Read Pashto (Nangahari) — د پښتو مقدس کتاب شمېر 21 Bible Online

شمېر 21 - Pashto (Nangahari) — د پښتو مقدس کتاب bible

شمېر 21

¹د عراد کنعانی پادشاه د کنعان په جنوب کې اوسېده او کله چې هغه واورېدل چې اسرائيليان د اتاريم کلي ته راروان دي، هغه ورباندې حمله وکړه او د هغو څخه يې ځينې ونيول.

²نو اسرائيليانو څښتن ته نذر ومانه: ”که چېرې ته مونږ په دې خلکو باندې بريالي کړې، مونږ به هغوی او د هغوی ښارونه بې له کوم شرط څخه تاته وقف کړو او هغوی به له منځه يوسو.“

³څښتن د دوی دعا قبوله کړه او د هغوی سره يې مرسته وکړه چې په کنعانيانو باندې بريالي شي. نو اسرائيليانو هغوی او د هغوی ښارونه بيخي له منځه يوړل او هغه ځای يې د حرمه * په نوم ياد کړ.

⁴اسرائيليان د هور د غره څخه لاړل او په هغې لارې باندې روان شول چې سرې بحيرې ته تللې ده، د دې دپاره چې د ادوم د سيمې په شاوخوا باندې راوګرځي. مګر خلکو په لاره کې خپله حوصله له لاسه ورکړه

⁵او د خدای پاک او حضرت موسیٰ په ضد يې خبرې وکړې. هغوی شکايت وکړ: ”مونږه مو ولې د مصر څخه راوويستلو چې په دې دښته کې مړه شو، چېرته چې نه ډوډۍ شته او نه اوبه؟ مونږ نور د دې خراب خوراک څخه تنګ شوي يو!“

⁶بيا څښتن په هغوی باندې زهر لرونکي ماران نازل کړل او ډېر اسرائيليان يې وچيچل او مړه شول.

⁷خلک حضرت موسیٰ ته ورغلل او ويې ويل: ”مونږ ګناه کړې ده چې د څښتن او ستا په ضد مو خبرې کړې دي. اوس څښتن ته دعا وکړه چې دا ماران لېرې کړي.“ نو حضرت موسیٰ د خلکو دپاره دعا وکړه.

⁸څښتن حضرت موسیٰ ته وفرمايل: ”يو فلزي مار جوړ کړه او د يوې پايې په سر باندې يې ځوړند کړه. هرڅوک چې چيچل کيږي نو کله چې هغه فلزي مار ته وګوري ژوندی به پاتې کيږي.“

⁹نو حضرت موسیٰ يو برنجي مار جوړ کړ او هغه يې د يوې پايې په سر باندې ځوړند کړ. هرڅوک به چې مار چيچه هغه به برنجي مار ته کتل نو ژوندی به پاتې کېده.

¹⁰اسرائيليان روان شول او د اوبوت سره يې خېمې ودرولې.

¹¹کله چې هغوی له هغه ځای څخه لاړل، د عيی عباريم په دښته کې د موآب د سيمې ختيځ خواته يې خېمې ودرولې،

¹²بيا يې د زارد د خوړ په څنګ کې خېمې ودرولې.

¹³بيا له هغه ځای څخه روان شول او د ارنون د سيند په شمال کې په هغې دښتې کې يې چې د اموريانو د سيمې پورې غزېدلې ده خېمې ودرولې. (ارنون د موآبيانو او اموريانو ترمنځ سرحد ؤ.)

¹⁴له همدې کبله د څښتن د جنګونو په کتاب کې ويل شوي دي چې د واهيب ښار او د هغه ويالې د سوفه په سيمه کې دي، د ارنون سيند او

¹⁵د هغه درې د موآبيانو د سرحد تر څنګ پرتې دي او د عار تر ښاره پورې رسېدلې دي.

