Read Pashto (Nangahari) — د پښتو مقدس کتاب شمېر 4 Bible Online

شمېر 4 - Pashto (Nangahari) — د پښتو مقدس کتاب bible

شمېر 4

¹څښتن حضرت موسیٰ او حضرت هارون ته وفرمايل:

²”د قهاتيانو سرشمېرنه چې د لاويانو د قبيلې يوه برخه ده طايفه په طايفه او کورنۍ په کورنۍ وکړئ.

³هغه ټول نفر وشمېرئ چې عمر يې د دېرشو کالو څخه تر پنځوسو کالو پورې وي او په مقدسه خېمه کې د کار کولو توان ولري.

⁴په مقدسه خېمه کې د قهاتيانو کار دا دی چې په مقدسو شيانو باندې پام وکړي.

⁵کله چې د دې وخت راشي چې کمپ ته حرکت ورکړای شي نو هارون او د هغه زامن به خېمې ته ورننوزي، هغه پرده به راکښته کړي چې د لوظ د صندوق په مخ کې ده او صندوق به ورباندې پټ کړي.

⁶په هغه باندې به د ښې څرمنې پوښ واچوي او په سر باندې به يې يو داسې ټوکر خپور کړي چې پوخ آبي رنګ ولري او بيا به وړونکې ميلې په کې ورننباسي.

⁷هغوی به په هغه مېز باندې چې خدای ته ورباندې ډوډۍ وړاندې کيږي يو آبي ټوکر خپور کړي او په هغه باندې به قابونه، د خوشبويۍ کاسې، د نذرانې دپاره کاسې او هغه منګي کېږدي چې د څښلو د نذرانو دپاره دي. په مېز باندې به همېشه ډوډۍ پرته وي.

⁸هغوی به په دې ټولو باندې يو سور ټوکر خپور کړي، د يوې ښې څرمنې پوښ به ورباندې واچوي او بيا به وړونکې ميلې په کې ورننباسي.

⁹هغوی دې يو آبي ټوکر واخلي او دغه شيان دې ورباندې پټ کړي: څراغدان د څراغونو سره، د هغه پلتې پاکوونکي، پتنوسونه او د زيتونو د تېلو ټول لوښي چې د څراغونو دپاره استعماليږي.

¹⁰هغوی به څراغدان او د هغه ټول سامان د ښې څرمنې په پوښ کې راتاو کړي او په يو وړونکي چوکاټ باندې به يې کېږدي.

¹¹بيا به د سرو زرو په قربانګاه باندې يو آبي ټوکر خپور کړي، د ښې څرمنې يو پوښ به ورباندې واچوي او بيا به وړونکې ميلې په کې ورننباسي.

¹²هغوی به هغه ټول لوښي چې په مقدس ځای کې ورڅخه کار اخيستل کيږي واخلي او په يو آبي ټوکر کې به يې تاو کړي، د ښې څرمنې يو پوښ به ورباندې واچوي او په يو وړونکي چوکاټ باندې به يې کېږدي.

¹³د قربانۍ د ځای څخه به ايرې لېرې کړي او په هغه باندې به يو بانجاني ټوکر خپور کړي.

¹⁴په هغه ټوکر باندې دې هغه ټول سامان کېږدي چې د قربانۍ په ځای کې ورڅخه کار اخيستل کيږي: لکه د اور لوښي، د غوښې قاشق پنجې، بېلچې او د وينې د شيندلو کاسې. بيا به هغوی ورباندې د ښې څرمنې يو پوښ واچوي او وړونکې ميلې به په کې ورننباسي.

¹⁵کله چې هارون او د هغه زامن د مقدس سامان او ټولو مقدسو موادو د پټولو څخه وزګار شي او کمپ د وړلو دپاره تيار شي، نو قهاتيان دې د دغو شيانو د وړلو دپاره راشي. مګر هغوی بايد مقدسو شيانو ته لاس ورنه وړي که نه، نو مړه به شي. قهاتيان دې هغه شيان انتقال کړي چې په مقدسه خېمه کې دي.

