Read Pashto (Nangahari) — د پښتو مقدس کتاب شمېر 26 Bible Online

شمېر 26 - Pashto (Nangahari) — د پښتو مقدس کتاب bible

شمېر 26

¹له وبا څخه وروسته څښتن حضرت موسیٰ او د حضرت هارون کاهن زوی العازار ته وفرمايل:

²”د اسرائيلو د ټول قوم سرشمېرنه د کورنيو په اساس وکړئ، يعنې د هغو ټولو خلکو چې عمر يې شل کاله يا زيات وي او جنګ کولی شي.“

³په هغه وخت کې د اسرائيلو ټول قوم د موآب په ډاګونو کې اريحا ته مخامخ د اردن د سيند په غاړه خېمې ودرولې وې. نو حضرت موسیٰ او العازار کاهن د اسرائيلو مشرانو ته د دې سرشمېرنې په باره کې داسې لارښوونه وکړه:

⁴”لکه څنګه چې څښتن حضرت موسیٰ ته حکم کړی دی هغه ټول اسرائيليان چې عمر يې شل کاله يا زيات وي وشمارئ.“ دا هغه اسرائيليان دي چې د مصر څخه راوتلي ؤو:

⁵د روبين د قبيلې څخه (روبين د حضرت يعقوب مشر زوی ؤ): د حنوک، فلو،

⁶حصرون او کرمي طايفې،

⁷د دې طايفو شمېر ۴۳۷۳۰ تنه نارينه ؤو.

⁸د فلو اولاده: الياب

⁹او د هغه زامن نموئيل، داتان او ابيرام. (دا هماغه داتان او ابيرام دي چې د قوم له خوا انتخاب شوي ؤو، مګر هغوی د حضرت موسیٰ او حضرت هارون سره مخالفت وکړ او د قورح د پيروانو سره يوځای شول او د څښتن په مقابل کې يې سرکشي وکړه.

¹⁰ځمکه پرانيستل شوه او هغوی يې د قورح سره ژوندي تېر کړل. په هماغه وخت کې اور ۲۵۰ تنه له منځه يوړل. هغوی نورو اسرائيليانو ته د خبرداري په توګه ؤو.

¹¹مګر د قورح زامن ونه وژل شول.)

¹²۱۲‏-۱۴ د شمعون د قبيلې څخه ۲۲۲۰۰ تنه ؤو، هغوی د نموئيل، يامين، ياکين، زارح او شائول د طايفو څخه ؤو.

¹⁵۱۵‏-۱۸ د جاد د قبيلې څخه ۴۰۵۰۰ تنه ؤو، هغوی د صفون، حجي، شوني، ازني، عيري، ارود او ارئيلي د طايفو څخه ؤو.

¹⁹۱۹‏-۲۲ د يهودا د قبيلې څخه ۷۶۵۰۰ تنه ؤو، هغوی د شيله، فارص، زارح، حصرون او حامول د طايفو څخه ؤو. د يهودا زامن عير او اونان په کنعان کې مړه شوي ؤو.

²³۲۳‏-۲۵ د يساکار د قبيلې څخه ۶۴۳۰۰ تنه ؤو، هغوی د تولع، فوه، ياشوب او شمرون د طايفو څخه ؤو.

²⁶۲۶‏-۲۷ د زبولون د قبيلې څخه ۶۰۵۰۰ تنه ؤو، هغوی د سارد، ايلون او يحليئيل د طايفو څخه ؤو.

²⁸د حضرت يوسف قبيلې چې هغه د دوو زامنو يعنې منسي او افرايم پلار ؤ.

²⁹۲۹‏-۳۴ د منسي د قبيلې څخه ۵۲۷۰۰ تنه ؤو، هغوی د دغو طايفو څخه ؤو: د منسي د زوی ماخير طايفه، د هغه د زوی جلعاد طايفه او د ماخير د شپږو لمسيو طايفې: ايعزر، حالق، اسريئيل، شکيم، شميداع او حافر. د حافر زوی صلفحاد هيڅ زامن نه درلودل، مګر پنځه لورګانې يې درلودلې چې نومونه يې دا ؤو: محله، نوعه، حجله، ملکه او ترصه.

