Read Pashto (Nangahari) — د پښتو مقدس کتاب شمېر 28 Bible Online

شمېر 28 - Pashto (Nangahari) — د پښتو مقدس کتاب bible

شمېر 28

¹څښتن حضرت موسیٰ ته وفرمايل:

²”دا حکم د اسرائيلو قوم ته ورسوه او هغوی ته ووايه: ګورئ ماته به په ټاکلي وخت کې د نذرانو په خاطر هغه خواړه وړاندې کوئ چې په اور باندې تياريږي. د داسې نذرانې بوی په ما باندې ښه لګيږي.

³دا هغه نذرانې دي چې په اور باندې تياريږي او بايد څښتن ته د ورځينۍ سوزېدونکې نذرانې دپاره وړاندې شي: دوه يو کلن وري چې هيڅ عيب په کې نه وي.

⁴يو وری به په سهار کې قرباني کيږي او بل په ماښام کې.

⁵هر وری بايد د يو کيلوګرام ښو اوړو سره چې يو ليتر د زيتونو سوچه تېل ورسره ګډ وي د غلې دانې د نذرانې په توګه وړاندې شي.

⁶دا هغه ورځينۍ سوزېدونکې نذرانه ده چې د اول ځل دپاره د سينا د غره په څنګ کې څښتن ته د يوې خوشالوونکې خوشبويۍ په توګه وړاندې شوې وه.

⁷په آخر کې د دغو دوو نذرانو سره يو يو ليتر د انګورو شربت د څښلو د نذرانې په توګه بايد څښتن ته په قربانګاه باندې توی شي.

⁸دوهم وری په ماښام کې د غلې دانې او څښلو د هماغه شان نذرانې سره تيار کړئ کوم چې تاسو يې په سهار کې تياروئ. دا يوه داسې نذرانه ده چې په اور باندې تياريږي او يو داسې بوی دی چې په څښتن باندې ښه لګيږي.

⁹۹‏-۱۰ د هر سبت په ورځ بايد تاسو د عادي ورځينیو نذرانو څخه علاوه دوه يو کلن وري وړاندې کړئ. په دغو وريو کې بايد هيڅ عيب نه وي. هغه بايد د څښلو د نذرانې او د دوو کيلوګرامه ښو اوړو سره چې د زيتونو تېل ورسره ګډ وي يعنې د غلې دانې د نذرانې سره يوځای وړاندې شي.

¹¹د هرې مياشتې په اوله ورځ دوه ځوان غوايان، يو پسه او اوه يو کلن وري چې په ټولو کې هيڅ عيب نه وي، څښتن ته د سوزېدونکې نذرانې دپاره وړاندې کړئ.

¹²درې کيلوګرامه ښه اوړه چې د زيتونو تېل ورسره ګډ وي بايد د هر غويي سره د غلې دانې د نذرانې په توګه وړاندې شي. دوه کيلوګرامه اوړه چې تېل ورسره ګډ وي بايد د پسه سره وړاندې شي

¹³او يو کيلوګرام اوړه چې تېل ورسره ګډ وي بايد د هر وري سره وړاندې شي. دا د سوزېدونکې نذرانې دپاره دي، دا يوه داسې نذرانه ده چې بوی يې په څښتن باندې ښه لګيږي.

¹⁴۱۴‏-۱۵ د هر غويي سره دوه ليتره، د پسه سره يونيم ليتر او د هر وري سره يو ليتر د انګورو شربت د څښلو د نذرانې په توګه وړاندې کړئ. په آخر کې بايد يو وز د ګناه د نذرانې په توګه څښتن ته وړاندې کړئ. دا هغه سوزېدونکې نذرانې دي چې د ورځينیو عادي نذرانو څخه علاوه بايد د هرې مياشتې په اوله ورځ وړاندې شي.

¹⁶د هر کال د اولې مياشتې په څوارلسمه ورځ څښتن ته د احترام کولو په خاطر د فسحې اختر لمانځئ.

¹⁷په پنځلسمه ورځ به د فطيرې ډوډۍ اختر وي چې يوه هفته به دوام ومومي. په دې دوران کې بايد فطيره ډوډۍ وخوړل شي.

¹⁸د دې اختر په اوله ورځ بايد تاسو د عبادت دپاره سره راغونډ شئ او په دې ورځ بايد هيڅ ورځينی کار ونه کړئ.

¹⁹څښتن ته د سوزېدونکې نذرانې په توګه دوه ځوان غوايان، يو پسه او اوه يو کلن وري چې په ټولو کې هيڅ عيب نه وي وړاندې کړئ.

²⁰د هر غويي سره بايد درې کيلوګرامه ښه اوړه چې د زيتونو تېل ورسره ګډ وي د غلې دانې د نذرانې په توګه وړاندې شي. دوه کيلوګرامه اوړه چې تېل ورسره ګډ وي بايد د پسه سره وړاندې شي

²¹او يو کيلوګرام اوړه چې تېل ورسره ګډ وي بايد د هر وري سره وړاندې شي.

²²همدارنګه يو وز د ګناه د نذرانې په توګه وړاندې کړئ او په دې ډول د قوم دپاره کفاره ادا کړئ.

²³دا دې د عادي سهارنۍ سوزېدونکې نذرانې څخه علاوه وړاندې شي.

²⁴په دې ډول د اوو ورځو دپاره هره ورځ د عادي سوزېدونکې نذرانې او د هغې د څښلو د نذرانې څخه علاوه د هغې نذرانې دپاره خواړه تيار کړئ چې په اور باندې تياريږي. د هغې بوی په څښتن باندې ښه لګيږي.

²⁵په اوومه ورځ د عبادت دپاره سره راغونډ شئ او هيڅ ورځينی کار مه کوئ.

²⁶د لو کولو د اختر په اوله ورځ کله چې تاسو څښتن ته د نوې غلې دانې نذرانه وړاندې کوئ، بايد د عبادت دپاره سره راغونډ شئ او هيڅ ورځينی کار دې ونه کړای شي.

²⁷د دوه ځوانو غوايانو، يو پسه او اوه يو کلن وريو سوزېدونکې نذرانه چې ټول بايد بې عيبه وي وړاندې کړئ. د هغې خوشبويي په څښتن باندې ښه لګيږي.

²⁸د هر غويي سره دې درې کيلوګرامه ښه اوړه چې د زيتونو تېل ورسره ګډ وي او د هر پسه سره دوه کيلوګرامه اوړه چې تېل ورسره ګډ وي د غلې دانې د نذرانې په توګه وړاندې شي

²⁹او يو کيلوګرام د هر وري سره.

³⁰همدارنګه يو وز د ګناه د نذرانې په توګه وړاندې کړئ او په دې ډول د قوم دپاره کفاره ادا کړئ.

³¹دغه نذرانې او د څښلو نذرانه دې د ورځينۍ سوزېدونکې نذرانې او د غلې دانې د نذرانې څخه علاوه وړاندې شي. ګورئ چې په هغو ټولو حيواناتو کې بايد هيڅ عيب نه وي.