Read Pashto (Nangahari) — د پښتو مقدس کتاب مرقوس 8 Bible Online

مرقوس 8 - Pashto (Nangahari) — د پښتو مقدس کتاب bible

مرقوس 8

¹په هغه ورځو کښے په يوه بله موقعه چه ډير خلق راجمع وُو اَؤ ورسره دَ خوړلو څۀ نۀ وُو، عيسىٰ خپل مُريدان راوبلل اَؤ ورته ئے ووئيل،

²”په دے خلقو زما زړۀ سوزى، دَ دريو ورځو راسے زما سره دى اَؤ څۀ ئے خوړلى نۀ دى.

³که چرے کورُونو ته ئے وُږى واستوم نو دوئ به په لاره بے هوشه شى ځکه چه ځنے په کښے دَ لرے نه راغلى دى.“

⁴مُريدانو جواب ورکړو چه ”په دے خوشى بيابان کښے به څوک دومره خلقو له ډوډئ ورکړے شى؟“

⁵هغۀ تپوس وکړو چه ”تاسو سره څو ډوډئ دى؟“ اَؤ هغوئ جواب ورکړو، ”اُووۀ.“

⁶نو هغۀ خلقو ته حُکم ورکړو چه ”په مزکه کښينئ.“ بيا هغۀ هغه اُووۀ ډوډئ واخستے، دَ خُدائے شکر ئے وويستو اَؤ هغه ډوډئ ئے ماتے کړے اَؤ مُريدانو ته ئے دَ ويشلو دَ پاره ورکړے اَؤ هغوئ خلقو ته ورکړے.

⁷دَ هغوئ سره يو څو واړۀ کبان هم وُو چه په هغو ئے هم شکر وويستو اَؤ حُکم ئے وکړو چه ”دا هم پرے تقسيم کړئ.“

⁸هغو ټولو خوراک په مړه خيټه وخوړلو اَؤ دَ پاتے شوى ټُکړو نه اُووۀ ټوکرئ ډکے شوے.

⁹خلق خوا اَؤ شا څلور زره وُو. بيا ئے هغوئ رُخصت کړل،

¹⁰اَؤ سمدستى دَ خپلو مُريدانو سره کِشتئ ته وختلو اَؤ دَ لمتيانو علاقے ته لاړو.

¹¹نو بيا فريسيان بهر راووتل اَؤ دَ عيسىٰ سره ئے مُناظره شروع کړه. دَ آزميښت په طور ئے دَ هغۀ نه څۀ آسمانى نخښه وغوښته.

¹²هغۀ دَ ځان سره يو سوړ آسويلے وکړو اَؤ وئے وئيل چه ”دا پيړئ نخښے دَ څۀ دَ پاره غواړى؟ زَۀ درته دا وايم چه دے پيړئ ته به يوه نخښه هم ورنۀ کړے شى.“

¹³په دے خبره ئے دوئ پريښول اَؤ بيا کِشتئ ته وختلو اَؤ دَ درياب بلے غاړے ته لاړو.

¹⁴خو دا ځلے دَ مُريدانو نه دَ ځان سره ډوډئ وړل هير شوى وُو.

¹⁵په کشتئ کښے دَ هغوئ سره يکى يوه ډوډئ وه. عيسىٰ هغوئ له خبردارے ورکړو اَؤ وئے وئيل چه ”دَ فريسيانو اَؤ دَ هيروديس دَ خمبيرے نه به ګورے، ځان ساتئ.“

¹⁶هغوئ په خپلو کښے ووئيل چه ”دا په دے چه زمُونږ سره ډوډئ نِشته.“

¹⁷هغه دَ هغوئ په زړُونو پوهه شو چه په دوئ کښے څۀ دى، ځکه ئے تپوس ترے وکړو، ”دا تاسو داسے خبرے ولے کوئ چه ګنى ډوډئ درسره نِشته؟ آيا تاسو ته تر اوسه معلُومه نۀ ده؟ تاسو لا تر اوسه نه يئ پوهه؟ آيا ستاسو دِماغ تر اوسه بند دى؟

¹⁸تاسو سترګے خو لرئ، نو تاسو وينئ نۀ؟ تاسو غوږُونه لرئ، نو تاسو آؤرئ نه؟ آيا ستاسو نه هير دى؟

¹⁹چه کوم وخت ما پنځه ډوډئ پنځه زره کسانو ته ماتے کړے، نو تاسو دَ پاتے شوو ټُکړو نه څومره ټوکرئ ډکے کړے وے؟“ هغوئ ورته ووئيل چه ”دولس.“

²⁰”اَؤ چه کله مے اووۀ ډوډئ څلور زرو تنو ته ماتے کړے، نو تاسو دَ پاتے شوو ټُکړو نه څومره ټوکرئ ډکے کړے وے؟“ هغوئ جواب ورکړو ”اُووۀ.“

²¹نو هغۀ ووئيل چه، ”لا تر اوسه هم نۀ پوهيږئ؟“

²²هغوئ بيتِ صدا ته ورسيدل. هلته خلقو عيسىٰ له يو ړُوند سړے راوستو اَؤ سوال ئے وکړو چه په هغۀ لاس ولګوى.

