Read Pashto (Nangahari) — د پښتو مقدس کتاب مرقوس 13 Bible Online

مرقوس 13 - Pashto (Nangahari) — د پښتو مقدس کتاب bible

مرقوس 13

¹څۀ وخت چه عيسىٰ دَ خُدائے دَ کور نه راوتو نو دَ هغۀ يو مُريد ورته ووئيل، ”ګوره اُستاذه! څومره لوئے ګاڼى دى! اَؤ څۀ ښکلى مکانُونه دى!“

²عيسىٰ هغۀ ته ووئيل، ”تۀ دا لوئے لوئے مکانُونه وينے؟ په دے کښے به يوه ګټه هم دَ بلے دَ پاسه پاتے نۀ شى اَؤ ټولے به راونړولے شى.“

³اَؤ هر کله چه عيسىٰ دَ ښونانو په غرۀ دَ خُدائے کور ته مخامخ ناست وو نو پطروس، يعقُوب، يوحنا اَؤ اندرياس ترے نه جُدا تپوس وکړو،

⁴”مُونږ ته ووايه چه دا کار به کله کيږى اَؤ دَ دے ټولو دَ پُوره کيدو نخښے نښانے به څۀ وى؟“

⁵عيسىٰ ووئيل چه ”پام کوئ چه څوک مو بے لارے نۀ کړى.

⁶داسے به ډير راشى چه زما دَ نُوم دعوىٰ به کوى اَؤ وائى به چه زَۀ هغه يم، اَؤ ډير خلق به بے لارے کړى.

⁷هر کله چه تاسو دَ لرے اَؤ نزدو جنګُونو خبر واؤرئ نو وار خطا کيږئ مه ځکه چه دا خبرے به ضرور پيښيږى خو آخر وخت به لا نۀ وى راغلے.

⁸قومُونه به دَ قومُونو سره په جنګ وى، بادشاهئ به دَ بادشاهو سره، په ډيرو ځايُونو کښے به زلزلے اَؤ قحطُونه راځى ولے دا به دَ تکليفونو شروع وى.

⁹خو تاسو ترے ځان بيدار ساتئ. تاسو به عدالتُونو ته حواله کيږئ، تاسو به په عبادت خانو کښے په کروړو وهلے شئ اَؤ تاسو به دَ حاکمانو اَؤ بادشاهانو دَ وړاندے پيش کولے کيږئ چه زما په باب دَ هغوئ په وړاندے اِقرار وکړئ.

¹⁰خو دَ خاتمے نه وړاندے به زما دَ زيرى وعظ ټولو قومُونو ته وکړے شى.

¹¹نو هر کله چه تاسو ګرفتار شئ اؤ عدالت ته بوتلے شئ نو دَ اول نه دا سوچ مه کوئ چه تاسو به څۀ وايئ. خو هر کله چه وخت راشى نو هغه وخت چه څۀ دَ وينا دَ پاره درکړے شى هغه وايئ، ځکه چه دا به ستاسو خبرے نۀ وى بلکه ستاسو په ژبه رُوحُ القُدس ګويا وى.

¹²ورور به دَ ورور دَ مرګ مُخبر شى اَؤ پلار دَ زوئے، بچى به دَ خپل مور پلار خلاف شى اَؤ هغوئ به وژنى.

¹³ټول به زما دَ نُوم په سبب تاسو سره کينه لرى، خو کُوم سړے چه تر آخره صبر وکړى هغه به بچ شى.

¹⁴هر کله چه تاسو ووينئ چه هغه ”برباد کوُونکى پليت شئے“ په هغه ځائے کښے ولاړ دے چرته چه نۀ دے پکار، نو لوستُونکى دِ پوهه شى. نو هغه څوک چه په يهوديه کښے وى هغوئ دِ غرُونو ته وتښتى.

¹⁵که څوک سړے دَ چت دَ پاسه وى هغه دِ کله هم کور ته لاندے راکُوز نۀ شى چه څۀ ترے وباسى.

¹⁶اَؤ که څوک په پټى کښے وى نو هغه دِ په خپله چُوغه پسے راونۀ ګرزى.

