Read Pashto (Nangahari) — د پښتو مقدس کتاب متى 26 Bible Online

متى 26 - Pashto (Nangahari) — د پښتو مقدس کتاب bible

متى 26

¹کله چه عيسىٰ خپلے خبرے خلاصے کړے نو خپلو مُريدانو ته ئے ووئيل،

²”تاسو خبر يئ چه دوه ورځے پس به دَ فسح اختر وى، اَؤ اِبن آدم به په سولئ کولو ته وسپارلے شى.“

³بيا مشران کاهنان اَؤ دَ قوم مشران دَ مشر کاهن کائفا په ماڼئ کښے جرګه شول.

⁴اَؤ هلته هغوئ دا سازش کولو چه عيسىٰ په څۀ ټګئ ونيسُو اَؤ مړ ئے کړو.

⁵خو هغوئ ووئيل چه ”دا دِ دَ اختر په ورځ نۀ وى، ګنى په خلقو کښے به فساد خور شى.“

⁶عيسىٰ دَ شمعُون جُذامى په کور کښے په بيتِ عيناه کښے وو،

⁷چه يوه ښځه راغله چه دَ مرمرو په عطردان کښے ورسره قيمتى خوشبُويه عطر وُو، اَؤ څنګه چه هغه خوراک ته کښيناستو هغے ورله په سر عطر واچول.

⁸مُريدانو چه دا وليدل نو زهير شول. هغوئ ووئيل، ”دا دِ ولے ضائع کړل؟

⁹دا خو به په ډيره بيعه خرڅ شوے وے اَؤ پيسے به ئے دَ چا خوارانو په کار شوے وے.“

¹⁰عيسىٰ په دے خبر وو اَؤ هغوئ ته ئے ووئيل چه ”تاسو دا ښځه ولے تنګوئ؟ هغے راسره ډير ښۀ کړى دى.

¹¹خواران خو به تل تاسو سره وى خو زَۀ به درسره هميشه نۀ يم.

¹²هغے چه دا عطر زما په بدن واچول نو زَۀ ئے دَ ښخولو دَ پاره تيار کړم.

¹³زَۀ تاسو ته دا وايم چه هر چرته چه په دُنيا کښے دا زيرے خوريږى نو څۀ چه هغے وکړل نو دا به هم په دے ياديږى.“

¹⁴په دولسو مُريدانو کښے يو چه نُوم ئے يهوداه اسکريوتى وو، مشرانو کاهنانو ته لاړو.

¹⁵اَؤ ورته ئے ووئيل، ”که زَۀ په عيسىٰ مُخبرى وکړم نو تاسو به ما ته څۀ راکړئ؟“ نو هغوئ ورته ديرش دَ سپينو زرو سکے ورکړلے.

¹⁶دَ هغه وخت نه پس هغه دَ مُخبرئ دَ موقعے په تلاش کښے وو.

¹⁷دَ پتيرے ډوډئ اختر په وړُومبئ ورځ عيسىٰ ته مُريدان راغلل اَؤ وئے وئيل چه ”ستا کُوم ځائے خوښ دے چه مُونږ په کښے تا ته دَ فسح خوراک تيار کړُو؟“

¹⁸هغۀ ورته جواب ورکړو چه ”په ښار کښے فلانى سړى ته ورشئ اَؤ ورته ووايئ چه اُستاذ وائى چه زما مقرر وخت رانزدے دے، زَۀ به دَ مُريدانو سره ستا په کور کښے دَ فسح اختر کوم.“

¹⁹مُريدانو دَ عيسىٰ دَ وينا په مُطابق کار وکړو اَؤ فسح ئے تيار کړو.

²⁰ماښام هغه دَ دولسو مُريدانو سره کښيناستو.

²¹اَؤ دَ ډوډئ په وخت هغۀ ورته ووئيل، ”زَۀ درته رښتيا وايم چه په تاسو کښے به يو زما مُخبرى کوى.“

²²هغوئ په ډيره فکرمندئ سره يو يو ورته ووئيل، ”مالکه! تۀ ما يادوے څۀ؟“

²³هغۀ جواب ورکړو، ”چا چه زما سره په دے تالئ کښے لاس ښکته کړو هغه به په ما مُخبرى کوى.

