Read Pashto (Nangahari) — د پښتو مقدس کتاب شمېر 31 Bible Online

شمېر 31 - Pashto (Nangahari) — د پښتو مقدس کتاب bible

شمېر 31

²”څه چې مديانيانو د اسرائيلو د خلکو سره کړي ؤو، د هغه په خاطر هغوی ته سزا ورکړه. چې کله دې دا کار وکړ، بيا به مړ شې.“

³بيا حضرت موسیٰ قوم ته وفرمايل: ”د جګړې دپاره تيار شئ، ترڅو وکولی شئ چې د څښتن په امر د مديانيانو څخه بدل واخلئ او هغوی ته سزا ورکړئ.

⁴د اسرائيلو د هرې قبيلې څخه زر تنه جنګ ته ولېږئ.“

⁵نو د هرې قبيلې څخه زر تنه انتخاب شول، ټول ۱۲۰۰۰ تنه د جګړې دپاره تيار شول.

⁶حضرت موسیٰ هغوی جګړې ته ولېږل او د العازار کاهن زوی فينحاس د هغوی سره ؤ. هغه د مقدسې خېمې څخه لږ سامان او سرني واخيستل چې د جګړې د اعلانولو د اشارې دپاره ووهل شي.

⁷څنګه چې څښتن په حضرت موسیٰ باندې امر کړی ؤ، اسرائيليانو د مديانيانو سره جګړه وکړه او د هغوی ټول نارينه يې ووژل.

⁸په هغو کې د مديان پنځه پادشاهان يعنې اوي، راقم، صور، حور او رابع هم شامل ؤو. همدارنګه هغوی د بعور زوی بلعام هم وواژه.

⁹د اسرائيلو خلکو د مديانيانو ښځې او ماشومان ونيول، د هغوی ټولې پادې او رمې يې بوتللې او ټوله شتمني يې ورته لوټ کړه

¹⁰او د هغوی ټول ښارونه او کمپونه يې وسوزول.

¹¹هغه ټول غنيمت چې هغوی نيولی ؤ او په هغه کې اسيران او حيوانات هم شامل ؤو واخيستل

¹²او هغه يې حضرت موسیٰ، العازار او د اسرائيلو قوم ته هغه کمپ ته چې د موآب په ډاګونو کې د اردن د سيند په بله غاړه اريحا ته مخامخ ؤ راوړل.

¹³حضرت موسیٰ، العازار او د قوم ټول مشران د کمپ څخه د هغوی مخې ته ورووتل.

¹⁴حضرت موسیٰ د لښکرو په قوماندانانو باندې چې د جګړې څخه راستانه شوي ؤو، په قهر شو.

¹⁵له هغوی څخه يې پوښتنه وکړه: ”تاسو ولې ټولې ښځې ژوندۍ پريښې دي؟

¹⁶هغوی هغه څوک دي چې د بلعام په مشوره يې عمل کړی ؤ او زمونږ خلکو ته يې بلنه ورکړې وه چې د بعل فغور د خدای عبادت وکړي. ځکه څښتن مونږ ته سزا راکړه او په خپل قوم باندې يې وبا راوستله.

¹⁷نو اوس ټول هلکان ووژنئ او هره ښځه چې د کوم سړي سره يوځای شوې وي ووژنئ،

¹⁸مګر ټولې پېغلې انجونې ژوندۍ پرېږدئ او هغوی د خپلو ځانونو دپاره وساتئ.“

¹⁹بيا حضرت موسیٰ جنګياليانو ته وفرمايل: ”که چېرې ستاسو څخه چا څوک وژلی وي يا مو يو مړي ته لاس وروړی وي، بايد اوه ورځې د کمپ څخه دباندې پاتې شي. په دريمه او اوومه ورځ بايد تاسو خپل ځانونه او هغه ښځې چې تاسو اسيرانې نيولې دي، پاکې کړئ.

²⁰همدارنګه هغه ټول کالي او ټول شيان چې د څرمنې، د وزو د وړيو او لرګيو څخه جوړ شوي وي هم پاک کړئ.“

²¹العازار کاهن هغو نفرو ته چې د جګړې څخه راستانه شوي ؤو وويل: ”دا هغه مقررات دي چې څښتن حضرت موسیٰ ته ورکړي دي:

²²سره زر، سپين زر، برنج، اوسپنه، قلعي او سرپ

²³او نور ټول هغه شيان چې نه سوزي، بايد په سره اور کې واچول شي او هغه به پاک شي. خو هغه هم بايد د هغو اوبو په وسيله پاک شي کومې چې د پاکوالي دپاره استعماليږي او هغه شيان چې په اور کې سوزي بايد د اوبو په وسيله پاک شي.

