Read Pashto (Nangahari) — د پښتو مقدس کتاب شمېر 25 Bible Online

شمېر 25 - Pashto (Nangahari) — د پښتو مقدس کتاب bible

شمېر 25

¹کله چې اسرائيليان په شطيم کې اوسېدل، ځينو سړيو د موآبي ښځو سره زنا کول پيل کړل.

²دغو ښځو بيا هغه سړي هغو مراسمو ته راوبلل چې د هغوی خدايانو ته په کې نذرانې وړاندې کېدلې. هغو سړيو د قربانيو غوښه وخوړله او د موآبي خدايانو عبادت يې وکړ.

³څښتن په اسرائيليانو باندې په قهر شو ځکه چې هغوی د بعل فغور د خدای عبادت کړی ؤ.

⁴نو هغه حضرت موسیٰ ته وفرمايل: ”د اسرائيلو ټول مشران بوزه او په رڼا ورځ يې زما په حضور کې اعدام کړه، بيا به زما سخت قهر په اسرائيليانو باندې سوړ شي.“

⁵حضرت موسیٰ هغو اسرائيليانو ته چې د قاضيانو په توګه يې کار کاوه وفرمايل: ”تاسو هر يو بايد د خپلې قبيلې هغه نفر ووژنئ چې د بعل فغور عبادت يې کړی دی.“

⁶يو اسرائيلي سړي د حضرت موسیٰ او ټول قوم په مخ کې چې هغوی د مقدسې خېمې په دروازه کې ژړل، يوه مديانۍ ښځه خپل کور ته راوستله.

⁷د العازار زوی او د حضرت هارون کاهن لمسي فينحاس هغه وليدل او د خلکو د ګڼې ګوڼې څخه لاړ. هغه يوه نېزه راواخيستله

⁸او د هغه سړي پسې خېمې ته ورننوت او د هغه په بدن او د ښځې په ګېډه کې يې ومنډله. په دې ډول څښتن هغه وبا بنده کړه چې اسرائيليان يې له منځه وړل،

⁹مګر وبا لا له مخکې څخه ۲۴۰۰۰ نفره وژلي ؤو.

¹⁰څښتن حضرت موسیٰ ته وفرمايل:

¹¹”فينحاس د العازار زوی او د حضرت هارون کاهن لمسي زما قهر چې په اسرائيلو باندې راغلی ؤ سوړ کړ. هغه په ما باندې غيرت وکړ نو په دې خاطر مې هغوی تباه نه کړل.

¹²نو ورته ووايه چې زه د هغه سره داسې لوظ کوم چې د همېش دپاره به اعتبار ولري.

¹³هغه او د هغه اولاده به د تل دپاره زما کاهنان وي، ځکه چې هغه د خپل خدای د عزت دپاره غيرت وکړ او د اسرائيليانو دپاره يې کفاره ادا کړه.“

¹⁴د هغه اسرائيلي نوم چې د مديانۍ ښځې سره ووژل شو، د سالو زوی زمري ؤ او هغه د شمعون د قبيلې يو مشر ؤ.

¹⁵د ښځې نوم کزبي ؤ. د هغې پلار صور د مديانيانو د طايفو يو مشر ؤ.

¹⁶څښتن حضرت موسیٰ ته امر وکړ:

¹⁷”په مديانيانو باندې حمله وکړه او هغوی ووژنه.

¹⁸دا د هغه بد کار له کبله چې تاسو سره يې وکړ چې په فغور کې يې وغولولئ چې بعل فغور ته عبادت وکړئ او د کزبي له کبله چې د يو مدياني مشر لور وه او په فغور کې د وبا په وخت کې ووژل شوه.“