Read Pashto (Nangahari) — د پښتو مقدس کتاب شمېر 3 Bible Online

شمېر 3 - Pashto (Nangahari) — د پښتو مقدس کتاب bible

شمېر 3

¹دا د حضرت موسیٰ او حضرت هارون د کورنۍ د هغه وخت قصه ده کله چې څښتن د حضرت موسیٰ سره د سينا په غره کې خبرې وکړې.

²حضرت هارون څلور زامن درلودل: ناداب چې مشر ؤ، ابيهو، العازار او ايتامار.

³هغوی مسح کړای شول او د کاهنانو په توګه وټاکل شول.

⁴مګر ناداب او ابيهو د څښتن په حضور کې په داسې وخت کې مړه شول کله چې هغوی د سينا په دښته کې څښتن ته ناپاکه اور وړاندې کاوه. هغوی اولادونه نه درلودل، نو العازار او ايتامار د حضرت هارون د ژوندانه په دوران کې د کاهنانو په توګه خدمت وکړ.

⁵څښتن حضرت موسیٰ ته وفرمايل:

⁶”د لاويانو قبيله راوله او د هارون کاهن د خدمتګارانو په توګه يې وټاکه.

⁷دوی به په مقدسه خېمه کې کار کوي او د هارون او ټول قوم دپاره به وظيفې سرته رسوي.

⁸هغوی به د مقدسې خېمې د ټول سامان مسئوليت په غاړه واخلي او د نورو اسرائيليانو دپاره به وظيفې اجرا کوي.

⁹د لاويانو مسئوليت دا دی چې د هارون او د هغه د زامنو خدمت وکړي.

¹⁰هارون او د هغه زامن د کاهنانو په توګه د خدمت دپاره وټاکه. که بل هرڅوک مقدس ځای ته ورنژدې شي بايد ووژل شي.“

¹¹بيا څښتن حضرت موسیٰ ته وفرمايل:

¹²۱۲‏-۱۳ ”اوس دې لاويان زما شي. کله چې ما د مصريانو ټول مشران زامن او اولني زېږېدلي حيوانات ووژل، دا پرېکړه مې وکړه چې په هرې اسرائيلي کورنۍ کې مشران زامن او د هغوی د رمو او پادو څخه هر اولنی زېږېدلی نر حيوان به زما وي. مګر اوس ما د اسرائيلو د ټولو مشرانو زامنو په ځای لاويان انتخاب کړي دي. زه څښتن يم.“

¹³

¹⁴څښتن حضرت موسیٰ ته د سينا په دښته کې وفرمايل:

¹⁵”لاويان کورنۍ په کورنۍ او طايفه په طايفه وشمېره. هر نارينه چې عمر يې يوه مياشت يا زيات وي وشمېره.“

¹⁶نو څنګه چې څښتن ورباندې امر کړی ؤ، حضرت موسیٰ هغوی وشمېرل.

¹⁷۱۷‏-۲۰ د لاوي درې زامن ؤو: جرشون، قهات او مراري. هغوی د هغو طايفو نيکونه ؤو چې د هغوی په نوم ياديږي. د جرشون دوه زامن ؤو: لبني او شمعي. د قهات څلور زامن ؤو: عمرام، يصهار، حبرون او عزيئيل. د مراري دوه زامن ؤو: محلي او موشي. هغوی د هغو کورنيو نيکونه ؤو چې د هغوی په نوم ياديږي.

¹⁸

¹⁹

²⁰

²¹لبنيان او شمعيان د جرشونيانو طايفې وې.

²²د هغو نارينه جرشونيانو ټول شمېر چې عمر يې يوه مياشت يا زيات ؤ او وشمېرل شول، ۷۵۰۰ تنه ؤو.

²³دغو طايفو د مقدسې خېمې شاته يعنې لويديځ خواته خېمې ودرولې.

²⁴د جرشونيانو د کورنيو مشر د لايل زوی الياساف ؤ.

²⁵په مقدسه خېمه کې جرشونيان د دغو شيانو د ساتنې مسئولان ؤو: د خېمې، د هغې د پوښونو، د خېمې د دروازې د پردې،

²⁶د حويلۍ د پردو، د هغې حويلۍ د دروازې د پردې چې د مقدسې خېمې او قربانۍ د ځای ګردچاپېره ده او د هغو د رسۍ ګانو. هغوی د دې ټول سامان او په هغه پورې د اړونده کارونو مسئوليت په غاړه درلود.

²⁷عمراميان، يصهاريان، حبرونيان او عزيئيليان د قهاتيانو طايفې وې.

²⁸د هغو نارينه قهاتيانو ټول شمېر چې عمر يې يوه مياشت يا زيات ؤ ۸۶۰۰ تنه ؤو. قهاتيانو د مقدس ځای د ساتنې مسئوليت په غاړه درلود.

