Read Pashto (Nangahari) — د پښتو مقدس کتاب شمېر 20 Bible Online

شمېر 20 - Pashto (Nangahari) — د پښتو مقدس کتاب bible

شمېر 20

¹د اسرائيلو ټول قوم د کال د اولې مياشتې په دوران کې د صين دښتې ته راورسېد او په قادش کې يې خېمې ودرولې. دا هغه ځای ؤ چې مريم په کې مړه شوه او ښخه کړای شوه.

²په کوم ځای کې چې هغوی خېمې ودرولې وې هلته اوبه نه وې، نو خلک د حضرت موسیٰ او حضرت هارون په ضد راغونډ شول.

³هغوی حضرت موسیٰ ته شکايت وکړ او ويې ويل: ”دا به ښه وای چې مونږ د نورو اسرائيليانو سره د څښتن په حضور کې مړه شوي وای.

⁴تا ولې دې دښتې ته راوستلو؟ يوازې د دې دپاره چې د خپلو حيواناتو سره دلته مړه شو؟

⁵ولې دې مونږ له مصر څخه دې خوار ځای ته چې هيڅ شی په کې نه شنه کيږي راوستلو؟ دلته نه غله شته، نه انځران، نه انګور او نه انار. حتیٰ د څښلو اوبه هم دلته نشته!“

⁶حضرت موسیٰ او حضرت هارون د خلکو څخه لېرې لاړل او د مقدسې خېمې په دروازه کې ودرېدل. هغوی په ځمکه باندې پړمخې پرېوتل او د څښتن جلال ورته ښکاره شو.

⁷څښتن حضرت موسیٰ ته وفرمايل:

⁸”هغه امسا چې د لوظ د صندوق په مخ کې پرته ده راواخله او بيا ته او هارون ټول قوم راغونډ کړئ. د هغو ټولو په مخ کې هغه ګټ ته ووايئ چې اوبه ورڅخه جاري شي. په دې ډول به ته د ګټ څخه خلکو او د هغو حيواناتو ته د څښلو دپاره اوبه راوباسې.“

⁹نو حضرت موسیٰ لاړ او څنګه چې څښتن ورته حکم کړی ؤ، امسا يې راواخيستله.

¹⁰هغه او حضرت هارون ټول قوم د ګټ مخې ته راغونډ کړ او حضرت موسیٰ ورته وفرمايل: ”ای سرکشو خلکو، واورئ! آيا مونږ بايد تاسو ته د دې ګټ څخه اوبه راوباسو؟“

¹¹بيا حضرت موسیٰ امسا پورته کړه او ګټ يې دوه ځلې ورباندې وواهه او د هغه څخه د اوبو يوه لويه وياله جاري شوه او ټولو خلکو او حيواناتو هغه وڅښلې.

¹²مګر څښتن حضرت موسیٰ او حضرت هارون ورټل او ورته ويې فرمايل: ”څرنګه چې تاسو په ما باندې اعتماد ونه کړ چې د اسرائيلو د خلکو په مخکې زما د پاک قدرت احترام وکړئ نو تاسو به ونشئ کولی چې هغوی هغې خاورې ته بوزئ چې د هغې د ورکولو وعده مې د هغوی سره کړې ده.“

¹³دا پېښه په مريبه * کې وشوه، يعنې هغه ځای چې اسرائيليانو په کې د څښتن په ضد شکايت وکړ او څښتن هغوی ته خپل مقدس توب وروښود.

¹⁴حضرت موسیٰ د قادش څخه د ادوم پادشاه ته استازي ولېږل چې دا پيغام ورته ورسوي: ”مونږ اسرائيليان ستاسو خپل خپلوان يو او تاسو خبر يئ چې په مونږ باندې څومره سختۍ تېرې شوې،

¹⁵څنګه زمونږ نيکونه مصر ته لاړل او مونږ د ډېرو کلونو دپاره هلته اوسېدلو. مصريانو زمونږ د نيکونو او زمونږ سره بده رويه وکړه

¹⁶او مونږ څښتن ته د مرستې دپاره فرياد وکړ. هغه زمونږ فرياد واورېد او فرښته يې راولېږله او مونږ يې د مصر څخه راوويستلو. اوس مونږ په قادش کې يو چې دا يو ښار دی چې ستاسو د سيمې سره سرحد لري.

¹⁷مهرباني وکړئ مونږ ته اجازه راکړئ چې ستاسو له هېواد څخه تېر شو. مونږ به خپله لاره نه خوشې کوو او ستاسو پټيو او د انګورو باغونو ته به نه ورننوزو او ستاسو د کوهيانو څخه به هيڅ اوبه ونه څښو. مونږ به په عمومي لاره باندې ځو ترڅو ستاسو د سيمې څخه ووزو.“

¹⁸مګر ادوميانو په ځواب کې وويل: ”نه، مونږ به تاسو پرېنږدو چې زمونږ د هېواد په لاره باندې لاړ شئ! او که چېرې تاسو د دې کار هڅه وکړئ، مونږ به ووزو او حمله به درباندې وکړو.“

¹⁹د اسرائيلو خلکو وويل: ”مونږ به په عمومي لاره باندې ځو او که مونږ يا زمونږ حيواناتو ستاسو اوبه وڅښلې، مونږ به يې بيه درکړو. مونږ يوازې غواړو چې تېر شو.“

²⁰مګر ادوميانو بيا وويل: ”مونږ يې نه منو!“ او هغوی د يو قوي لښکر سره ووتل چې د اسرائيلو په خلکو باندې حمله وکړي.

²¹څرنګه چې ادوميانو اسرائيليانو ته اجازه ورنه کړه چې د هغوی د سيمې له لارې تېر شي، نو اسرائيليان بېرته ستانه شول او په بله لاره باندې لاړل.

²²د اسرائيلو ټول قوم له قادش څخه لاړ او د هور غره ته ورسېدل،

²³يعنې د ادوم سرحد ته. په هغه ځای کې څښتن حضرت موسیٰ او حضرت هارون ته وفرمايل:

²⁴”هارون به هغې خاورې ته داخل نشي چې د هغې د ورکولو وعده مې د اسرائيليانو سره کړې ده. هغه به مړ شي، ځکه چې تاسو دواړو په مريبه کې زما د حکم څخه سرغړونه وکړه.

²⁵هارون او د هغه زوی العازار درسره واخله او د هور د غره سرته يې وخېژوه

²⁶او په هغه ځای کې د هارون څخه د کاهنۍ کالي وباسه او العازار ته يې ورواغونده. هارون به هلته مړ شي.“

²⁷څه چې څښتن حکم کړی ؤ حضرت موسیٰ هماغسې وکړل. ټول قوم ورته کتل چې هغوی د هور د غره سرته وختل.

²⁸حضرت موسیٰ د حضرت هارون څخه د کاهنۍ کالي لېرې کړل او د هغه زوی العازار ته يې ورواغوستل. حضرت هارون هلته د هور د غره په سر باندې وفات شو او حضرت موسیٰ او العازار بېرته راکوز شول.

²⁹کله چې د اسرائيلو ټول قوم خبر شو چې حضرت هارون وفات شوی دی نو هغوی دېرش ورځې د هغه په مرګ باندې غم او ژړا وکړه.