²³هغۀ ړُوند سړے دَ لاسه ونيوو اَؤ دَ کلى نه ئے بهر بوتلو. بيا ئے دَ هغۀ په سترګو لاړے پورے کړے اَؤ خپل لاس ئے پرے ولګوو اَؤ تپوس ئے وکړو چه ”څۀ ورته ښکارى که نه؟“

²⁴دَ سړى سترګے بينا شوے اَؤ وئے وئيل، ”زَۀ سړى وينم لکه دَ ونو په شان، خو دا ګرځى.“

²⁵عيسىٰ دَ هغۀ په سترګو بيا لاس کيښودو ”اَؤ هغه سړى په ځير ورته وکتل،“ نو هغه جک جوړ شو اَؤ هر شے ورته صفا ښکاره شو.

²⁶بيا عيسىٰ هغه کور ته رُخصت کړو اَؤ ورته ئے ووئيل چه ”په کلى کښے مه ننوزه.“

²⁷عيسىٰ اَؤ دَ هغۀ مُريدان قيصريه فيليپى ته لاړل. هغۀ په لاره دَ خپلو مُريدانو نه تپوس وکړو چه ”خلق څۀ وائى چه زَۀ څوک يم؟“

²⁸هغوئ جواب ورکړو چه ”ځنے وائى چه بپتسمه ورکوُونکے يحيىٰ دے، ځنے درته اِلياس وائى اَؤ نور دِ دَ نبيانو نه يو نبى ګڼى.“

²⁹نو بيا هغۀ تپوس وکړو چه ”تاسو مے څۀ ګڼئ چه زَۀ څوک يم؟“ پطروس جواب ورکړو چه ”تۀ مسيح ئے.“

³⁰بيا هغۀ هغوئ په سختئ سره منع کړل چه ”زما په حقله هيچا ته څۀ مۀ وايئ.“

³¹اَؤ بيا ئے هغوئ ته تعليم شروع کړو چه ”اِبن آدم به په ځان ډير تکليفونه تير کړى اَؤ مشران، مشران کاهنان اَؤ دَ شرعے عالمان به ئے مُجرم کړى اَؤ قتل به ئے کړى، خو په دريمه ورځ به هغه بيا ژوندے پاڅى.“

³²هغۀ دا خبره په صفا ټکو کښے ووئيله. نو پطروس هغه دَ لاسه ونيولو، يوے ډډے ته ئے بوتلو اَؤ وئے زورلو.

³³خو عيسىٰ مخ راواړولو، خپلو مُريدانو ته ئے وکتل اَؤ پطروس ئے ورټلو. ورته ئے ووئيل چه ”رانه لرے شه شيطانه! تۀ دَ بنى آدمو په شان سوچ کوے، نۀ چه دَ خُدائے په شان.“

³⁴بيا عيسىٰ خلق اَؤ خپل مُريدان هم راوبلل اَؤ هغوئ ته ئے ووئيل، ”هر څوک چه زما مُريد جوړيدل غواړى هغه دِ خپل ځان هير کړى، په کار دى چه هغه دِ خپله سولئ پورته کړى اَؤ ما پسے دے راځى.

³⁵څوک چه دَ ځان خير غواړى هغه به ترے نه ورک شى، خو کُوم سړے چه دَ زيرى اَؤ زما دَ خاطره ځان ورک کړى نو هغه به ئے بچ کړى.

³⁶که يو بنى آدم دَ خپل ځان په بدل کښے ټوله دُنيا وګټى نو څۀ ئے وګټل؟

³⁷هغه دَ دے ځان دَ بيا حاصلولو دَ پاره څۀ قيمت ورکولے شى؟

³⁸اَؤ هر هغه څوک چه په دے دَ خُدائے نه مُنکره اَؤ ګُناه ګاره پيړئ کښے په ما اَؤ زما په کلام شرميږى، نو اِبن آدم به هم په هغۀ په هغه وخت شرميږى کله چه هغه دَ خپل پلار په لوئى کښے دَ پاکو فرښتو سره راشى.“