Read Pashto (Nangahari) — د پښتو مقدس کتاب شمېر 34 Bible Online

شمېر 34 - Pashto (Nangahari) — د پښتو مقدس کتاب bible

شمېر 34

¹څښتن حضرت موسیٰ ته وفرمايل

²چې د اسرائيلو قوم ته داسې حکم وکړي: ”کله چې تاسو د کنعان خاورې ته ورننوزئ، يعنې هغې خاورې ته چې تاسو ته يې درکوم، نو ستاسو سيمه به دغه سرحدونه ولري:

³جنوبي سرحد به د صين دښته او د ادوم شمال لويديځ سرحد وي. دا سرحد به د آرام د درياب په جنوبي آخري سر کې شروع شي.

⁴له هغه ځای څخه به هغه د لويديځ خواته ورسيږي، مګر د جنوب خواته به وروګرځي چې د عقربيم غاښی، د صين کلی او د قادش برنيع ښار په کې شامل شي. له هغه ځای څخه به دا سرحد حصرادار او عصمون ته ورسيږي،

⁵چېرته چې به هغه د هغه خوړ په لوري وروګرځي کوم چې د مصر په سرحد کې دی او د مديترانې په بحيره کې به ختم شي.

⁶د مديترانې بحيره به لويديځ سرحد وي.

⁷شمالي سرحد به د مديترانې په بحيره کې شروع شي بيا به د ختيځ په لور د هور غره ته ورسيږي.

⁸له هغې وروسته به هغه د حمات د غاښي په لار صدد ته ورسيږي.

⁹د صدد څخه به سرحد په ختيځ کې زفرون ته ورسيږي او په حصرعينان کې به ختم شي.

¹⁰ختيځ سرحد به په شمال کې په حصرعينان کې شروع شي بيا به جنوب خواته شفام

¹¹او ربله ته ورسيږي چې د عين په ختيځې خوا کې دی. له هغه ځای څخه به هغه د جنوب په لور د جليل د جهيل ختيځو غونډيو ته ورسيږي،

¹²بيا به د اردن د سيند په لار د آرام د درياب د شمالي برخې آخري سرته ورسيږي. کومه ځمکه چې د هغو څلورو سرحدونو په منځ کې وي هغه به ستاسو شي.“

¹³نو حضرت موسیٰ اسرائيليانو ته داسې حکم وکړ: ”دا هغه ځمکه ده چې تاسو به يې د پچې اچولو له مخې ترلاسه کړئ، يعنې هغه ځمکه چې څښتن د نهه نيمو قبيلو دپاره ټاکلې ده.

¹⁴د روبين، جاد او د منسي نيمې قبيلې خپله ځمکه ترلاسه کړې ده چې د هغوی د کورنيو له مخې وېشل شوې ده.

¹⁵دا اريحا ته مخامخ د اردن د سيند په ختيځ کې ده.“

¹⁶څښتن حضرت موسیٰ ته وفرمايل:

¹⁷”العازار کاهن او د نون زوی يوشع به خلکو ته ځمکه ووېشي.

¹⁸د هرې قبيلې څخه يو يو مشر وټاکه چې د هغوی سره د ځمکې په وېشلو کې مرسته وکړي.

¹⁹۱۹‏-۲۸ دا د هغوی د نومونو لست دی: د يهودا د قبيلې څخه - د يفنه زوی کاليب د شمعون د قبيلې څخه - د عميهود زوی شموئيل د بنيامين د قبيلې څخه - د کسلون زوی اليداد د دان د قبيلې څخه - د يجلي زوی بقي د منسي د قبيلې څخه - د ايفود زوی حنيئيل د افرايم د قبيلې څخه - د شفطان زوی قموئيل د زبولون د قبيلې څخه - د فرناک زوی اليصافان د يساکار د قبيلې څخه - د عزان زوی فلطيئيل د اشير د قبيلې څخه - د شلومي زوی اخيهود او د نفتالي د قبيلې څخه - د عميهود زوی فدهئيل.“

²⁹دا هغه نفر دي چې څښتن ورباندې امر وکړ چې د اسرائيليانو دپاره د ځمکې په وېشلو کې د العازار او يوشع سره مرسته وکړي.