Read Pashto (Nangahari) — د پښتو مقدس کتاب لوقا 1 Bible Online

لوقا 1 - Pashto (Nangahari) — د پښتو مقدس کتاب bible

لوقا 1

¹ښاغلی تیوفیلوسه: ډېرو خلکو کوښښ کړی دی ترڅو هغه پیښې بیان کړي چې زمونږ په منځ کې رامنځته شوي دي.

²هغوی هغه څه لیکلي دي چې مونږ ته د هغو خلکو له خوا را رسول شوي دي چې دا پیښې یې له پیل نه په خپلو سترګو لیدلې وې او هغه پیغام یې اعلان کړی دی.

³ښاغلی تیوفیلوسه، ما هم په خپل وار سره دا ټولې پیښې له پیل څخه په غور سره وڅیړلې، نو دا راته ښه ښکاره شوه چې هغه تاسو ته په ترتیب سره ولیکم.

⁴دا کار د دې دپاره کوم ترڅو ته د هغو ټولو شیانو په هکله په حقیقت پوه شې چې ورڅخه خبر یې.

⁵د یهودیې د پادشاه هیرودیس په زمانه کې یو یهودي کاهن ؤ چې زکریا نومیده او د ابیا د ډلې څخه ؤ. د هغه ښځه الیزابت نومیدله او هغه هم د هارون کاهن د کورنۍ څخه وه.

⁶هغوی دواړه د خدای په نظر کې رښتیني خلک وو او په بشپړه توګه یې د څښتن په ټولو قوانینو او حکمونو باندې عمل کاوه.

⁷خو هغوی اولاد نه درلود ځکه چې الیزابت شنډه وه او دواړه ډېر زاړه وو.

⁸کله چې د خدای په کور کې د خدمت وار د زکریا ډلې ته ورسېد، نو زکریا د کاهن په توګه په خپله دنده کی بوخت شو.

⁹د کاهنانو د دود له مخې هغه د پچې په وسیله غوره شو ترڅو د خدای کور ته ننوځي او خوشبویي وسوځوي.

¹⁰د خوشبویۍ د سوځولو په وخت کې ګڼ شمیر عبادت کوونکي دباندې ولاړ وو او دعا یې کوله.

¹¹په دې وخت کې د څښتن یوه فرښته زکریا ته ورښکاره شوه چې د قربانۍ د ځای ښي خواته چې خوشبویي په کې سوځېدله ولاړه وه.

¹²کله چې زکریا هغه ولیدله نو ټکان یې وخوړ او وېره ورباندې راغله.

¹³خو فرښتې هغه ته وویل: «ای زکریا مه وېرېږه! ستا دعا قبوله شوې ده او ستا ښځه الیزابت به تاته یو زوی وزیږوي او ته به په هغه باندې یحیی نوم کېږدې.

¹⁴هغه به ستا دپاره د خوښۍ او خوشحالۍ سبب شې او ډېر خلک به د هغه په زېږېدلو خوشحالي وکړي.

¹⁵ځکه چې هغه به د څښتن په نظر کې لوی سړی وي. هغه باید هیڅکله شراب او یا داسې کوم څه ونه څښي چې ورباندې نېشه شي. هغه به د مور د ګیډې نه د روح القدس څخه ډک وي،

¹⁶او هغه به ډېر اسراییلیان د خپل څښتن خدای خواته راواړوي.

¹⁷یحیی به په هماغه روح او قدرت سره چې الیاس پیغمبر درلود د څښتن په مخکې روان وي، ترڅو پلرونه او اولادونه سره پخلا کړي، سرکښه کسان د نېکانو د حکمت نه ډکې لارې ته راوګرځوي او خلک د څښتن راتلو ته تیار کړي.»

¹⁸زکریا فرښتې ته وویل: «زه څنګه په دې باور کولای شم چې داسې به وشي؟ ځکه چې زه زوړ سړی یم او ښځه مې هم زړه ده.»

¹⁹فرښتې ځواب ورکړ: «زه جبراییل یم چې د خدای په حضور کې ودرېږم. زه رالېږل شوی یم چې ستا سره خبرې وکړم او دا زېری درته درکړم.

²⁰خو ګوره، ته به ګونګ شې او د دې شیانو تر پېښېدو پورې به خبرې نه شې کولی، ځکه چې تا زما په خبرو چې په ټاکل شوي وخت کې به رښتیا شي، باور ونه کړ.»

²¹په دې وخت کې خلکو د زکریا دپاره انتظار کاوه او حیران وو چې هغه ولې دومره زیات وخت د خدای په کور کې تېر کړ.