²⁴دَ اِبن آدم په حق کښے چه په صحيفو کښے څۀ راغلى دى هغه به په هغه لاره ځى، خو اَفسوس په هغه سړى دے چه په اِبن آدم مُخبرى کوى! که هغه سړے پيدا شوے نۀ وئے نو دَ هغۀ په حق کښے به ډيره ښۀ وه.“

²⁵بيا يهوداه، څوک چه مُخبر وو ورته ووئيل، ”ربى! تۀ ما يادوے څۀ؟“ عيسىٰ جواب ورکړو چه ”دا ستا وينا ده.“

²⁶دَ خوراک په دوران کښے عيسىٰ ډوډئ واخسته اَؤ په شکر ئے ما ته کړه اَؤ مُريدانو ته ئے ورکړه اَؤ وئے وئيل چه ”دا واخلئ اَؤ وئے خورئ، دا زما وجُود دے.“

²⁷بيا ئے کنډول راواخستو، دَ خُدائے شکر ئے پرے وويستو اَؤ په دے وينا سره ئے هغوئ ته ورکړو چه ”دَ دے نه ټول وڅښئ.

²⁸ځکه چه دا زما وينه ده چه دَ خُدائے وعده قائموى اَؤ دَ ډيرو خلقو دَ ګُناهونو دَ معافئ دَ پاره توئيږى.

²⁹زَۀ تاسو ته دا وايم چه زَۀ به بيا تر هغے دَ انګورو اوبۀ ونۀ څښم تر څو چه دَ خپل پلار په بادشاهئ کښے تاسو سره تازه ونۀ څښم.“

³⁰دَ خُدائے دَ حمد وئيلو نه پس دوئ دَ ښونانو غرۀ ته لاړل.

³¹بيا عيسىٰ دوئ ته ووئيل چه ”نن شپه به تاسو ټول زما په وجه تيندک خورئ ځکه چه دا ليکلى شوى دى چه : ”زَۀ به شپُونکے پرے باسم اَؤ دَ هغۀ دَ کنډک ګډے به خورے ورے شى.“

³²خو هر کله چه زَۀ بيا پاڅولے شم نو زَۀ به ستاسو نه وړاندے ګليل ته لاړ شم.“

³³پطروس په جواب کښے ووئيل، ”ستا په وجه که بل هر يو هم تيندک وخورى، خو زَۀ به ئے هيچرے ونۀ خورم.“

³⁴عيسىٰ هغۀ ته ووئيل چه ”زَۀ تا ته وايم چه نن شپه دَ چرګ دَ بانګ نه آګاهو به تۀ درے ځله زما نه اِنکارى شے.“

³⁵پطروس ورته ووئيل، ”که زَۀ تا سره مړ هم شم خو ستا نه به هيچرے اِنکارى نۀ شم.“ اَؤ ټولو مُريدانو هم داسے اِقرار وکړو.

³⁶نو بيا عيسىٰ سره دَ مُريدانو ګيتسمنئے نُومے ځائے ته راغے اَؤ هلته ئے هغوئ ته ووئيل چه ”تاسو دلته کښينئ، زَۀ په دغه ځائے کښے دُعا کوم.“

³⁷هغۀ پطروس اَؤ دَ زبدى زامن دَ ځان سره کړل، نو ډير غمژن شو اَؤ په زړۀ ئے تيارۀ شوله.

³⁸اَؤ هغوئ ته ئے ووئيل چه ”زما زړۀ دَ غمه چوى، دلته ودريږئ اَؤ ما سره بيدار اوسئ.“

³⁹هغه يو څو قدمه لاړو، پړ مخے پريوتو اَؤ دا دُعا ئے وکړه چه ”زما پلاره! که کيدے شى نو دا پياله رانه تيره کړه، خو داسے نه لکه چه ئے زَۀ غواړم بلکه داسے لکه چه ستا رضا ده.“

⁴⁰دَئے مُريدانو له راغے اَؤ هغه ئے اُودۀ وليدل اَؤ هغۀ پطروس ته ووئيل، ”ښه! تاسو ما سره يوه ګينټه قدرے هم بيدار نۀ شوئ پاتے کيدے؟

