Read Pashto (Nangahari) — د پښتو مقدس کتاب شمېر 8 Bible Online

شمېر 8 - Pashto (Nangahari) — د پښتو مقدس کتاب bible

شمېر 8

¹څښتن حضرت موسیٰ ته وفرمايل:

²”هارون ته ووايه چې په څراغدان باندې اوه څراغونه داسې کېږدي ترڅو د څراغدان مخې ته رڼا ورکړي.“

³حضرت هارون دا خبره ومنله او لکه څنګه چې ورته ويل شوي ؤو، څراغونه يې هماغسې کېښودل.

⁴څراغدان د سر څخه نيولې تر پايې پورې د ټکول شويو سرو زرو څخه جوړ شوی ؤ او کټ مټ د هغې نقشې په مطابق ؤ لکه څنګه چې څښتن حضرت موسیٰ ته ښودلې وه.

⁵څښتن حضرت موسیٰ ته وفرمايل:

⁶”لاويان د اسرائيلو له پاتې قوم څخه جدا کړه او پاک يې کړه.

⁷د دې دپاره چې هغوی پاک کړې نو داسې وکړه: په هغوی باندې پاکوونکې اوبه وشينده او ورته ووايه چې د خپل بدن ټول ويښتان وخرايي او خپل کالي ومينځي. نو هغوی به پاک شي.

⁸هغوی دې يو ځوان غويی او د غلې دانې هغه نذرانه راوړي چې د ښو اوړو څخه جوړه شوې وي او د زيتونو تېل ورسره ګډ وي. بل غويی دې د ګناه د نذرانې په توګه راولي.

⁹بيا به د اسرائيلو ټول قوم راوغواړې او لاويانو ته به ووايې چې د مقدسې خېمې مخې ته لاړ شي.

¹⁰هلته به زما په حضور کې قوم خپل لاسونه د لاويانو په سرونو باندې کېږدي.

¹¹هارون به لاويان د قوم له خوا د يو خاص سوغات په توګه ماته وړاندې کړي، ترڅو هغوی زما خدمت وکړي.

¹²له هغې وروسته دې لاويان خپل لاسونه د غوايانو په سرونو باندې کېږدي. بيا به يو غويی د ګناه د نذرانې په توګه قرباني شي او بل د سوزېدونکې نذرانې په توګه، ترڅو د لاويانو دپاره کفاره ادا شي.

¹³لاويان د يو خاص سوغات په توګه ماته وقف کړه او هارون او د هغه زامن د هغوی مشران کړه.

¹⁴په دې ډول به لاويان د نورو اسرائيليانو څخه جدا کړې او هغوی به زما شي.

¹⁵وروسته له هغې چې تا لاويان پاک او وقف کړل، بيا به هغوی ته اجازه ورکړل شي چې په مقدسه خېمه کې کار وکړي.

¹⁶لاويان يوازې زما دي او هغوی مې د اسرائيلو د ټولو مشرانو زامنو په ځای قبول کړي دي.

¹⁷کله چې ما د مصريانو مشران زامن او اولني زېږېدلي حيوانات ووژل، دا پرېکړه مې وکړه چې په هرې اسرائيلي کورنۍ کې مشران زامن او د هغوی د رمو او پادو څخه هر اولنی زېږېدلی نر حيوان به زما وي.

¹⁸مګر اوس ما د اسرائيلو د ټولو مشرانو زامنو په ځای لاويان انتخاب کړي دي.

¹⁹د ټولو اسرائيليانو څخه مې لاويان هارون او د هغه زامنو ته د سوغاتونو په توګه ورکړي دي چې په مقدسه خېمه کې د قوم په خاطر کار وکړي او د هغوی دپاره کفاره ادا کړي، ترڅو کله چې اسرائيليان مقدس ځای ته ورنژدې کيږي، په هغوی باندې کوم آفت رانشي.“

²⁰لکه څنګه چې څښتن په حضرت موسیٰ باندې امر کړی ؤ، نو حضرت موسیٰ، حضرت هارون او د اسرائيلو ټول قوم لاويان وقف کړل.

²¹لاويانو خپل ځانونه پاک کړل او خپل کالي يې ومينځل او حضرت هارون هغوی د يو خاص سوغات په توګه څښتن ته وقف کړل او د هغوی د پاکوالي دپاره يې کفاره ادا کړه.

²²له دې وروسته لکه څنګه چې څښتن امر کړی ؤ، لاويانو د حضرت هارون او د هغه د زامنو د مرستيالانو په توګه په مقدسه خېمه کې کار کاوه.

²³څښتن حضرت موسیٰ ته وفرمايل:

²⁴۲۴‏-۲۵ ”هغه لاويان چې عمر يې د پنځه ويشتو او پنځوسو کالو ترمنځ وي کولی شي چې په مقدسه خېمه کې کار وکړي. مګر څنګه چې د پنځوسو کالو څخه يې عمر زيات شي نور بايد کار ونه کړي.

²⁶هغوی کولی شي چې د مقدسې خېمې په وظيفو کې د نورو لاويانو سره مرسته وکړي مګر په خپله بايد د کوم کار مسئوليت په غاړه ونلري. په دې ډول لاويانو ته وظيفې وسپاره.“