Read Pashto (Nangahari) — د پښتو مقدس کتاب شمېر 33 Bible Online

شمېر 33 - Pashto (Nangahari) — د پښتو مقدس کتاب bible

شمېر 33

¹وروسته له دې چې اسرائيليان د حضرت موسیٰ او حضرت هارون تر مشرۍ لاندې د مصر څخه لاړل، نو د هغوی د سفر مختلفې مرحلې په لاندې ډول وې:

²د څښتن په امر حضرت موسیٰ د هغه ځای نوم ليکه چې هرځل به هغوی خپلې خېمې په کې ودرولې.

³۳‏-۴ اسرائيليان د اولې مياشتې په پنځلسمه ورځ د اولنۍ فسحې په سبا د مصر د رعمسيس د ښار څخه لاړل. يوه ورځ مخکې څښتن د مصر خدايانو ته سزا ورکړې وه او په هرې مصري کورنۍ کې يې هر مشر زوی وژلی ؤ. نو په داسې حال کې چې مصريانو مړي ښخول، هغوی اسرائيليان ليدل چې په وياړ سره د هغوی د هېواد څخه تلل.

⁵د اسرائيلو قوم د رعمسيس څخه لاړ او په سوکوت کې يې خېمې ودرولې

⁶او د هغه ځای څخه لاړل او په ايتام کې يې چې د دښتې په يوه څنډه کې پروت ؤ خېمې ودرولې.

⁷له هغه ځای څخه فم الحيروت ته چې د بعل صفون په ختيځ کې ؤ، بېرته راستانه شول او مجدل ته نژدې يې خېمې ودرولې.

⁸هغوی د فم الحيروت څخه لاړل، د سرې بحيرې څخه تېر شول، درې ورځې يې د ايتام په دښته کې سفر وکړ او په ماره کې يې خېمې ودرولې.

⁹بيا هغوی په ايليم کې خېمې ودرولې چېرته چې د اوبو دولس چينې او اويا د خرما ونې وې.

¹⁰هغوی د ايليم څخه لاړل او د سرې بحيرې په غاړه يې خېمې ودرولې.

¹¹د سرې بحيرې څخه روان شول او د سين په دښته کې يې خېمې ودرولې.

¹²بيا د سين له دښتې څخه لاړل او په دفقه کې يې خېمې ودرولې.

¹³د دفقه څخه لاړل او په الوش کې يې خېمې ودرولې.

¹⁴د الوش څخه لاړل او په رفيديم کې يې خېمې ودرولې، چېرته چې د خلکو دپاره د څښلو اوبه نه وې.

¹⁵هغوی د رفيديم څخه لاړل او په آخر کې د سينا دښتې ته ورسېدل.

¹⁶۱۶‏-۳۶ څنګه چې اسرائيليانو د سينا له دښتې څخه قادش ته چې د صين په دښته کې ؤ سفر کاوه، هغوی په دغو ځايونو کې خېمې ودرولې: قبروت هتاوه، حصيروت، رتمه، رمون فارص، لبنه، رسه، قهيلاته، د شافر غر، حراده، مقهيلوت، تاحت، تارح، متقه، حشمونه، مسيروت، بني يعقان، حورالجدجاد، يطبات، عبرونه، عصيون جابر او په آخر کې قادش.

³⁷کله چې هغوی د قادش څخه لاړل، د هور د غره په څنګ کې يې د ادوم په سرحد کې خېمې ودرولې.

³⁸دا هغه ځای دی چېرته چې څښتن په حضرت هارون کاهن باندې امر وکړ چې د غره سرته وخېژي. حضرت هارون هلته د پنځمې مياشتې په اوله ورځ څلوېښت کاله وروسته له دې چې اسرائيليان د مصر څخه تللي ؤو، مړ شو.

³⁹په هغه وخت کې حضرت هارون د يوسلو درويشتو کالو په عمر ؤ.

⁴⁰د عراد کنعاني پادشاه چې د کنعان په جنوب کې اوسېده واورېدل چې اسرائيليان راروان دي.

⁴¹۴۱‏-۴۷ اسرائيليان د هور د غره څخه د موآب په لور روان شول. په لاره کې هغوی په دغو ځايونو کې خېمې ودرولې: صلمونه، فونون، اوبوت، عيی عباريم چې د موآب په سيمه کې ؤ، ديبون جاد، علمون دبلاتايم، د نبو غره ته نژدې يو ځای چې د عباريم په غرونو کې ؤ

⁴⁸او په آخر کې د موآب په ډاګونو کې د اردن د سيند په بله غاړه اريحا ته مخامخ.

⁴⁹د هغوی کمپ د بيت يشيموت څخه تر آبل شطيم پورې غزېدلی ؤ.

⁵⁰کله چې د اسرائيلو قوم د موآب په ډاګونو کې د اردن د سيند په غاړه اريحا ته مخامخ خېمې ودرولې وې، څښتن حضرت موسیٰ ته وفرمايل چې

⁵¹هغوی ته دا پيغام ورسوي: ”کله چې تاسو د اردن د سيند څخه تېر شئ او کنعان ته ورننوزئ،

⁵²بايد د هغه ځای ټول اوسېدونکي وشړئ. د هغوی ټول د تيږو او فلزي بتان او ټولې عبادتخانې له منځه يوسئ.

⁵³هغه خاوره ونيسئ او په هغې کې واوسېږئ، ځکه چې هغه مې تاسو ته درکړې ده.

⁵⁴هغه ځمکه د مختلفو قبيلو او طايفو ترمنځ د پچې په اساس ووېشئ، لويې طايفې ته زياته ځمکه او کوچنۍ طايفې ته لږه ځمکه ورکړئ.

⁵⁵که چېرې د هغه ځای ټول اوسېدونکي ونه شړئ، هغوی به ستاسو په سترګو کې د ازغيو او ستاسو په بدنونو کې به د کرکڼو په شان شي. هغوی به تل تاسو ته تکليف درکوي.

⁵⁶که چېرې تاسو هغوی ونه شړئ، زه به تاسو تباه کړم لکه څنګه چې مې د هغوی د تباه کولو پلان جوړ کړی دی.“