⁴¹بيدار شئ! اَؤ دُعا وکړئ چه تاسو په لمسُون کښے پرے نۀ وزئ. رُوح خو تيار دے خو وجُود کمزورے دے.“

⁴²هغه په دويم ځل لاړو اَؤ دُعا ئے وغوښته چه ”زما پلاره! که چرے دا پياله زما دَ څښلو نه بغير نۀ شى تيريدے نو ستا رضا دِ وشى.“

⁴³هغه بيا راغے اَؤ هغوئ ئے بيا اُودۀ وموندل ځکه چه دَ هغوئ سترګے درنے شوے وے

⁴⁴بيا هغۀ هغوئ پريښودل اَؤ لاړو اَؤ په دريم ځل ئے دُعا وغوښتله اَؤ هغه مخکښنئ خبرے ئے بيا وکړے.

⁴⁵بيا هغه مُريدانو له راغے اَؤ ورته ئے ووئيل چه ”لا هغسے اُودۀ يئ، هغسے لا آرام کوئ؟ وخت راغلے دے، اِبن آدم دَ ګُناه ګارانو لاس ته په حواله کيږى.

⁴⁶پاڅئ چه لاړ شُو، ګورئ زما مُخبر رارسيدلے دے.“

⁴⁷عيسىٰ لا دا خبرے کولے چه له دولسو مُريدانو نه يهوداه راغے چه ورسره ډير خلق وُو سره دَ تُورو اَؤ دَ کوتکُونو چه مشرانو کاهنانو اَؤ دَ قوم مشرانو راليږلى وُو.

⁴⁸مُخبر هغوئ ته دا نخښه ښوولے وه، ”څوک چه زَۀ ښکل کړم هم هغه دے، وئے نيسئ.“

⁴⁹سمدستى يهوداه راوړاندے شو، وئے وے چه ”رَبى سلام!“ اَؤ ښکل ئے کړو.

⁵⁰عيسىٰ جواب ورکړو، ”ملګريه! څۀ چه کول غواړے کوه.“ هغوئ بيا رامخکښے شول، عيسىٰ ته ئے لاس ورواچوو اَؤ وئے نيولو.

⁵¹په هغه وخت کښے دَ عيسىٰ په ملګرو کښے يو تُورے ته لاس کړو راوئے کښله اَؤ دَ مشر کاهن په غُلام ئے ګُزار وکړو اَؤ دَ هغۀ غوږ ئے پريکړو.

⁵²خو عيسىٰ هغۀ ته ووئيل چه ”خپله تُوره په تيکى کښے کيږده. څوک چه تُوره چلوى په تُورو مرى.

⁵³آيا تا دا ګُمان کړے دے چه زَۀ ګنى خپل پلار ته سوال نۀ شم کولے چه سمدستى دَ فرښتو دولس لښکرے زما مدد ته راواستوى؟

⁵⁴نو بيا دَ صحيفو دا وينا به څنګه تر سره کيږى چه په کښے وئيلى شوى دى چه دا به خامخا کيږى؟“

⁵⁵هم په دغه وخت عيسىٰ هغه خلقو ته ووئيل چه ”تاسو ما ډاکو ګڼئ چه دَ تُورو اَؤ کوتکُونو سره زما په نيولو پسے راغلى يئ؟ ما به هره ورځ دَ خُدائے په کور کښے تعليم ورکاوو خو تاسو په ما لاس نه دے پورته کړے.

⁵⁶خو دا هر څۀ هم ځکه وشول چه هغه څۀ رښتيا ثابت شى کُوم چه نبيانو ليکلى دى.“ بيا ټولو مُريدانو هغه پريښودو اَؤ وتښتيدل.

⁵⁷عيسىٰ نيولے تړلے دَ مشر کاهن کائفا کور ته بوتلے شو چرته چه دَ شرعے عالمان اَؤ مشران راټول وُو.

⁵⁸پطروس ورپسے وروستو وروستو په څۀ فاصله روان وو تر دے چه دَ مشر کاهن دَ کور غولى ته راورسيدو، اَؤ چه دَ ننه لاړو نو دَ خادمانو سره کښيناستو. مطلب ئے دا وو چه دَ دے هر څۀ انجام ووينى.