¹⁶د هارون کاهن زوی العازار دې د دغو شيانو مسئوليت په غاړه واخلي: د څراغونو دپاره د زيتونو تېل، خوشبويي، د عادي غلې دانې نذرانه او د مسح کولو تېل. هغه دې د ټولې مقدسې خېمې او هرڅه چې په کې دي، د مقدس سامان او لوښو په شمول د هغو مسئوليت په غاړه واخلي.“

¹⁷څښتن حضرت موسیٰ او حضرت هارون ته وفرمايل:

¹⁸۱۸‏-۱۹ ”پرېنږدئ چې قهاتيان ډېرو مقدسو شيانو ته په ورنژدې کېدلو سره ووژل شي. د دې دپاره چې د داسې پېښې څخه مخنيوی وشي، نو هارون او د هغه زامن دې مقدس ځای ته ورننوزي او هر سړي ته دې خپل کار وروسپاري چې څه شی يوسي.

²⁰مګر قهاتيان بايد دننه لاړ نشي چې مقدس شيان وګوري، حتیٰ د يوې شېبې دپاره هم. که نه، نو مړه به شي.“

²¹څښتن حضرت موسیٰ ته وفرمايل:

²²”د جرشونيانو سرشمېرنه چې د لاويانو د قبيلې يوه برخه ده کورنۍ په کورنۍ او طايفه په طايفه وکړه.

²³هغه ټول نفر چې عمر يې د دېرشو کالو څخه تر پنځوسو کالو پورې وي او په مقدسه خېمه کې د کار کولو توان ولري وشمېره.

²⁴هغوی به د لاندينيو شيانو د وړلو مسئوليت په غاړه لري:

²⁵خېمه، د هغې داخلي او بيرونی پوښ، د هغې په سر باندې د ښې څرمنې پوښ، د دروازې پرده،

²⁶د خېمې او د قربانۍ د ځای د ګردچاپېره حويلۍ دپاره پردې، د حويلۍ د دروازې پرده، رسۍ ګانې او هرڅه چې د دې شيانو په ودرولو کې په کاريږي. جرشونيان د دې ټولو شيانو د ساتنې او ترتيبولو مسئوليت په غاړه لري.

²⁷ته او هارون به وګورئ چې جرشونيان دا ټول کارونه ترسره کوي او هر هغه شی چې هارون او د هغه زامنو هغوی ته ورسپارلی دی وړي که نه.

²⁸دا د مقدسې خېمې په کار کې د جرشونيانو وظيفې دي. هغوی به دا کار د هارون کاهن د زوی يعنې ايتامار تر لارښودنې لاندې ترسره کوي.“

²⁹څښتن حضرت موسیٰ ته وفرمايل: ”مراريان چې د لاويانو د قبيلې يوه برخه ده طايفه په طايفه او کورنۍ په کورنۍ وشمېره.

³⁰هغه ټول نفر چې عمر يې د دېرشو کالو څخه تر پنځوسو کالو پورې وي او په مقدسه خېمه کې د کار کولو توان ولري وشمېره.

³¹هغوی به د چوکاټونو، اړمونو، ستنو او خېمې د پايو د وړلو مسئوليت ولري

³²او همدارنګه د خېمې د ګردچاپېره حويلۍ د ستنو، پايو، مېخونو، رسۍ ګانو او هغو ټولو شيانو چې د هغو په ودرولو کې په کاريږي. هر سړی به د ځانګړو شيانو د وړلو مسئوليت په غاړه ولري.

³³دا د مقدسې خېمې په کار کې د مراريانو وظيفې دي. هغوی به دا کار د هارون کاهن د زوی يعنې ايتامار تر لارښودنې لاندې ترسره کوي.“

³⁴۳۴‏-۴۸ حضرت موسیٰ، حضرت هارون او د اسرائيلو نورو مشرانو د څښتن امر ته غاړه کېښودله او د قهاتيانو، جرشونيانو او مراريانو سرشمېرنه يې وکړه. هغوی دا کار طايفه په طايفه او کورنۍ په کورنۍ وکړ او هغه ټول خلک يې وشمېرل چې عمرونه يې د دېرشو او پنځوسو کالو ترمنځ ؤو او په مقدسه خېمه کې يې کار کولی شو. د هغو شمېر په لاندې ډول ؤ: قهاتيان ۲۷۵۰، جرشونيان ۲۶۳۰ او مراريان ۳۲۰۰ چې د ټولو شمېر ۸۵۸۰ ؤ.

⁴⁹څنګه چې څښتن په حضرت موسیٰ باندې امر کړې ؤ، هر سړی وشمېرل شو او هر يو ته د خدمت کولو يا د وړلو د وظيفې مسئوليت وسپارل شو.