Read Pashto (Nangahari) — د پښتو مقدس کتاب شمېر 9 Bible Online

شمېر 9 - Pashto (Nangahari) — د پښتو مقدس کتاب bible

شمېر 9

¹د دوهم کال په اوله مياشت وروسته له دې چې د اسرائيلو قوم د مصر څخه راووت، څښتن د سينا په دښته کې د حضرت موسیٰ سره خبرې وکړې. هغه وفرمايل:

²۲‏-۳ ”د اسرائيلو قوم بايد د فسحې اختر په ټاکل شوي وخت يعنې د دې مياشتې په څوارلسمه ورځ د لمرپرېواته په وخت د دې اختر د ټولو قوانينو او مقرراتو په مطابق ولمانځي.“

⁴نو حضرت موسیٰ قوم ته وفرمايل چې د فسحې اختر ولمانځي

⁵او هغوی دا کار د اولې مياشتې د څوارلسمې ورځې په ماښام د سينا په دښته کې وکړ. قوم هرڅه هماغه شان وکړل لکه څنګه چې څښتن په حضرت موسیٰ باندې امر کړی ؤ.

⁶مګر ځينې خلک په مذهبي لحاظ ناپاک ؤو ځکه چې د هغوی لاسونه په مړي باندې لګېدلي ؤو او هغوی ونشو کولی چې په هغه ورځ د فسحې اختر ولمانځي. نو حضرت موسیٰ او حضرت هارون ته ورغلل

⁷او ويې ويل: ”مونږ ناپاک يو ځکه چې زمونږ لاسونه په مړي باندې لګېدلي دي، مګر ولې نشو کولی چې د فسحې اختر ولمانځو او د نورو اسرائيليانو سره په يو وخت څښتن ته نذرانې وړاندې کړو؟“

⁸حضرت موسیٰ په ځواب کې وفرمايل: ”صبر وکړئ چې زه په دې باندې ځان پوه کړم چې څښتن ستاسو په باره کې څه حکم کوي.“

⁹بيا څښتن حضرت موسیٰ ته وفرمايل چې

¹⁰د اسرائيلو خلکو ته ووايي: ”که چېرې تاسو يا ستاسو له اولادې څخه څوک په مړي باندې په لګېدلو سره ناپاک شوی وي او يا په لېرې سفر کې وي، خو وغواړي چې د فسحې اختر ولمانځي،

¹¹نو هغه دې د دوهمې مياشتې د څوارلسمې ورځې په ماښام يعنې يوه مياشت وروسته ولمانځي. هغه دې د فسحې وری د فطيرې ډوډۍ او ترخو بوټو سره وخوري.

¹²له هغه څخه دې هيڅ شی تر سهاره پورې نه پرېږدي او د حيوان هيڅ يو هډوکی دې نه ماتوي. کله چې هغه د فسحې اختر لمانځي، بايد د دغو ټولو مقرراتو څخه پيروي وکړي.

¹³مګر که چېرې ستاسو څخه څوک په مذهبي لحاظ پاک وي او په سفر کې نه وي او د فسحې اختر نه لمانځي، هغه بايد زما د قوم څخه وشړل شي. هغه ته به سزا ورکړل شي ځکه چې ماته يې په ټاکلي وخت نذرانې نه دي وړاندې کړې.

¹⁴که چېرې هغه بېګانه خلک چې ستاسو په منځ کې اوسيږي وغواړي چې د فسحې اختر ولمانځي، بايد د ټولو قوانينو او مقرراتو په مطابق يې ولمانځي. همدغه قانون په هرچا باندې که هغه اصلي اوسېدونکی وي يا بېګانه وي عملي کيږي.“

¹⁵۱۵‏-۱۶ په هغه ورځ چې مقدسه خېمه ودرول شوه، يوه ورېځ راغله او خېمه يې پټه کړه. ورېځ به هره ورځ هلته وه او د شپې له خوا به د اور په شان ښکاره کېدله.

¹⁷هرکله چې به ورېځ د خېمې څخه پورته شوه نو اسرائيليان به روان شول. کله به چې ورېځ راکوزه شوه، هغوی به خېمې ودرولې.

¹⁸قوم د څښتن په امر حرکت کاوه او د هغه په امر به يې خېمې ودرولې. تر هغه وخته پورې چې په خېمه باندې به ورېځ وه، هغوی به په هماغه کمپ کې پاتې کېدل.

¹⁹کله چې به ورېځ په خېمې باندې تر ډېره وخته پورې پاتې کېدله، هغوی د څښتن اطاعت کاوه او کډه يې نه کوله.

²⁰کله کله به ورېځ په خېمې باندې يوازې د يو څو ورځو دپاره پاتې کېدله، په هر حال کې به هغوی د څښتن د امر په مطابق په کمپ کې پاتې کېدل يا به يې کډه کوله.

²¹کله کله ورېځ يوازې د ماښام څخه تر سهاره پورې پاتې کېدله، څنګه به چې ورېځ پورته شوه هغوی به کډه کوله. هرکله چې ورېځ پورته کېدله، هغوی کډه کوله.

²²که دا به دوه ورځې، يوه مياشت يا به ډېره موده وه ترڅو چې په خېمې باندې به ورېځ وه هغوی کډه نه کوله. مګر کله چې ورېځ پورته کېدله، هغوی به کډه کوله.

²³هغوی به د څښتن په امر خېمې ودرولې او د هغه په امر به يې حرکت کاوه. هغوی د څښتن د حکمونو څخه چې د حضرت موسیٰ په وسيله يې کول، اطاعت کاوه.