Read Pashto (Nangahari) — د پښتو مقدس کتاب شمېر 29 Bible Online

شمېر 29 - Pashto (Nangahari) — د پښتو مقدس کتاب bible

شمېر 29

¹هر کال د اوومې مياشتې په اوله ورځ تاسې د عبادت دپاره سره راغونډ شئ او بايد هيڅ ورځينی کار ونه کړئ. په هغې ورځ بايد سرني ووهل شي.

²څښتن ته سوزېدونکې نذرانه يعنې يوه خوشبويي چې په هغه باندې ښه لګيږي وړاندې کړئ: يو ځوان غويی، يو پسه او اوه يو کلن وري، ټول بايد بې عيبه وي.

³د غويي سره بايد درې کيلوګرامه ښه اوړه چې د زيتونو تېل ورسره ګډ وي د غلې دانې د نذرانې په توګه وړاندې شي. دوه کيلوګرامه اوړه چې تېل ورسره ګډ وي بايد د پسه سره وړاندې شي

⁴او يو کيلوګرام اوړه چې تېل ورسره ګډ وي بايد د هر وري سره وړاندې شي.

⁵همدارنګه يو وز د ګناه د نذرانې په توګه وړاندې کړئ او په دې ډول د قوم دپاره کفاره ادا کړئ.

⁶دا نذرانې دې د مياشتې د اولې ورځې د عادي سوزېدونکې نذرانې او د هغې د غلې دانې د نذرانې او ورځينۍ سوزېدونکې نذرانې او د هغې د غلې دانې د نذرانې او د څښلو د نذرانې څخه علاوه وړاندې شي. دا هغه نذرانې دي چې په اور باندې څښتن ته تياريږي او بوی يې په هغه باندې ښه لګيږي.

⁷د اوومې مياشتې په لسمه ورځ د عبادت دپاره راغونډ شئ. په دې ورځ روژه ونيسئ او کار مه کوئ.

⁸څښتن ته يوه سوزېدونکې نذرانه وړاندې کړئ، يعنې يوه خوشبويي چې په هغه باندې ښه لګيږي: يو ځوان غويی، يو پسه او اوه يو کلن وري، دا ټول بايد هيڅ عيب ونلري.

⁹د غويي سره بايد درې کيلوګرامه ښه اوړه چې د زيتونو تېل ورسره ګډ وي د غلې دانې د نذرانې په توګه وړاندې شي. دوه کيلوګرامه اوړه چې تېل ورسره ګډ وي بايد د پسه سره وړاندې شي

¹⁰او يو کيلوګرام اوړه چې تېل ورسره ګډ وي بايد د هر وري سره وړاندې شي.

¹¹همدارنګه علاوه د هغه وز څخه چې د خلکو د کفارې دپاره قرباني کيږي، د ورځينۍ سوزېدونکې نذرانې او د هغې د غلې دانې د نذرانې او د څښلو له نذرانې څخه يو وز د ګناه د نذرانې په توګه قرباني کړئ.

¹²د اوومې مياشتې په پنځلسمه ورځ د عبادت دپاره سره راغونډ شئ. اوه ورځې دا اختر څښتن ته د احترام کولو دپاره ولمانځئ او هيڅ ورځينی کار مه کوئ.

¹³په اوله ورځ څښتن ته ديارلس ځوان غوايان، دوه پسونه او څوارلس يو کلن وري چې په ټولو کې هيڅ عيب نه وي د سوزېدونکې نذرانې په توګه وړاندې کړئ. د داسې نذرانې بوی په څښتن باندې ښه لګيږي.

¹⁴د هر غويي سره بايد درې کيلوګرامه ښه اوړه چې د زيتونو تېل ورسره ګډ وي د غلې دانې د نذرانې په توګه وړاندې کړئ. دوه کيلوګرامه اوړه چې تېل ورسره ګډ وي بايد د هر پسه سره وړاندې کړئ

¹⁵او يو کيلوګرام اوړه چې تېل ورسره ګډ وي بايد د دې څوارلسو وريو څخه د هر وري سره وړاندې کړئ.

