Read Pashto (Nangahari) — د پښتو مقدس کتاب شمېر 35 Bible Online

شمېر 35 - Pashto (Nangahari) — د پښتو مقدس کتاب bible

شمېر 35

¹په داسې حال کې چې اسرائيليانو د موآب په ډاګونو کې د اردن د سيند په بله غاړه اريحا ته مخامخ خېمې ودرولې، څښتن حضرت موسیٰ ته وفرمايل:

²”اسرائيليانو ته ووايه د هغه جايداد څخه چې هغوی يې ترلاسه کوي بايد لاويانو ته د اوسېدلو دپاره څو ښارونه او د هغو شاوخوا څړځايونه ورکړي.

³دا ښارونه به د لاويانو وي او هغوی به هلته اوسيږي. د څړځای به د هغوی د غوايانو او د هغوی د نورو ټولو حيواناتو دپاره وي.

⁴څړځای بايد د ښار د بيروني دېوالونو څخه هرې خواته څلورنيم سوه متره وغزول شي،

⁵ترڅو يوه مربع شکله سيمه جوړه شي چې هره خوا يې نهه سوه متره وي او ښار به يې په منځ کې وي.

⁶شپږ ښارونه چې تاسو يې هغوی ته ورکوئ هغه به د پناه اخيستلو ښارونه وي او يو نفر چې يو څوک يې په سهوې سره وژلی وي کولی شي چې هلته وتښتي. مګر تاسو بايد لاويانو ته دوه څلوېښت نور ښارونه ورکړئ،

⁷نو هغوی به د شاوخوا څړځايونو سره ټول اته څلوېښت ښارونه ولري.

⁸د لاويانو د ښارونو شمېر بايد په هره قبيله کې د هغې د سيمې د اندازې په مطابق معلوم کړای شي. لويې قبيلې به زيات ښارونه او کوچنۍ قبيلې به کم ښارونه ورکړي.“

⁹بيا څښتن حضرت موسیٰ ته وفرمايل چې

¹⁰د اسرائيلو قوم ته داسې ووايي: ”کله چې تاسو د اردن له سيند څخه تېر شئ او د کنعان خاورې ته ورننوزئ،

¹¹د پناه اخيستلو ښارونه انتخاب کړئ چې داسې نفر د ساتنې دپاره ورتښتېدلی شي چې يو څوک يې په سهوې سره وژلی وي.

¹²هغه به په هغه ځای کې د وژل شوي نفر د خپلوانو د يو نفر څخه چې د بدل اخيستلو په لټه کې وي په امن کې اوسي. هيڅوک چې هغه په قتل باندې تورن شوی وي د علني محاکمې څخه پرته نشي وژل کېدای.

¹³شپږ ښارونه انتخاب کړئ،

¹⁴درې د اردن ختيځې خواته او درې د کنعان په خاوره کې.

¹⁵دا به د اسرائيليانو او هغو بېګانه خلکو دپاره چې په موقت يا دايمي توګه اوسيږي د پناه اخيستلو ځايونه وي. هرڅوک چې په سهوې سره يو نفر مړ کړي هغه کولی شي چې د دې ښارونو څخه يو ښار ته وتښتي.

¹⁶۱۶‏-۱۸ خو بياهم، که چېرې څوک د اوسپنې، تيږې يا لرګي د وسلې څخه کار واخلي او يو نفر ووژني، نو هغه د هغه نفر د قتل په خاطر مجرم دی او بايد ووژل شي.

¹⁹د وژل شوي نفر يو ډېر نژدې خپلوان دا مسئوليت لري چې قاتل ووژني. کله چې هغه پيدا کړي، بايد ويې وژني.

²⁰که چېرې څوک د کوم نفر سره کينه لري او هغه په ټېل وهلو يا په يو شي باندې په ويشتلو سره مړ کړي

²¹يا هغه په سوک ووهي، هغه د هغه نفر د قتل په اړه مجرم دی او بايد ووژل شي. د وژل شوي نفر يو ډېر نژدې خپلوان دا مسئوليت لري چې قاتل ووژني. کله چې هغه راپيدا کړي نو بايد ويې وژني.

²²خو فرض کړئ څوک په سهوې سره يو داسې نفر مړ کړي چې د هغه سره کينه نه لري، که هغه په ټېل وهلو وي يا په کوم شي باندې په ويشتلو سره.

²³يا د هغه فکر نه وي او يو داسې سړی په تيږه باندې په ويشتلو مړ کړي چې د هغه نيت نه وي چې هغه ژوبل کړي او د هغه دښمن نه وي.

²⁴نو په داسې حالاتو کې دې د هغه ځای خلک د هغه چا په حق کې فيصله وکړي چې نفر يې مړ کړی دی، نه د مړي د خپلوانو څخه د هغه نفر په حق کې چې د بدل اخيستلو په لټه کې دی.

²⁵ټولنه بايد هغه سړی چې په قتل باندې تورن دی د وژل شوي نفر د خپلوان څخه خلاص کړي او هغه بايد د پناه اخيستنې هغه ښار ته چې هغه ورتښتېدلی ؤ بېرته ولېږي. هغه بايد د مشر کاهن تر مړينې پورې په هغه ښار کې واوسيږي.

²⁶مګر که چېرې په قتل باندې تورن نفر د پناه اخيستلو ښار چې ورته تښتېدلی ؤ پرېږدي

²⁷او د وژل شوي نفر ډېر نژدې خپلوان هغه پيدا کړي او ويې وژني، نو دغه بدل اخيستنه قتل نه دی.

²⁸په قتل باندې تورن نفر بايد د مشر کاهن تر مړينې پورې د پناه اخيستلو په ښار کې پاتې شي، خو وروسته بيا کولی شي چې خپل کور ته ستون شي.

²⁹دا قوانين به په تاسو او ستاسو په اولادې باندې چې په هرځای کې اوسيږي عملي کيږي.

³⁰په قتل باندې تورن نفر بايد يوازې په هغه صورت کې مجرم وګڼل شي او ووژل شي چې دوه يا له هغه څخه زيات شاهدان شاهدي ورکړي. د قتل د تور د ثابتولو دپاره د يو نفر شاهدي ورکول کافي نه دي.

³¹قاتل بايد ووژل شي. هغه د پيسو په ورکولو سره د دې جزا څخه نشي خلاصېدلی.

³²که چېرې څوک د پناه اخيستلو ښار ته تښتېدلی وي، نو هغه مه پرېږدئ چې د مشر کاهن د مړينې څخه مخکې خپل کور ته د بېرته ستنېدلو په خاطر بيه ادا کړي.

³³۳۳‏-۳۴ زه څښتن ستاسو اسرائيلو د قوم په منځ کې اوسېږم، نو ستاسو خاوره بايد پاکه وساتل شي. مګر کله چې قتل وشي نو د هغه په وينه باندې ځمکه پليتيږي او ناپاکه کيږي. که چېرې داسې کيږي، قاتل بايد ووژل شي نو ځمکه به بېرته پاکه شي. په اسرائيلو کې دې قتل نه کيږي.“