¹⁷اَفسوس دے په هغه ښځو چه په هغو ورځو کښے اُميدوارے وى اَؤ په هغو چه بچو ته تى ورکوى.

¹⁸دُعا کوئ چه دا په ژمى کښے پيښ نۀ شى.

¹⁹ځکه چه دَ کله نه خُدائے پاک دا دُنيا پيدا کړے ده، داسے تنګسيا اَؤ بده ورځ لا تر اوسه نۀ خو راغلے ده اَؤ نۀ به چرے بيا راشى.

²⁰که چرے مالِک دغه دَ تکليف ورځے کمے کړے نۀ وئے نو هيڅ يو بشر به هم ژوندے نۀ وۀ پاتے، خو دَ خپلو غوره کړو دَ خاطره هغۀ دا ورځے کمے کړے.

²¹بيا که چرے څوک تاسو ته دا ووائى چه ګورئ! مسيح دلته دے يا هلته دے، نو يقين پرے مه کوئ.

²²ولے چه داسے خلق به راځى چه ځان ته به مسيح اَؤ نبيان وائى خو وى به نه، اَؤ عجيبه کارُونه به ښکاره کوى، اَؤ که مُمکن وى نو غوره کړى خلق به وغلوى.

²³خو تاسو خبردار اوسئ، ما تاسو دَ اول نه په دے خبر کړئ.

²⁴خو په هغه ورځو کښے دَ دے تنګسيا نه پس به نمر تور شى اَؤ سپوږمئ به رڼا نۀ کوى.

²⁵ستورى به دَ آسمان نه راغورزيږى، دَ آسمان طاقتُونه به ولړزولے شى.

²⁶بيا به هغوئ ووينى چه اِبن آدم هغوئ په وريځو کښے په لوئے قُدرت اَؤ ډير شان اَؤ شوکت سره راځى.

²⁷اَؤ هغه به فرښتے واستوى اَؤ دَ آسمان دَ څلورو غاړو نه اؤ دَ دُنيا دَ آخرى حدُونو نه به خپل غوره کړى خلق راغُونډ کړى.

²⁸دَ اينځر دَ ونے نه سبق واخلئ. کله چه دَ هغے نرمے څانګے غوټئ ونيسى، پاڼے وکړى نو تاسو پوهه شئ چه اوړے په راتلو دے.

²⁹هم دغه شان چه تاسو دا ټولے علامے ووينئ نو تاسو پوهه شئ چه هغه نزدے دے اَؤ په دروازه کښے ولاړ دے.

³⁰زَۀ تاسو ته دا وايم چه دا موجُوده پيړئ به تيره نۀ شى تر څو چه دا ټولے خبرے ونۀ شى.

³¹مزکه اَؤ آسمانونه به فنا شى خو زما کلام به هيچرے فنا نۀ شى.

³²خو دَ هغے ورځے اَؤ هغه ساعت پته هيچا ته نِشته، نۀ دَ آسمان فرښتو ته اَؤ نۀ زوئے ته، خو يواځے يو پلار پرے خبر دے.

³³خبردار شئ، ويښ اوسئ تاسو دَ دے نه خبر نۀ يئ چه هغه وخت به کله راځى.

³⁴دَ دے مِثال دَ هغه سړى دے چه دَ کوره لرے وى اَؤ څۀ وخت چه خپل کور نه تلو نو خپلو غُلامانو ته ئے اِختيار ورکړو چه هر يو دِ خپل کار کوى اَؤ څوکيدار ته ئے حُکم ورکړو چه بيدار اوسه.

³⁵نو بيا تاسو بيدار اوسئ ځکه چه تاسو په دے نۀ يئ خبر چه دَ کور مالِک کله راځى، ماښام که په نيمه شپه، په چرګ بانګ که سحر په خړه.

³⁶که چرے هغه ناڅاپه راشى نو چه هغه مو اُودۀ لاندے نۀ کړى.

³⁷اَؤ زَۀ چه څۀ تاسو ته وايم نو ټولو ته ئے وايم چه بيدار اوسئ.“