Read Pashto (Nangahari) — د پښتو مقدس کتاب شمېر 36 Bible Online

شمېر 36 - Pashto (Nangahari) — د پښتو مقدس کتاب bible

شمېر 36

¹يوه ورځ د جلعاد د طايفې د کورنيو مشران حضرت موسیٰ او د اسرائيلو نورو مشرانو ته ورغلل. (جلعاد د ماخير زوی، ماخير د منسي زوی او منسي د حضرت يوسف زوی ؤ.)

²هغوی وويل: ”باداره، څښتن تاته حکم کړی دی چې د اسرائيلو خلکو ته د پچې په اساس ځمکه ووېشې. همدارنګه هغه حکم کړی دی چې زمونږ د خپلوان صلفحاد ځمکه د هغه لورګانو ته ورکړې.

³مګر دا خبره ياد ساته، که چېرې هغوی د بلې قبيلې د سړيو سره وادونه وکړي، د هغوی جايداد به د هماغې قبيلې شي او زمونږ دپاره ټاکل شوې برخه به کمه شي.

⁴د بېرته ورکولو په کال کې کله چې ټول خرڅ شوی جايداد خپل اصلي خاوند ته بېرته ورکړل شي، د صلفحاد د لورګانو ځمکه به د هغې قبيلې په دايمي جايداد باندې ورزياته شي په کومې کې چې هغوی واده شوې دي او دا به زمونږ د قبيلې په تاوان تمام شي.“

⁵نو حضرت موسیٰ د څښتن له خوا د اسرائيلو قوم ته دغه حکم ورکړ. هغه وفرمايل: ”د منسي قبيله چې څه وايي هغه صحيح دي

⁶او څښتن فرمايي چې د صلفحاد لورګانې آزادې دي چې د هرچا سره چې وغواړي واده کولی شي خو يوازې په خپله قبيله کې.

⁷په دې ډول به د هر اسرائيلي جايداد د هغه د خپلې قبيلې پورې تړلی پاتې شي.

⁸هره ښځه چې د اسرائيلو په يوه قبيله کې ځمکه په ميراث اخلي بايد د هماغې قبيلې د سړي سره واده وکړي. په دې ډول به ټولو اسرائيليانو ته د خپلو نيکونو جايداد په ميراث کې ورسيږي

⁹او د يوې قبيلې ځمکه دې بلې قبيلې ته نه ورکول کيږي. هره قبيله دې خپل ملکيت وساتي.“

¹⁰۱۰‏-۱۱ د صلفحاد لورګانو محلې، ترصې، حجلې، ملکې او نوعې د څښتن اطاعت وکړ او د خپلو ترونو د زامنو سره يې وادونه وکړل

¹²او د منسي په قبيلې کې پاتې شوې. نو د هغوی جايداد د هغوی د پلار په قبيله کې پاتې شو.

¹³دا هغه اصول او مقررات دي چې څښتن د حضرت موسیٰ په وسيله د موآب په ډاګونو کې د اردن د سيند په بله غاړه اريحا ته مخامخ اسرائيليانو ته ورکړل.