¹⁶له هغه ځای څخه دوی يو بل ځای ته چې د کوهي په نوم يادېده لاړل، يعنې هغه ځای ته چېرته چې څښتن حضرت موسیٰ ته وفرمايل: ”خلک سره راغونډ کړه چې د څښلو دپاره اوبه ورکړم.“

¹⁷په هغه وخت کې د اسرائيلو خلکو دا روحاني سندره وويله: ”ای کوهيه! راوباسه اوبه خپلې هرکلی به ورته وايو په سندرې

¹⁸هغه کوهی چې کيندل شوی شهزادګانو له خوا او د قوم د مشرانو له خوا دی کيندل شوی په شاهي امسا او د هغوی په امساګانو باندې“ هغوی له دښتې څخه متانې ته لاړل

¹⁹او له هغه ځايه نحليئيل ته لاړل او د نحليئيل څخه باموت ته

²⁰او له باموت څخه هغې درې ته لاړل چې د موآبيانو په سيمه کې ده او د پيسګاه د غره لاندې ده او له هغه ځای څخه ښکته دښته ليدل کيږي.

²¹د اسرائيلو خلکو د اموريانو پادشاه سيحون ته استازي ورولېږل چې هغه ته داسې ووايي:

²²”مهرباني وکړئ مونږ پرېږدئ چې ستاسو په سيمه باندې تېر شو. مونږ به خپله لاره نه خوشې کوو او ستاسو پټيو او د انګورو باغونو ته به نه ورننوزو او ستاسو د کوهيانو څخه به هيڅ اوبه ونه څښو. مونږ به په عمومي لاره باندې ځو، ترڅو ستاسو د سيمې څخه ووزو.“

²³مګر سيحون اسرائيليان پرېنښودل چې د هغه د وطن له لارې سفر وکړي. د دې په ځای، هغه خپل ټول لښکر سره راغونډ کړ او دښتې ته ووت چې د ياهص ښار ته نژدې په اسرائيليانو باندې حمله وکړي.

²⁴مګر اسرائيليانو خپل ډېر دښمنان په دې جګړه کې ووژل او د هغوی سيمه يې په جنوب کې د ارنون د سيند څخه نيولې په شمال کې د يبوق تر سيند پورې ونيوله. د يبوق بلې خواته د عمونيانو سيمه وه او د هغوی سرحد ډېر قوي ؤ.

²⁵نو اسرائيليانو د اموريانو ټول ښارونه چې په هغو کې حشبون او د هغه شاوخوا کلي هم شامل ؤو ونيول او هلته اوسېدل.

²⁶حشبون د اموريانو د پادشاه سيحون پايتخت ؤ. سيحون د موآب د پخواني پادشاه سره جګړه کړې وه او د ارنون د سيند پورې يې د هغه ټوله خاوره نيولې وه.

²⁷په دې سبب شاعران وايي: ”راشئ حشبون ته يعنې ښار ته د سيحون پادشاه! غواړو هغه بېرته آباد ووينو!

²⁸په يو وخت کې د حشبون له دغه ښاره د سيحون لښکرې لاړې مخکې لکه اور په موآب کې يې برباد کړ د عار ښار کړې بربادې يې غونډۍ ارنون دپاسه

²⁹افسوس په تاسو موآبيانو باندې! ای د کموش عبادت کوونکو برباد شوئ تاسې! ستاسو خدای پرېښودل خلک چې مهاجر شي ښځې شولې اسيرانې د اموريايي پادشاه په لاس

³⁰مګر اوس ده برباد شوې اولاده د هغوی په ټوله لاره د حشبون نه تر ديبونه پورې تر نوفح چې ده ميدبا ته نژدې“

³¹نو اسرائيليان د اموريانو په سيمه کې اوسېدل.

³²نو حضرت موسیٰ يو څو نفره ولېږل چې د يعزير په ښار باندې د حملې دپاره يوه ښه لاره راپيدا کړي. اسرائيليانو هغه ښار او د هغه شاوخوا کلي ونيول او هغه اموريان چې هلته اوسېدل هغوی يې وشړل.

³³بيا اسرائيليان راوګرځېدل او د باشان په لاره باندې روان شول. د باشان پادشاه عوج د خپلو ټولو لښکرو سره روان شو چې په ادرعي کې په هغوی باندې حمله وکړي.

³⁴څښتن حضرت موسیٰ ته وفرمايل: ”د عوج څخه مه وېرېږه. زه به تاته په هغه، د هغه په ټولو خلکو او خاوره باندې بری درکړم. د هغه سره هغه کار وکړه چې د اموريانو د پادشاه سره دې چې حشبون يې پايتخت ؤ کړی ؤ.“

³⁵نو اسرائيليانو عوج، د هغه زامن او د هغه ټول خلک ووژل، يو هم ژوندی پاتې نشو او بيا يې د هغه خاوره ونيوله.