Read Pashto (Nangahari) — د پښتو مقدس کتاب شمېر 24 Bible Online

شمېر 24 - Pashto (Nangahari) — د پښتو مقدس کتاب bible

شمېر 24

¹بلعام په دې يقين درلود چې څښتن به ورته وفرمايي چې اسرائيليانو ته بيا برکت ورکړه. نو هغه د فال څخه هيڅ کار وانه خيست چې معلومه کړي څښتن د هغه څخه څه غواړي چې ويې کړي، لکه څنګه يې چې دوه ځلې مخکې کړي ؤو. د دې په ځای يې د دښتې خواته وکتل

²او د اسرائيلو خلک يې وليدل چې قبيله په قبيله يې خېمې ودرولې وې. بيا د خدای پاک روح په هغه باندې نازل شو

³او بلعام دا پيغام ورکړ: د بعور د زوی بلعام پيغام دی د هغه چا خبرې چې سترګې يې خلاصې شولې

⁴چې اورېدلی شي خبرې د خدای څوک چې رويا ويني د مطلق قادر خدای له خوا څوک چې پړمخې پرېوزي او خلاصې يې دي سترګې

⁵د اسرائيلو قومه ستاسو کمپ دی څومره ښکلی

⁶د خرماګانو د اوږدو قطارونو په شان د سيند په غاړه د باغونو په شان چې دي کرلي څښتن د عود * د ونو په شان د سيند په غاړه د صبر د ونو په شان

⁷په دوی به وي باران پرېمانه په آبي ځمکو کې کري به خپل تخمونه له اجاج څخه به لوی د دوی پادشاه وي وي به سرلوړې پادشاهي د هغه

⁸خدای دوی راوويستل له مصر څخه په ډېر قوت سره جنګيږي دی هغوی دپاره خپل دښمنان تباه کوي هغه ماتوي د دوی هډوکي او په غشو هغوی ولي

⁹دغه قوم د قوي زمري په شان دی چې ويده وي هيڅوک نشي کړای جرأت چې يې راويښ کړي په هغو به برکت وي څوک چې وايي برکت په اسرائيلو وي لعنت به په هغوی چې لعنت په اسرائيلو باندې وايي

¹⁰کله چې بالاق دا واورېدل، نو د قهره يې خپل لاسونه سره ومروړل او ويې ويل: ”ما د دې دپاره راوغوښتلې چې زما په دښمنانو باندې لعنت ووايې، مګر تا هغوی ته درې ځلې برکت ورکړ.

¹¹اوس ځه ورک شه، خپل کور ته لاړ شه! ما ستا سره وعده کړې وه چې ښه انعام به درکړم، خو څښتن ورڅخه بې برخې کړې.“

¹²بلعام په ځواب کې وويل: ”ما ستا استازو ته چې ماته دې رالېږلي ؤو، ويلي ؤو

¹³چې حتیٰ که چېرې ته ماته خپله ماڼۍ چې د سرو زرو او سپينو زرو څخه ډکه ده هم راکړې، بياهم زه نشم کولی چې د څښتن د امر په خلاف کوم کار وکړم. زه به يوازې هغه څه وايم چې څښتن يې راته وايي.

¹⁴اوس زه بېرته خپلو خلکو ته ورځم، خو مخکې له دې چې لاړ شم، زه تاته د هغه څه په هکله يو خبرداری درکوم چې اسرائيليان به يې يوه ورځ ستا د قوم سره وکړي.“

¹⁵بيا بلعام دا پيغام ورکړ: د بعور د زوی بلعام پيغام دی د هغه چا خبرې چې سترګې يې خلاصې شولې

¹⁶چې اورېدلی شي خبرې د خدای او هغه پوهه مومي د خدای تعالیٰ له خوا نه څوک چې رويا ويني د مطلق قادر خدای له خوا څوک چې پړمخې پرېوزي او خلاصې يې دي سترګې

¹⁷خپلې رويا کې چې څه ما ليدلي پېښ شوي نه دي لا تر اوسه پورې خو يوه ورځ به راښکاره شي لکه ستوري په شان د اسرائيلو يو پادشاه هغه به تاسو موآبيان ورک کړي او د شيث ټول قوم به له منځه يوسي

¹⁸هغه به ومومي بری په دښمنانو په ادوم کې او د هغوی خاوره به کړي خپل ملکيت خو قوي به اسرائيل شي

¹⁹پادشاهي به وکړي د اسرائيلو پادشاه د هر ښار پاتې شوي ژوندي خلک به له منځه يوسي

²⁰بيا بلعام په خپله رويا کې عماليقيان وليدل او دا پيغام يې ورکړ: عماليق د ټولو قومونو څخه ډېر قوي دی مګر په آخر کې به هغه د تل دپاره له منځه لاړ شي

²¹هغه په خپله رويا کې قينيان وليدل او دا پيغام يې ورکړ: ستاسو ځای د اوسېدلو دی په امن داسې امن لکه ځاله چې وي جوړه په ګټ باندې

²²مګر تاسو قينيان به شئ تباه آشوريان چې کله تاسو اسيران کړي

²³بلعام دغه پيغام ورکړ: هيڅوک ژوندی پاتې کېدلی نشي که خدای پلان د تباهۍ ولري

²⁴رابه شي له سواحله د قبرسه کشتۍ ګانې رابه وړي خلک چې کړي فتح آشور او عابر خو په آخر کې به قبرس په خپله هم برباد شي

²⁵بيا بلعام راپاڅېده او بېرته خپل کور ته روان شو او بالاق هم لاړ.