²²کله چې هغه راووت، د هغوی سره یې خبرې نه شوې کولی. نو دوی پوه شول چې هغه د خدای په کور کې کومه رویا لیدلې، ځکه چې هغوی ته یې په لاسونو اشارې کولې خو خبرې یې نه شوې کولی.

²³کله چې د خدای په کور کې د زکریا د خدمت وخت پای ته ورسېد، نو هغه بېرته خپل کور ته لاړ.

²⁴څه موده وروسته د هغه ښځه الیزابت امیدواره شوه او پنځه میاشتې یې خپل ځان د خلکو څخه پټ وساته او له ځانه سره به یې ویل:

²⁵«څښتن اوس زما دپاره دا کار وکړ او په ما یې رحم وکړ او زه یې د خلکو په مخکې د شرم څخه خلاصه کړم.»

²⁶د الیزابت د امیدوارۍ په شپږمه میاشت خدای جبراییل فرښته د جلیل په ولایت کې د ناصریې په نوم یو ښار ته ولېږله،

²⁷ترڅو یوې پېغلې ته چې د یوسف نومي سړي سره یې چې د داود پادشاه د کورنۍ څخه ؤ کوژدن شوې وه، ورشي. د هغې پېغلې نوم مریم ؤ.

²⁸فرښته هغې ته راغله او ویې ویل: «سلام په تا چې ډېر فضل درباندې شوی دی، څښتن ستا سره مل دی.»

²⁹مریم د فرښتې په خبره ډېره وارخطا شوه او په فکر کی ډوبه شوه چې د دې خبرو معنی به څه وي.

³⁰فرښتې هغې ته وویل: «ای مریمې مه وېرېږه! خدای په تا مهربانه شوی دی.

³¹ګوره، ته به امیدواره شې او زوی به دې وشي او د هغه نوم به عیسی کېږدې.

³²هغه به لوی شخصیت وي او د خدای تعالی د زوی په نوم به یاد شي. څښتن خدای به د هغه د نیکه داود تخت هغه ته ورکړي.

³³هغه به د تل دپاره د یعقوب په اولادې باندې پادشاهي کوي او د هغه پادشاهي به هیڅکله نه ختمیږي.»

³⁴مریم فرښتې ته وویل: «داسې څنګه کېدای شي؟ زه لا پېغله یم او تر اوسه واده شوې نه یم.»

³⁵فرښتې ځواب ورکړ: «په تا به روح القدس نازل شي او د خدای تعالی قدرت به په تا باندې سیوری وکړي او له دې امله به هغه سپیڅلی ماشوم د خدای د زوی په نوم یاد شي.

³⁶وګوره، ستا خپلوانه الیزابت به هم په زاړه عمر کې زوی راوړي. سره له دې چې هغې ته شنډه او بې اولاده ویل کېده، خو اوس شپږ میاشتې کیږي چې امیدواره ده.

³⁷ځکه چې د خدای دپاره هیڅ کار ناشونی نه دی.»

³⁸مریم وویل: «زه د څښتن خدمتګاره یم. تا چې څه وویل هماغسې دې وشي.» او فرښته ورڅخه لاړه.

³⁹څه موده وروسته مریم روانه شوه او په بیړه یو ښار ته چې د یهودیې په غرنۍ سیمه کې ؤ لاړه.

⁴⁰هغه د زکریا کور ته ورننوتله او په الیزابت یې سلام ووایه.

⁴¹کله چې الیزابت د مریم سلام واورېد، نو په ګېډه کې یې ماشوم ټوپونه ووهل. الیزابت د روح القدس نه ډکه شوه

⁴²او په لوړ آواز سره یې وویل: «ته په ټولو ښځو کې یوه ډېره مبارکه ښځه یې او هغه ماشوم مبارک دی چې ستا نه به پیدا شي!

⁴³زه څوک یم چې زما د بادار مور دې زما لیدلو ته راشي؟

⁴⁴کله چې ستا د سلام آواز زما تر غوږ شو، نو ماشوم له خوشحالۍ نه زما په ګېډه کې ټوپونه ووهل.

⁴⁵ته څومره بختوره یې چې په دې باندې دې باور وکړ چې څښتن درته څه ویلي وو هغه به پوره شي.»

