Read Pashto (Nangahari) — د پښتو مقدس کتاب شمېر 7 Bible Online

شمېر 7 - Pashto (Nangahari) — د پښتو مقدس کتاب bible

شمېر 7

¹کله چې حضرت موسیٰ د مقدسې خېمې د ودرولو څخه وزګار شو، نو خېمه او د هغې ټول سامان او د قربانۍ ځای او د هغه ټول سامان يې مسح کړ او هغه يې څښتن ته وقف کړ.

²بيا د اسرائيلو دولس قبيلوي مشران يعنې هماغه نفر چې د خلکو د سرشمېرنې مشري يې په غاړه وه مقدسې خېمې ته

³د هغو سوغاتونو سره راغلل چې د څښتن دپاره ؤو. هغوی شپږ ګاډۍ ګانې او دولس غوايان راوړل، هر مشر يو يو غويی او دوو مشرانو يوه يوه ګاډۍ راوستله.

⁴څښتن حضرت موسیٰ ته وفرمايل:

⁵”دا سوغاتونه د هغوی څخه قبول کړه چې د مقدسې خېمې په کار کې ورڅخه ګټه واخيستل شي او هغه لاويانو ته د هغه کار دپاره ورکړه چې هر يو يې په مقدسه خېمه کې اجرا کوي.“

⁶نو حضرت موسیٰ ګاډۍ ګانې او غوايان واخيستل او هغه يې لاويانو ته

⁷۷‏-۸ چې د حضرت هارون د زوی ايتامار تر مشرۍ لاندې ؤو ورکړل. حضرت موسیٰ جرشونيانو ته د هغوی د کار دپاره دوه ګاډۍ ګانې او څلور غوايان ورکړل او څلور ګاډۍ ګانې او اته غوايان يې مراريانو ته د هغوی د کار دپاره ورکړل.

⁹مګر قهاتيانو ته يې هيڅ ورنه کړل، ځکه چې هغوی د هغو مقدسو شيانو مسئولان ؤو چې بايد په خپلو اوږو باندې يې يوسي.

¹⁰کله چې د قربانۍ ځای مسح کړای شو، مشرانو خپلې نذرانې د هغه د وقف کولو دپاره راوړلې او هغه يې د قربانۍ د ځای په مخ کې وړاندې کړې.

¹¹څښتن حضرت موسیٰ ته وفرمايل: ”مشرانو ته ووايه چې تر دولسو ورځو پورې دې يو يو مشر هره ورځ خپله نذرانه د قربانۍ د ځای د وقف کولو دپاره راوړي.“

¹²۱۲‏-۸۳ نو هر مشر دا لانديني سوغاتونه راوړل: د سپينو زرو يو پيشقاب چې وزن يې يونيم کيلوګرام ؤ او د وينې د شيندلو دپاره د سپينو زرو يوه کاسه چې وزن يې اته سوه ګرامه ؤ. دواړه د ښو اوړو او زيتونو د تېلو څخه ډک ؤو، دا د غلې دانې د نذرانې په توګه ؤو او وزن يې د مقدس ځای د اندازې په مطابق ؤ: - د خوشبويۍ څخه ډک د سرو زرو يو پيشقاب چې وزن يې يوسلو لس ګرامه ؤ - يو ځوان غويی، يو پسه او يو يو کلن وری د سوزېدونکې نذرانې په توګه - يو وز د ګناه د نذرانې په توګه ـ او د سلامتۍ د نذرانې په توګه دوه غوايان، پنځه پسونه، پنځه وزان او پنځه وري چې هر يو يو کلن ؤ. قبيلوي مشرانو خپل سوغاتونه او نذرانې په لانديني ترتيب سره راوړلې: په اوله ورځ د يهودا د قبيلې څخه نحشون د عميناداب زوی په دوهمه ورځ د يساکار د قبيلې څخه نتنائيل د صوغر زوی په دريمه ورځ د زبولون د قبيلې څخه الياب د حيلون زوی په څلورمه ورځ د روبين د قبيلې څخه اليصور د شديئور زوی په پنځمه ورځ د شمعون د قبيلې څخه شلوميئيل د صوريشدای زوی په شپږمه ورځ د جاد د قبيلې څخه الياساف د دعوئيل زوی په اوومه ورځ (...)

⁸⁴۸۴‏-۸۸ په دې ډول کله چې د قربانۍ ځای مسح او څښتن ته وقف کړای شو، دغو دولسو مشرانو دا لانديني سوغاتونه راوړل: - دولس د سپينو زرو قابونه او دولس د سپينو زرو کاسې چې د وينې د شيندلو دپاره وې او د ټولو وزن د مقدس ځای د اندازې په مطابق اته ويشت کيلوګرامه ؤ. - دولس د سرو زرو پشقابونه چې وزن يې يونيم کيلوګرامه ؤ او د خوشبويۍ څخه ډک ؤو. - دولس غوايان، دولس پسونه او دولس يو کلن وري د غلو دانو د نذرانو سره د سوزېدونکو نذرانو په توګه. - دولس وزان د ګناه د نذرانو په توګه. - څلورويشت غوايان، شپېته پسونه، شپېته وزان او شپېته يو کلن وري د سلامتۍ د نذرانو په توګه.

⁸⁹کله به چې حضرت موسیٰ غوښتل چې د څښتن سره خبرې وکړي نو مقدسې خېمې ته به ورننوت. هلته به هغه د دوو کروبيانو له منځ څخه د کفارې د پوښ دپاسه چې د لوظ په صندوق باندې پروت ؤ، د څښتن غږ اورېده چې د هغه سره يې خبرې کولې.