³⁵۳۵‏-۳۷ د افرايم د قبيلې څخه ۳۲۵۰۰ تنه ؤو، هغوی د شوتالح، باکر، تاحن او د شوتالح د زوی عيران د طايفو څخه ؤو.

³⁸۳۸‏-۴۱ د بنيامين د قبيلې څخه ۴۵۶۰۰ تنه ؤو، هغوی د بالع، اشبيل، احيرام، شفوفام، حوفام او د بالع د دوو زامنو ارد او نعمان د طايفو څخه ؤو.

⁴²۴۲‏-۴۳ د دان د قبيلې څخه ۶۴۴۰۰ تنه ؤو، هغوی ټول د شوحام د طايفې څخه ؤو.

⁴⁴۴۴‏-۴۷ د اشير د قبيلې څخه ۵۳۴۰۰ تنه ؤو، هغوی د يمنه، يشوي، بريعه او حابر او ملکيئيل يعنې د بريعه د زامنو د دوو طايفو څخه ؤو. سارح د اشير لور وه.

⁴⁸۴۸‏-۵۰ د نفتالي د قبيلې څخه ۴۵۴۰۰ تنه ؤو، هغوی د ياحصئيل، جوني، يصر او شليم د طايفو څخه ؤو.

⁵¹په لست کې د اسرائيلو د ټولو نفرو شمېر ۶۰۱۷۳۰ تنه ؤ.

⁵²څښتن حضرت موسیٰ ته وفرمايل:

⁵³”د کنعان ځمکه په دغو قبيلو باندې د هغو نفرو د شمېر په مطابق چې په هرې قبيلې کې دي ووېشه.

⁵⁴۵۴‏-۵۶ ځمکه د پچو په اساس ووېشه. لويې قبيلې ته زياته برخه او کوچنۍ قبيلې ته کمه برخه ورکړه.“

⁵⁷د لاوي په قبيلې کې دا طايفې شاملې وې: جرشون، قهات، مراري،

⁵⁸او همدارنګه د لبني، حبرون، محلي، موشي او قورح طايفې. قهات د عمرام نيکه ؤ.

⁵⁹د عمرام د ښځې نوم يوکابد ؤ چې د لاوي د اولادې څخه وه او په مصر کې زېږېدلې وه. د عمرام او يوکابد درې اولادونه ؤو، يعنې حضرت هارون، حضرت موسیٰ او مريم.

⁶⁰حضرت هارون د ناداب، ابيهو، العازار او ايتامار پلار ؤ.

⁶¹مګر ناداب او ابيهو په هغه وخت کې مړه شول کله چې هغوی څښتن ته ناپاکه اور وړاندې کاوه.

⁶²د لاوي په قبيله کې ۲۳۰۰۰ تنه نارينه ؤو او په هغو کې داسې هلکان هم ؤو چې عمر يې لږ تر لږه يوه مياشت ؤ. د نورو قبيلو سره د هغوی نومونه په لست کې نه ؤو ځکه چې هغوی ته په کنعان کې ځمکه نه ورکول کېدله.

⁶³په هغه وخت کې چې اسرائيليانو د موآب په ډاګونو کې د اردن د سيند په بله غاړه اريحا ته مخامخ خېمې ودرولې وې، حضرت موسیٰ او العازار هغوی وشمېرل.

⁶⁴د هغو خلکو څخه چې حضرت موسیٰ او حضرت هارون د سينا په دښته کې شمېرلي ؤو، يو هم ژوندی پاتې نه ؤ.

⁶⁵څښتن فرمايلي ؤو چې پرته د يفنه د زوی کاليب او د نون زوی يوشع څخه نور ټول به په دښته کې مړه شي.