⁴⁶مریم وویل: «بیانوي مې زړه لویي د څښتن

⁴⁷دی زما روح خوشحاله ځکه خدای مې دی ژغورونکی

⁴⁸ځکه زه یې کړمه یاده، خپله عاجزه خدمتګاره له همدې اوس نه به ټول خلک ما بختوره بولي

⁴⁹ځکه قادر خدای کړي لوی کارونه ما ته چې سپیڅلی یې دی نوم

⁵⁰د یو نسل نه تر بله کړي رحمت په هغو خلکو باندې چې کوي وېره ځینې

⁵¹هغه کړي دي قوي کارونه په خپلو مټو کبرجن خلک یې خپاره واره کړل د خپلو زړونو د خیالونو سره

⁵²راغورځولي یې شاهان خپلو تختونو څخه سرلوړي کړي یې دي عاجزه خلک

⁵³ماړه کړي یې دي وږي په ښو شیانو شتمن خلک یې شړلي تش لاسونه

⁵⁴مرسته یې کړې د خپل خادم اسراییلو سره رحم یې کړی تل په خپلو خلکو

⁵⁵لکه یې څنګه چې وعده کړې وه زمونږ نیکونو، ابراهیم او اولادې سره یې د تل دپاره»

⁵⁶مریم نږدې درې میاشتې د الیزابت سره پاتې شوه او بیا بېرته خپل کور ته لاړه.

⁵⁷هغه وخت راورسېد چې الیزابت ماشوم وزیږوي او د هغې زوی پیدا شو.

⁵⁸ګاونډیانو او خپلوانو یې واورېدل چې څښتن په هغې باندې ډېر رحم کړی دی او ټولو ورسره خوشحالي وکړه.

⁵⁹کله چې ماشوم د اتو ورځو شو نو هغوی راغلل چې سنت یې کړي او غوښتل یې چې د خپل پلار زکریا نوم پرې کیږدي.

⁶⁰خو مور يې وویل: «نه، د هغه نوم به یحیی وي.»

⁶¹هغوی ورته وویل: «خو ستاسو په خپلوانو کې په دې نوم څوک نشته.»

⁶²بیا هغوی د هغه پلار ته اشاره وکړه او پوښتنه يې ترې وکړه چې په ماشوم باندې کوم نوم غواړي کیږدي.

⁶³زکریا یوه تخته راوغوښتله او په هغې باندې یې ولیکل: «د هغه نوم یحیی دی.» هغوی ټول ډېر حیران شول.

⁶⁴زکریا سمدلاسه بېرته په خبرو راغی او خدای ته په ثناه ویلو یې پیل وکړ.

⁶⁵ټول ګاونډیان ووېرېدل او د یهودیې په ټوله غرنۍ سیمه کې خلکو د دې شیانو په هکله خبرې کولې.

⁶⁶هر چا چې دا خبره اوریدله نو د هغې په هکله یې فکر کاوه او پوښتنه یې کوله: «د دې ماشوم څخه به په راتلونکې کې څه جوړ شي؟» ځکه چې د څښتن لاس د هغه په سر باندې ؤ.

⁶⁷د یحیی پلار زکریا د روح القدس نه ډک شو او داسې پیشګویي یې وکړه:

⁶⁸«ثناه او صفت دې وي څښتن ته چې دی خدای د اسراییلو ځکه راغی چې وکړي مرسته د خپل قوم سره چې کړي آزاد هغوی

⁶⁹هغه پیدا کړ مونږ ته زورور ژغورونکی د اولادې نه د داود چې خدمتګار یې ؤ خپل

⁷⁰لکه څنګه چې پخوا یې وو ویلي په خوله د پاکو پخوانیو پیغمبرانو

⁷¹چې مو خلاص کړي د خپلو دښمنانو ځینې، د هغو خلکو څخه چې کوي کرکه له مونږ

⁷²رحم وبه کړي هغه زمونږ نیکونو باندې او رایادوي به خپل سپیڅلی لوظ

⁷³هغه قسم چی ؤ خوړلی هغه زمونږ د نیکه ابراهیمه سره

⁷⁴چې به کړي خلاص هغه مونږ له دښمنانو ځینې چې بې له وېرې وکړو مونږه خدمت د هغه

⁷⁵په ټول ژوندون کې د پاکۍ او د نېکۍ سره

⁷⁶او ای ماشومه زما، ته به یادیږې پیغمبر د لوی خدای ځکه چې ځې به له څښتنه مخکې، چې کړې تیاره لار ه ته د هغه دپاره

⁷⁷چې په دې پوه کړې قوم د هغه چې دوی به ومومي خلاصون د خپلو ګناهونو په بخښلو سره

⁷⁸زمونږ د خدای د دلسوزۍ او مهربانۍ په سبب په مونږ را وبه خیژي لمر د سهار پاس له آسمانه څخه

⁷⁹ترڅو چې راولي رڼا په هغو خلکو باندې چې تېروي ژوند په تیارو کې د مرګ او برابر کړي قدمونه زمونږ د سلامتۍ په لاره»

⁸⁰هغه ماشوم غټیده او په روحاني لحاظ قوي کېده او تر هغه وخته پورې په دښته کې اوسېده ترڅو د اسراییلو خلکو ته په څرګنده توګه ورښکاره شو.