²⁹دغو طايفو د مقدسې خېمې جنوب خواته خېمې ودرولې.

³⁰د قهاتيانو د طايفو د کورنيو مشر د عزيئيل زوی اليصافان ؤ.

³¹د دغو شيانو مسئوليت د هغوی په غاړه ؤ: د لوظ صندوق، مېز، څراغدان، د قربانۍ د ځايونو، هغه لوښي چې کاهنانو په مقدس ځای کې ورڅخه کار اخيست او د ډېر مقدس ځای د دروازې پرده. هغوی د دې ټول سامان او په هغه پورې د اړونده کارونو مسئوليت په غاړه درلود.

³²د لاويانو د مشرانو رئيس د حضرت هارون کاهن زوی العازار ؤ. هغه په هغو خلکو باندې مقرر شوی ؤ چې د مقدس ځای د ساتنې مسئولان ؤو.

³³محليان او موشيان د مراريانو طايفې وې.

³⁴د هغو نارينه مراريانو ټول شمېر چې عمر يې يوه مياشت يا زيات ؤ او وشمېرل شول ۶۲۰۰ تنه ؤو.

³⁵د مراريانو د طايفو د کورنيو مشر د ابيحايل زوی صوريئيل ؤ. هغوی د مقدسې خېمې شمال خواته خېمې ودرولې.

³⁶مراريان د دې دپاره ټاکل شوي ؤو چې د مقدسې خېمې په چوکاټونو، د هغې په اړمونو، ستنو، پايو او د هغې د ټول سامان ساتنه وکړي. هغوی د دې ټول سامان او په هغه پورې د اړونده کارونو مسئوليت په غاړه درلود.

³⁷همدارنګه هغوی د ستنو، پايو، مېخونو او د هغو رسۍ ګانو مسئوليت په غاړه درلود چې د شاوخوا حويلۍ دپاره وې.

³⁸حضرت موسیٰ او حضرت هارون او د حضرت هارون زامنو د مقدسې خېمې لمرخاته خواته يعنې د مقدسې خېمې په مخ کې خېمې ودرولې. هغوی د هغو کارونو د سرته رسولو مسئوليت په غاړه درلود چې د اسرائيلو د قوم دپاره په مقدس ځای کې ترسره کېدل. بل هرڅوک به چې مقدس ځای ته ورنژدې کېده، هغه به وژل کېده.

³⁹د هغو ټولو نارينه لاويانو شمېر چې عمر يې يوه مياشت يا زيات ؤ او حضرت موسیٰ او حضرت هارون د څښتن په امر طايفه په طايفه وشمېرل، ټول ۲۲۰۰۰ تنه ؤو.

⁴⁰څښتن حضرت موسیٰ ته وفرمايل: ”د اسرائيلو ټول مشران زامن چې عمر يې يوه مياشت يا زيات وي وشمېره او د هغوی د نومونو يو لست تيار کړه.

⁴¹د اسرائيلو د ټولو مشرانو زامنو په ځای زما دپاره لاويان واخله او د هغوی د ټولو اولنيو زېږېدليو حيواناتو په ځای زما دپاره د لاويانو حيوانات واخله. زه څښتن يم.“

⁴²نو څنګه چې څښتن په حضرت موسیٰ باندې امر کړی ؤ، هغه د اسرائيلو ټول مشران زامن وشمېرل.

⁴³د نارينه مشرانو ټول شمېر چې عمر يې يوه مياشت يا زيات ؤ او د هر يو نوم په لست کې ليکل شوی ؤ ۲۲۲۷۳ تنه ؤو.

⁴⁴بيا څښتن حضرت موسیٰ ته وفرمايل:

⁴⁵”اوس د اسرائيلو د ټولو مشرانو زامنو په ځای لاويان وقف کړه او د لاويانو حيوانات د هغوی د حيواناتو په ځای وقف کړه. لاويان دې زما شي. زه څښتن يم.

⁴⁶په دې خاطر چې د اسرائيلو مشران زامن د لاويانو په پرتله ۲۷۳ تنه زيات دي، نو ته بايد اضافي زامن بېرته په بيه واخلې.

⁴⁷د هر نفر دپاره د مقدس ځای د مثقال په مطابق پنځه پنځه مثقاله سپين زر راټول کړه

⁴⁸او هغه هارون او د هغه زامنو ته ورکړه.“

⁴⁹حضرت موسیٰ د ۲۷۳ اضافي مشرانو زامنو څخه سپين زر راټول کړل

⁵⁰چې د هغو وزن د مقدس ځای د مثقال په مطابق ۱۳۶۵ مثقاله ؤ.

⁵¹هغه يې د څښتن د حکم سره سم حضرت هارون او د هغه زامنو ته ورکړل.