⁵⁹مشرانو کاهنانو اَؤ ټولے جرګے دا کوشش وکړو چه دَ عيسىٰ خلاف څۀ غلط جُرم ثابت کړى چه قتل ئے کړى.

⁶⁰خو هغوئ په داسے جُرم پيدا کولو کښے پاتے راغلل سره دَ دے چه ډير کسان دَ دروغو ګواهئ ته راوړاندے شول. آخر دوؤ سړو دا ګواهى وکړه چه

⁶¹”دَۀ وئيلى وُو چه زَۀ دَ خُدائے کور نړولے شم اَؤ په دريو ورځو کښے ئے بيا ودانولے شم.“

⁶²په دے مشر کاهن پاڅيدو اَؤ ورته ئے ووئيل چه ”دَ دے ګواهانو دَ اِلزام خلاف تا سره څۀ جواب نِشته څۀ؟“

⁶³خو عيسىٰ چپ پاتے شو. نو بيا مشر کاهن ووئيل چه ”زَۀ دَ ژوندى خُدائے سوګند درکوم چه ووايه، تۀ په رښتيا مسيح، دَ خُدائے زوئے ئے که نه؟“

⁶⁴عيسىٰ جواب ورکړو چه ”دا ستا وينا ده، خو زَۀ تاسو ته دا وايم چه دَ نن نه پس به تاسو اِبن آدم دَ خُدائے ښى لاس ته ناست اَؤ دَ آسمان په وريځو کښے په راتلو ووينئ.“

⁶⁵په دے وينا مشر کاهن خپلے جامے وشلولے اَؤ وئے وئيل چه ”دَئے کُفر وائى! دَ دے نه پس هم دَ نورو ګواهانو حاجت شته څۀ؟ تاسو دا کُفر واؤريدو.

⁶⁶ستاسو څۀ رائے ده؟“ هغوئ جواب ورکړو چه ”دَئے مُجرم دے، قتل دِ کړے شى.“

⁶⁷بيا هغوئ دَ هغۀ په مخ وتُوکل اَؤ په سوکُونو ئے ووهلو اَؤ ځنو په څپيړو ووهلو،

⁶⁸اَؤ وئيل ئے، ”اَئے مسيح! که تۀ په رښتيا نبى ئے نو دا راته ووايه چه چا ووهلے.“

⁶⁹په دے دوران کښے پطروس بهر په غولى کښے ناست وو چه يوه وينځه ورغله اَؤ ورته ئے ووئيل، ”تۀ خو هم دَ ګليل دَ عيسىٰ سره وے.“

⁷⁰خو پطروس دَ ټولو په مخکښے مُنکر شو اَؤ دا ئے وئيل چه ”نۀ پوهيږم، دا تاسو څۀ وايئ؟“

⁷¹بيا هغه دَ ډيوډئ په لور روان شو اَؤ هلته يوے بلے وينځے چه هغه وليدو نو موجُودو خلقو ته ئے وئيل چه ”دا سړے هم دَ عيسىٰ ناصرى سره وو.“

⁷²يو ځل بيا هغه مُنکر شو اَؤ په سوګندونو شو چه ”زَۀ دا سړے نۀ پيژنم.“

⁷³څۀ شيبه پس يو څو تماشګير راغلل اَؤ پطروس ته ئے ووئيل چه ”يقيناً تۀ دَ هغوئ نه يو يئے ځکه چه ستا دَ لهجے نه دا معلُوميږى.“

⁷⁴په دے هغه په ښيرو سر شو اَؤ قَسمونه ئے وخوړل چه ”زَۀ دا سړے نۀ پيژنم.“ په دغه وخت يو چرګ بانګ ووئيلو.

⁷⁵اَؤ پطروس ته دَ عيسىٰ هغه خبره راياده شوه چه وئيلى ئے وُو چه ”دَ چرګ دَ بانګ نه مخکښے به تۀ زما نه درے ځله اِنکارى شے.“ هغه بهر ووتو اَؤ په چغو چغو ئے وژړل.