به حلاله شي.

⁴بيا به العازار د هغې څخه لږه وينه واخلي او په خپله ګوته باندې دې اوه ځلې د مقدسې خېمې مخې ته وشيندي.

⁵بيا ټوله غوا بايد د پوستکي، غوښې، وينې او کولمو سره د هغه په مخ کې وسوزول شي.

⁶کاهن دې د صبر د ونې لږ لرګي، د ويلني بوټی او سور تار په اور کې واچوي.

⁷د مراسمو څخه وروسته دې کاهن خپل کالي ومينځي او غسل دې وکړي. بيا هغه کولی شي چې بېرته کمپ ته ننوزي، مګر تر ماښامه پورې به ناپاک پاتې شي.

⁸هغه سړی چې غوا يې سوزولې وي هم بايد خپل کالي ومينځي او غسل دې وکړي، مګر هغه به هم تر ماښامه پورې ناپاک پاتې شي.

⁹يو سړی چې ناپاک نه وي د سوزېدل شوې غوا ايرې دې واخلي او د کمپ څخه دباندې دې په يو پاک ځای کې واچوي. د اسرائيلو قوم کولی شي چې دا ايرې د هغو اوبو سره ګډې کړي چې د ګناه د پاکولو په مراسمو کې ورڅخه کار اخيستل کيږي.

¹⁰هغه سړی چې ايرې راټولوي بايد خپل کالي ومينځي، مګر تر ماښامه پورې به ناپاک پاتې شي. د اسرائيلو قوم او هغه بېګانه خلک چې د دوی په منځ کې اوسيږي بايد تل د دې قانون اطاعت وکړي.

¹¹که چېرې څوک يو مړي ته لاس وروړي، اوه ورځې به ناپاک وي.

¹²مګر که چېرې په دريمه ورځ او بيا په اوومه ورځ په هغو اوبو باندې چې د غوا ايرې ورسره ګډې وي خپل ځان پاک کړي، هغه به پاک شي. که په هغو ورځو کې خپل ځان پاک نه کړي، نو ناپاک به پاتې شي.

¹³که چېرې څوک مړي ته لاس وروړي او خپل ځان پاک نه کړي هغه ناپاکه پاتې کيږي، ځکه چې د پاکوالي اوبه ورباندې نه دي اچول شوې. هغه نفر مقدسه خېمه ناپاکه کړې او د اسرائيلو د قوم څخه بايد وشړل شي.

¹⁴په هغه حالت کې چې يو نفر په خېمه کې مړ شي، نو هغه څوک چې د هغه نفر د مرګ په وخت کې په خېمه کې وي يا څوک چې خېمې ته ورننوزي هغه به اوه ورځې ناپاک وي.

¹⁵هر منګی او لوښی چې په خېمه کې وي او سرپوښ ونلري، هغه ناپاک کيږي.

¹⁶که چېرې څوک د يو داسې نفر مړي ته لاس وروړي چې په وسله باندې وژل شوی وي يا په خپل مرګ مړ شوی وي يا که چېرې د انسان هډوکي يا قبر ته لاس وروړي، هغه به اوه ورځې ناپاک وي.

¹⁷۱۷‏-۱۸ مخکې له دې چې هغه نفر له نجاست څخه پاک شي، يو څوک چې پاک وي بايد د سوزول شوې غوا لږې ايرې واخلي او د چينې د اوبو په يو لوښي کې دې هغه ولړي. همدا نفر بايد د ويلني د بوټي يوه څانګه په اوبو او ايرو کې غوټه کړي، بيا دې هغه په خېمه او هرڅه چې په هغې کې دي او د هر هغه چا په شمول چې په خېمه کې ؤ وشيندي. که چېرې هغه د انسان هډوکي يا قبر يا مړي ته لاس وروړی وي، هغه اوبه بايد په هغه نفر باندې وشيندل شي.

¹⁹هغه نفر چې پاک وي په ناپاکه نفر باندې دې په دريمه او اوومه ورځ هغه اوبه وشيندي. په اوومه ورځ هغه نفر چې پاکيږي بايد خپل کالي ومينځي او غسل دې وکړي نو ماښام به هغه پاک شي.

²⁰که چېرې يو نفر په مذهبي لحاظ ناپاک وي او خپل ځان پاک نه کړي هغه ناپاک پاتې کيږي، ځکه چې په هغه باندې د پاکوالي اوبه نه دي اچول شوې. هغه مقدسه خېمه ناپاکه کړې او د اسرائيلو د قوم څخه بايد وشړل شي.

²¹دا قوانين به هيڅکله بدل نشي. کوم نفر چې د پاکوالي په خاطر هغه اوبه شيندي بايد خپل کالي هم ومينځي. که څوک دې اوبو ته لاس وروړي هغه به تر ماښامه پورې ناپاک وي.

²²يو ناپاک نفر چې هر شي ته لاس وروړي هغه شی به ناپاک شي او که بل نفر هغه شي ته لاس وروړي، هغه به هم تر ماښامه پورې ناپاک وي.“