Read Pashto (Nangahari) — د پښتو مقدس کتاب شمېر 27 Bible Online

شمېر 27 - Pashto (Nangahari) — د پښتو مقدس کتاب bible

شمېر 27

¹محله، نوعه، حجله، ملکه او ترصه د صلفحاد لورګانې وې. صلفحاد د حافر زوی ؤ، حافر د جلعاد زوی ؤ، جلعاد د ماخير زوی ؤ، ماخير د منسي زوی ؤ او منسي د حضرت يوسف زوی ؤ.

²يوه ورځ د هغه لورګانې د مقدسې خېمې دروازې ته لاړلې او هلته يې د حضرت موسیٰ، العازار کاهن، د اسرائيلو نورو مشرانو او د اسرائيلو د ټول قوم سره ليدنه کتنه وکړه. هغوی وويل:

³”زمونږ پلار په دښته کې مړ شو او د هغه څخه هيڅ زامن پاتې نشول. هغه د قورح د پيروانو څخه چې د څښتن په مقابل کې يې سرکشي کړې وه، نه ؤ بلکه هغه د خپلې ګناه له کبله مړ شو.

⁴يوازې په دې خاطر چې هغه هيڅ زامن نه درلودل، ولې زمونږ د پلار نوم له خپلې طايفې څخه ورک شي؟ مونږ ته د خپل پلار د خپلوانو په منځ کې ځمکه راکړئ.“

⁵حضرت موسیٰ د هغوی دعوه څښتن ته وړاندې کړه

⁶او څښتن هغه ته وفرمايل:

⁷”د صلفحاد لورګانې چې څه غواړي هغه صحيح دي. هغوی ته د خپل پلار د خپلوانو په منځ کې ځمکه ورکړه. پرېږده چې د هغه ميراث د دوی شي.

⁸اسرائيليانو ته ووايه: کله چې يو سړی بې زويه مړ شي، د هغه لور ته به د هغه ځمکه په ميراث پاتې شي.

⁹که چېرې هغه هيڅ لور ونلري، د هغه ورونو ته به ځمکه په ميراث پاتې شي.

¹⁰مګر که چېرې هغه هيڅ ورونه ونلري، د هغه ترونو ته به ځمکه په ميراث پاتې شي.

¹¹که چېرې هغه ترونه ونلري، په هغه طايفه کې بايد د هغه ترټولو نژدې خپلوان ته د هغه ځمکه ورکړل شي. د اسرائيلو قوم بايد دا د يو قانوني شرط په توګه رعايت کړي، لکه څنګه چې ما څښتن تاته حکم وکړ.“

¹²څښتن حضرت موسیٰ ته وفرمايل: ”د عباريم غرونو ته وخېژه او هغه ځمکه وګوره چې زه يې اسرائيليانو ته ورکوم.

¹³کله چې ته هغه ووينې، نو د خپل ورور هارون په شان به مړ شې،

¹⁴ځکه چې تاسو دواړو د صين په دښته کې زما د امر څخه سرکشي وکړه. هغه وخت چې ټول قوم په مريبه کې زما په ضد شکايت وکړ، تاسو د هغوی په مخکې زما د پاک قدرت احترام ونه کړ.“ (مريبه په قادش کې د صين په دښته کې يوه چينه ده.)

¹⁵حضرت موسیٰ دعا وکړه:

¹⁶”ای څښتن خدايه، ای د ژوندون سرچينې، زه دعا کوم چې داسې يو نفر وټاکه چې د قوم مشري کولی شي.

¹⁷ستا قوم يو داسې نفر ته اړتيا لري چې په جګړه کې ورته لارښودنه وکړي. که نه، نو هغوی به د داسې مېږو په شان شي چې بې شپونه يو خوا او بل خوا سرګردانه ګرځي.“

¹⁸څښتن حضرت موسیٰ ته وفرمايل: ”د نون زوی يوشع لايق سړی دی، خپل لاس د هغه په سر باندې کېږده.

¹⁹بيا يې د العازار کاهن او اسرائيليانو په مخ کې ودروه او يوشع د هغوی د نوي مشر په توګه وټاکه.

²⁰د خپلو اختياراتو څخه دې لږ څه هغه ته ورکړه، ترڅو د اسرائيلو ټول قوم د هغه اطاعت وکړي.

²¹کله چې د څښتن څخه د لارښوونې د اخيستلو دپاره ضرورت پېښ شي نو يوشع بايد العازار ته ورشي. العازار به د اوريم او تميم په استعمالولو سره د هغه رضا معلومه کړي. په دې ډول به يوشع او د اسرائيلو ټول قوم ته معلومه شي چې څه بايد وکړي.“

²²څنګه چې څښتن حضرت موسیٰ ته حکم کړی ؤ، هغه هماغسې وکړل. هغه يوشع د العازار کاهن او د ټول قوم په مخکې ودراوه،

²³بيا هغه د يوشع په سر باندې خپل لاس کېښود او هغه يې د اسرائيلو مشر وټاکه.