¹⁶همدارنګه يو وز د ګناه د نذرانې په توګه وړاندې کړئ. دا دې د ورځينۍ سوزېدونکې نذرانې او د هغې د غلې دانې او څښلو د نذرانې څخه علاوه وړاندې شي.

¹⁷په دوهمه ورځ دولس ځوان غوايان، دوه پسونه او څوارلس يو کلن وري وړاندې کړئ، دا ټول دې هيڅ عيب ونلري.

¹⁸۱۸‏-۱۹ د هغو سره نورې ټولې هغه نذرانې وړاندې کړئ چې د اولې ورځې دپاره ورته ضرورت ؤ.

²⁰په دريمه ورځ يوولس غوايان، دوه پسونه او څوارلس يو کلن وري وړاندې کړئ، دا ټول دې هيڅ عيب ونلري.

²¹۲۱‏-۲۲ د هغو سره نورې ټولې هغه نذرانې وړاندې کړئ چې د اولې ورځې دپاره ورته ضرورت ؤ.

²³په څلورمه ورځ لس غوايان، دوه پسونه او څوارلس يو کلن وري وړاندې کړئ، دا ټول دې هيڅ عيب ونلري.

²⁴۲۴‏-۲۵ د هغو سره نورې ټولې هغه نذرانې وړاندې کړئ چې د اولې ورځې دپاره ورته ضرورت ؤ.

²⁶په پنځمه ورځ نهه غوايان، دوه پسونه او څوارلس يو کلن وري وړاندې کړئ، دا ټول دې هيڅ عيب ونلري.

²⁷۲۷‏-۲۸ د هغو سره نورې ټولې هغه نذرانې وړاندې کړئ چې د اولې ورځې دپاره ورته ضرورت ؤ.

²⁹په شپږمه ورځ اته غوايان، دوه پسونه او څوارلس يو کلن وري وړاندې کړئ، دا ټول دې هيڅ عيب ونلري.

³⁰۳۰‏-۳۱ د هغو سره نورې ټولې هغه نذرانې وړاندې کړئ چې د اولې ورځې دپاره ورته ضرورت ؤ.

³²په اوومه ورځ اوه غوايان، دوه پسونه او څوارلس يو کلن وري وړاندې کړئ، دا ټول دې هيڅ عيب ونلري.

³³۳۳‏-۳۴ د هغو سره نورې ټولې هغه نذرانې وړاندې کړئ چې د اولې ورځې دپاره ورته ضرورت ؤ.

³⁵په اتمه ورځ د عبادت دپاره راغونډ شئ او هيڅ ورځينی کار مه کوئ.

³⁶څښتن ته يو ځوان غويی، يو پسه او اوه يو کلن وري چې په ټولو کې کوم عيب نه وي د يوې سوزېدونکې نذرانې په توګه وړاندې کړئ. د داسې نذرانې بوی په هغه باندې ښه لګيږي.

³⁷۳۷‏-۳۸ د هغو سره نورې ټولې هغه نذرانې وړاندې کړئ چې د اولې ورځې دپاره ورته ضرورت ؤ.

³⁹دا مقررات د سوزېدونکو نذرانو، د غلو دانو د نذرانو، د څښلو د نذرانو او د سلامتۍ د نذرانو په باره کې دي چې تاسو يې بايد په خپلو ټاکل شويو اخترونو کې څښتن ته ورکړئ. دا د هغو نذرانو څخه علاوه دي کوم چې تاسو يې د نذر د ورکولو يا د رضاکارانه نذرانو په توګه ورکوئ.“

⁴⁰نو حضرت موسیٰ د اسرائيلو قوم ته هغه ټول شيان وويل چې څښتن ورته حکم کړی ؤ.