Read Pashto (Nangahari) — د پښتو مقدس کتاب شمېر 6 Bible Online

شمېر 6 - Pashto (Nangahari) — د پښتو مقدس کتاب bible

شمېر 6

¹څښتن حضرت موسیٰ ته وفرمايل

²چې د اسرائيلو قوم ته داسې ووايي: ”که چېرې ستاسو څخه څوک که هغه نر وي يا ښځه غواړي چې د خاص نذر په ورکولو سره خپل ځان ما څښتن ته وقف کړي،

³نور بايد شراب يا بير ونه څښي او نه دې کوم ډول سرکه استعمال کړي. د انګورو شربت دې نه څښي، انګور يا مميز دې نه خوري.

⁴ترڅو پورې چې هغه وقف شوی وي بايد کوم شی چې د انګورو څخه جوړيږي ونه خوري، حتیٰ تخمونه او پوستکي يې هم ونه خوري.

⁵ترڅو پورې چې هغه وقف شوی وي، بايد خپل ويښتان کم نه کړي او خپله ږيره ونه خرايي. په هغه ټوله موده کې چې هغه څښتن ته وقف شوی وي، بايد نذر ورکړي او خپل ويښتان پرېږدي چې لوی شي.

⁶۶‏-۷ د هغه ويښتان خدای ته د هغه د وقف کېدلو نښه ده، نو هغه بايد خپل ځان مړي ته په ورنژدې کېدلو سره ناپاک نه کړي، که څه هم هغه د هغه د پلار، د هغه د مور، د هغه د ورور يا د خور مړی وي.

⁸ترڅو پورې چې هغه نذر ورکوي، هغه به څښتن ته وقف وي.

⁹که چېرې د هغه وقف شوي ويښتان يو چاته په ورنژدې کېدلو سره چې يوناڅاپه مړ شي ناپاک شي، هغه بايد اوه ورځې صبر وکړي او بيا خپل سر وخرايي نو هغه به په مذهبي لحاظ پاک شي.

¹⁰په اتمه ورځ به هغه نفر دوه کوترې يا دوه قمري ګانې د مقدسې خېمې دروازې ته کاهن ته راوړي.

¹¹کاهن به يو مارغه د ګناه د نذرانې په توګه او بل به د سوزېدونکې نذرانې په توګه وړاندې کړي چې د هغه دپاره کفاره ادا کړي ځکه چې هغه مړي ته په ورنژدې کېدلو سره ګناه کړې ده. هغه دې په هماغه ورځ د خپلو ويښتانو د پاکولو مراسم ترسره کړي.

¹²نو څښتن ته دې هغه نفر خپل وخت بيا وقف کړي. تېرې شوې ورځې نه حسابيږي، ځکه چې د هغه مقدس ويښتان ناپاکه شول. هغه بايد د تاوان د نذرانې په توګه يو يو کلن وری راوړي.

¹³کله چې هغه نفر خپله هغه موده پوره کړي چې هغه په کې دا وعده کړې ده چې نذر به ورکوي، بايد دا مراسم سرته ورسوي. د مقدسې خېمې دروازې ته به ورشي

¹⁴او څښتن ته دې درې داسې حيوانات وړاندې کړي چې کوم عيب په کې نه وي، يعنې يو يو کلن وری د سوزېدونکې نذرانې دپاره، يوه يو کلنه مېږه د ګناه د نذرانې دپاره او يو پسه د سلامتۍ د نذرانې دپاره.

¹⁵هغه دې يوه ټوکرۍ فطيره ډوډۍ هم وړاندې کړي يعنې پنډې ډوډۍ چې د داسې ښو اوړو څخه تيارې شوې وي چې د زيتونو تېل ورسره ګډ وي او داسې نرۍ ډوډۍ چې تېل ورباندې موښل شوي وي او د غلې دانې او د څښلو نذرانې هم بايد ورسره وي.

¹⁶کاهن به دا ټول څښتن ته حاضر کړي او د ګناه نذرانه او سوزېدونکې نذرانه دې وړاندې کړي.

¹⁷هغه به پسه د سلامتۍ د نذرانې په توګه څښتن ته قرباني کړي او هغه به د ډوډۍ د ټوکرۍ سره وړاندې کړي، همدارنګه هغه به د غلې دانې او څښلو نذرانې هم وړاندې کړي.

¹⁸له هغې وروسته به هغه نفر د مقدسې خېمې د دروازې په خوله کې ودريږي، خپل سر به وخرايي او ويښتان به په هغه اور کې واچوي په کوم باندې چې د سلامتۍ نذرانه سوزول کيږي.

¹⁹کله چې د پسه د اوږې غوښه وايشول شوه، کاهن به هغه واخلي او د ټوکرۍ د يوې پنډې ډوډۍ او يوې نرۍ ډوډۍ سره به يې د هغه نفر په لاسونو کې کېږدي.

²⁰هغه به يې بېرته کاهن ته ورکړي او کاهن به يې ما څښتن ته د وقف کولو دپاره پورته ونيسي. بيا کاهن کولی شي چې د پسه د اوږې غوښه، سينه او د هغه شاتنۍ پښه وخوري ځکه چې دا د نذرانې څخه د هغه برخه ده. له دې وروسته به هغه نفر نور نذر نه ورکوي او آزادانه شراب څښلی شي.

²¹دا قانون د هغو خلکو دپاره دی چې نذر ورکوي. که چېرې کوم نفر وعده کړې وي چې څښتن ته برسېره په هغو شيانو چې هغه يې په عادي حالت کې ورکوي کوم بل شی د نذر په توګه ورکړي، نو هغه دې د خپلې وعدې سره سم خپل خاص نذر ورکړي.“

²²څښتن حضرت موسیٰ ته وفرمايل:

²³”کله چې هارون او د هغه زامن د اسرائيلو قوم ته برکت ورکوي، هغوی بايد داسې ووايي:

²⁴څښتن دې برکت درکړي او تاسو دې وساتي

²⁵هغه دې په تاسو باندې رحم او مهرباني وکړي

²⁶څښتن دې درسره ښه وکړي او تاسو ته دې سلامتيا درکړي“

²⁷بيا څښتن وفرمايل: ”که چېرې هغوی زما په نوم د اسرائيلو په قوم باندې برکت وايي، زه به هغوی ته برکت ورکړم.“