Read Pashto (Nangahari) — د پښتو مقدس کتاب شمېر 30 Bible Online

شمېر 30 - Pashto (Nangahari) — د پښتو مقدس کتاب bible

شمېر 30

¹حضرت موسیٰ د اسرائيلو د قبيلو مشرانو ته د څښتن دغه حکمونه ورکړل:

²”کله چې يو سړی څښتن ته يو شی نذر ورکوي، يا داسې قسم وخوري چې د ځينو شيانو څخه به ځان لېرې ساتي، نو هغه بايد خپله وعده ماته نه کړي، بلکه څه چې يې ويلي دي هغه دې سرته ورسوي.

³که چېرې يوه پېغله چې د خپل پلار په کور کې اوسيږي څښتن ته کوم شی نذر ورکوي يا داسې وعده کوي چې د ځينو شيانو څخه به ځان لېرې ساتي،

⁴که چېرې د هغې پلار له هغې څخه خبر شي او څه ونه وايي، نو هغه بايد خپل نذر ورکړي يا خپله وعده پوره کړي.

⁵مګر که چېرې د هغې پلار له هغې څخه خبر شي او هغه د نذر ورکولو څخه منع کړي، هغه د خپلې وعدې په پوره کولو باندې مجبوره نه ده. څښتن به هغه وبخښي ځکه چې پلار يې منع کړې ده.

⁶۶‏-۷ فرض کړئ يوې پېغلې څښتن ته نذر منلی وي او يا يې کومه وعده کړې وي او بيا واده شي. که چېرې د هغې مېړه د نذر په هکله وروسته خبر شي او څه ونه وايي نو څه چې هغې ويلي دي هغه دې سرته ورسوي، که هغې يې نيت درلود يا نه.

⁸مګر که چېرې د هغې مېړه ورڅخه خبر شي او هغه د نذر د پوره کولو څخه منع کړي، نو هغه ښځه د خپلې وعدې په پوره کولو باندې مجبوره نه ده. څښتن به هغه وبخښي.

⁹کونډې او طلاق شوې ښځې بايد هر هغه نذر او يا خپله وعده سرته ورسوي چې څښتن سره يې کړې ده.

¹⁰فرض کړئ يوه واده شوې ښځه څښتن ته يو نذر ومني او يا کومه وعده وکړي.

¹¹که چېرې د هغې مېړه ورڅخه خبر شي او څه ونه وايي، نو هغې ښځې چې کومه وعده کړې يا هر نذر چې هغې منلی وي بايد هغه سرته ورسوي.

¹²مګر که چېرې د هغې مېړه خبر شي او هغه د نذر د پوره کولو څخه منع کړي، نو هغه يې په سرته رسولو مجبوره نه ده. څښتن به هغه وبخښي، ځکه چې مېړه يې د نذر پوره کولو څخه منع کړې ده.

¹³د هغې مېړه دا حق لري چې کوم نذر هغې منلی دی او يا يې کومه وعده کړې ده، هغه تائيد او يا باطل کړي.

¹⁴که چېرې د هغې مېړه په هماغه ورځ د نذر څخه خبر شي او څه ونه وايي، نو د هر شي نذر چې هغې منلی وي او يا يې وعده کړې وي هغه بايد سرته ورسوي.

¹⁵مګر که چېرې د هغې مېړه دا نذر وروسته باطل کړي، نو د هغې ګناه به د هغه په غاړه وي.“

¹⁶دا هغه قوانين دي چې څښتن حضرت موسیٰ ته د هغو نذرونو په باره کې ورکړل چې د پېغلو له خوا چې د پلار په کور کې اوسيږي ورکول کيږي او د هغو ښځو له خوا چې واده شوې وي.