²⁴په اوومه ورځ بايد خپل کالي ومينځئ، بيا به په مذهبي لحاظ پاک شئ او کمپ ته د ننوتلو اجازه به ولرئ.“

²⁵څښتن حضرت موسیٰ ته وفرمايل:

²⁶”بايد ته او العازار د قوم د نورو مشرانو سره د اسيرانو او حيواناتو په شمول هغه ټول شيان وشمارئ چې د مديانيانو څخه نيول شوي دي.

²⁷هغه نيول شوي شيان په دوه مساوي برخو ووېشئ، يوه برخه يې هغو جنګياليو ته چې جګړې ته تللي ؤو او بله برخه يې پاتې قوم ته ورکړئ.

²⁸د هغو جنګياليانو د برخې څخه چې په جګړه کې جنګېدلي دي، د هرو پنځو سوو اسيرانو، غوايانو، خرو، پسونو او يا وزو څخه يو يو څښتن ته د هغه د برخې په توګه بېل کړئ.

²⁹هغه څښتن ته د خاصې اعانې په توګه العازار ته ورکړئ.

³⁰د پاتې قوم له برخې څخه د هرو پنځوسو اسيرانو څخه يو او هماغه شان د پنځوسو غوايانو، خرو، پسونو او وزو څخه يو يو واخلئ او هغو لاويانو ته يې ورکړئ چې د مقدسې خېمې مسئولان دي.“

³¹څښتن چې کوم حکم کړی ؤ، حضرت موسیٰ او العازار هماغسې وکړل.

³²۳۲‏-۳۵ دا د هغو شيانو لست دی چې د جنګياليانو له خوا نيول شوي ؤو، يعنې دا برسېره پر هغو شيانو دي کوم چې هغوی د خپلو ځانونو دپاره ساتلي ؤو: ۶۷۵۰۰۰ پسونه او وزې، ۷۲۰۰۰ غوايان، ۶۱۰۰۰ خره او ۳۲۰۰۰ پېغلې.

³³

³⁴

³⁵

³⁶۳۶‏-۴۰ د جنګياليانو په نيمايي برخه کې ۳۳۷۵۰۰ پسونه او وزې وې، چې له هغو څخه ۶۷۵ يې د څښتن برخه وه. ۳۶۰۰۰ په کې غوايان ؤو، چې له هغو څخه ۷۲ يې د څښتن برخه وه. ۳۰۵۰۰ په کې خره ؤو، چې له هغو څخه ۶۱ يې د څښتن برخه وه او ۱۶۰۰۰ په کې پېغلې شاملې وې، چې له هغو څخه ۳۲ تنه يې د څښتن برخه وه.

³⁷

³⁸

³⁹

⁴⁰

⁴¹نو څنګه چې څښتن حکم کړی ؤ، حضرت موسیٰ د څښتن ټوله برخه العازار کاهن ته ورکړه.

⁴²۴۲‏-۴۶ د قوم برخه کټ مټ هماغه شان وه لکه څنګه چې د جنګياليانو وه: ۳۳۷۵۰۰ پسونه او وزې، ۳۶۰۰۰ غوايان، ۳۰۵۰۰ خره او ۱۶۰۰۰ پېغلې.

⁴³

⁴⁴

⁴⁵

⁴⁶

⁴⁷له دې برخې څخه حضرت موسیٰ له هرو پنځوسو اسيرانو او حيواناتو څخه يو يو واخيست او هغه يې د څښتن د حکم له مخې لاويانو ته چې د مقدسې خېمې مسئولان ؤو، ورکړل.

⁴⁸د لښکرو قوماندانان حضرت موسیٰ ته ورغلل

⁴⁹او ورته ويې ويل: ”باداره، مونږ خپلې لښکرې وشمېرلې، يو نفر هم کم نه دی.

⁵⁰نو مونږ به د سرو زرو ګاڼې، بازوبندونه، بنګړي، ګوتې، غوږوالۍ او غاړکۍ چې مونږ هر يو نيولي دي راوړي دي. مونږ هغه څښتن ته د خپل ژوند د بيې د ادا کولو دپاره وړاندې کوو، ترڅو هغه زمونږ ساتنه وکړي.“

⁵¹حضرت موسیٰ او العازار هغه سره زر واخيستل چې ټول د ګاڼو په شکل کې ؤو.

⁵²د قوماندانانو د ټولې اعانې وزن نژدې دوه سوه کيلوګرامه ؤ.

⁵³په دې کې هغه شيان شامل نه ؤو کوم چې جنګياليانو د خپلو ځانونو دپاره ساتلي ؤو.

⁵⁴نو حضرت موسیٰ او العازار سره زر مقدسې خېمې ته راوړل ترڅو اسرائيليان هغه د يادګار په توګه وساتي چې څښتن د هغوی سره مرسته کړې وه.