Read Pashto (Nangahari) — د پښتو مقدس کتاب شمېر 23 Bible Online

شمېر 23 - Pashto (Nangahari) — د پښتو مقدس کتاب bible

شمېر 23

¹بلعام بالاق ته وويل: ”دلته زما دپاره اوه د قربانۍ ځايونه جوړ کړه، بيا اوه غوايان او اوه پسونه راوله.“

²څنګه چې بالاق ته ويل شوي ؤو، هغه هماغسې وکړل او هغه او بلعام په هره قربانګاه باندې يو يو غويی او يو يو پسه قرباني کړ.

³بيا بلعام بالاق ته وويل: ”دلته د خپلې سوزېدونکې نذرانې سره ودرېږه، زه ځم چې وګورم څښتن زما سره د ملاقات دپاره راځي او که نه. هرڅه چې هغه راته ووايي هغه به تاته ووايم.“ نو بلعام د غونډۍ سرته يوازې لاړ

⁴او خدای پاک د هغه سره ملاقات وکړ. بلعام هغه ته وويل: ”ما اوه د قربانۍ ځايونه جوړ کړي دي او په هر يو باندې مې يو يو غويی او يو يو پسه قرباني کړی دی.“

⁵څښتن بلعام ته يو پيغام ورکړ، بيا يې هغه بېرته ولېږه چې بالاق ته يې ورسوي.

⁶نو هغه بېرته لاړ او ويې ليدل چې بالاق د موآبيانو د ټولو مشرانو سره د خپلې نذرانې په څنګ کې ولاړ دی.

⁷بلعام دا پيغام ورکړ: د موآب پادشاه بالاق زه راوستلم له سوريې يعنې ختيځو غرونو هغه ويل راشه خبرې وکړه ما دپاره ته لعنت ووايه په قوم د اسرائيلو باندې

⁸څنګه په هغه چا لعنت ووايم په چا چې خدای لعنت ويلی نه وي؟ څنګه د هغوی په ضد خبرې وکړم د چا په ضد چې څښتن نه دي کړې؟

⁹لوړو ګټانو څخه زه شمه هغوی ليدلی شمه کتلی هغوی زه د غونډيو څخه دا يو قوم دی چې اوسيږي ځانله هغوی خپل ځانونه په نورو قومونو کې نه شماري

¹⁰د اسرائيلو اولاده ده لکه خاورو په شان دوی دومره ډېر دي چې حساب يې نشي پرېږده چې مړ شمه زه د خدای د قوم په شان پرېږده په سوله کې چې مړ شم د نېکانو په شان

¹¹بيا بالاق بلعام ته وويل: ”دا څه دې راسره وکړل؟ ما د دې دپاره راوغوښتلې چې زما په دښمنانو باندې لعنت ووايې. مګر د هغې په ځای تا هغوی ته برکت ورکړ!“

¹²بلعام په ځواب کې وويل: ”زه يوازې هغه څه ويلی شم چې څښتن راته وايي.“

¹³بالاق بلعام ته وويل: ”راځه چې يو بل ځای ته لاړ شو چېرته چې ته کولی شې يوازې ځينې اسرائيليان ووينې، له هماغه ځای څخه زما په خاطر په هغوی باندې لعنت ووايه.“

¹⁴نو هغه بلعام د صوفيم پټي ته چې د پيسګاه د غره په سر ؤ بوته. په هغه ځای کې هم هغه اوه د قربانۍ ځايونه جوړ کړل او په هر يو باندې يې يو يو غويی او يو يو پسه قرباني کړ.

¹⁵بلعام بالاق ته وويل: ”دلته د خپلې سوزېدونکې نذرانې په څنګ کې ودرېږه او زه به هلته د څښتن سره ملاقات وکړم.“

¹⁶څښتن د بلعام سره ملاقات وکړ او يو بل پيغام يې ورکړ، بيا يې ورته وفرمايل: ”لاړ شه او بالاق ته يې ورسوه.“

¹⁷بلعام بېرته لاړ او ويې ليدل چې بالاق د خپلې سوزېدونکې نذرانې په څنګ کې د موآبيانو د مشرانو سره ولاړ دی. بالاق پوښتنه وکړه: ”څښتن څه وويل؟“

¹⁸بلعام بيا پيغام ورکړ: راشه ای بالاقه د صفور زويه غوږ دې ونيسه چې څه درته زه وايم

¹⁹خدای د خلکو په شان نه دی چې درواغ ووايي انسان نه دی چې بدله اراده کړي رسوي سرته چې کړي کومې وعدې څه چې وايي هغه کاندي

²⁰ماته شوې لارښوونه چې زه ورکړم برکت خدای چې کوم وخت کې برکت ورکوي هغه زه بېرته ګرځولی نشم

²¹کړم پېشګويي چې مستقبل د اسرائيلو به رانه وړي بدبختي او تکليفونه دوی ته خپل څښتن خدای يې مل دی دوی سره وايي په جار هغه پادشاه دی د دوی

²²خدای دوی راوويستل له مصر څخه په ډېر قوت سره جنګيږي دی هغوی دپاره

²³هيڅ جادو او کوډې نشته چې په ضد د اسرائيلو وکړي کار د اسرائيلو په باره کې به اوس خلک وايي وګورئ خدای هغوی ته څه وکړل

²⁴دي هغوی د قهر شويو زمريانو په شان چې دي تيار حملې ته ترڅو چې ونه خوري خپل ښکار او وينه يې ونه څښي تر هغې پورې به ونه کړي آرام

²⁵نو بالاق بلعام ته وويل: ”نه په هغوی باندې لعنت ووايه او نه ورته برکت ورکوه!“

²⁶بلعام په ځواب کې وويل: ”ما مخکې تاته وويل چې زه به هرڅه د څښتن د وينا په مطابق کوم.“

²⁷بالاق بلعام ته وويل: ”ما سره راشه چې يو بل ځای ته دې بوزم. کېدای شي چې خدای تا پرېږدي چې زما دپاره له هغه ځايه په اسرائيليانو باندې لعنت ووايې.“

²⁸نو هغه بلعام د فغور د غره سرته وخېژاوه چې له هغه ځايه ښکته دښتې ته وګوري.

²⁹بلعام هغه ته وويل: ”دلته زما دپاره اوه د قربانۍ ځايونه جوړ کړه، بيا ماته اوه غوايان او اوه پسونه راوله.“

³⁰څنګه چې بالاق ته ويل شوي ؤو هماغسې يې وکړل، هغه په هرې قربانګاه باندې يو يو غويی او يو يو پسه قرباني کړ.