Read Pashto (Nangahari) — د پښتو مقدس کتاب لوقا 18 Bible Online

لوقا 18 - Pashto (Nangahari) — د پښتو مقدس کتاب bible

لوقا 18

¹عیسی خپلو شاګردانو ته دا مثال راوړ چې هغوی ته وروښایي چې تل باید دعا وکړي او هیڅکله ناامیده نه شئ.

²هغه وویل: «په یو ښار کې یو قاضي ؤ چې نه له خدایه وېرېده او نه یې د خلکو پروا لرله.

³په همدې ښار کې یوه کونډه وه چې هر وخت به هغه ته راتله او د خپل حق په خاطر به یې ورته زارۍ کولې او ویل به یې چې زما او زما د دښمن ترمنځ په شخړه کې زما سره انصاف وکړه.

⁴قاضي ډېره موده نه غوښتل چې کوم کار وکړي، خو آخر هغه د خپل ځان سره وویل: «که څه هم زه نه له خدایه وېرېږم او نه د خلکو پروا لرم،

⁵خو دا چې دې کونډې ما ته سرخوږی پیدا کړی دی، نو زه به د هغې سره انصاف وکړم. که نه نو هغه به هر وخت راځي او ما به تنګوي.»»

⁶بیا عیسی وویل: «تاسو واورېدل چې دې بې انصافه قاضي څه وویل.

⁷آیا خدای به د خپلو غوره شويو خلکو سره چې شپه او ورځ ورته د مرستې په خاطر فریادونه کوي، انصاف ونه کړي؟ آیا د هغوی سره به په مرسته کولو کې ځنډ وکړي؟

⁸زه درته وایم چې هغه به ژر د هغوی سره انصاف وکړي. خو کله چې د انسان زوی راشي نو آیا هغه به د ځمکې په مخ داسې څوک پیدا کړي چې ایمان ولري؟»

⁹همدارنګه عیسی د هغو خلکو دپاره چې په خپل ځان ډاډمن وو چې نېک خلک دي او نور یې سپک ګڼل، دا مثال راوړ:

¹⁰«یو وخت دوه تنه چې یو یې فریسي او بل یې مالیه ټولوونکی ؤ د دعا دپاره د خدای کور ته لاړل.

¹¹فریسي ودرېد او د خپل ځان سره یې داسې دعا وکړه: «ای خدایه! ستا شکر کوم چې د نورو په شان حریص، بې ایمانه او زناکار نه یم او نه د دې مالیه ټولوونکي په شان یم.

¹²زه په هفته کې دوه ورځې روژه نیسم او څه چې ګټم د هغې لسمه برخه ورکوم.»

¹³خو هغه مالیه ټولوونکی لیرې ولاړ ؤ او تر دې چې نه یې غوښتل پاس آسمان ته وګوري، خو خپله سینه یې وهله او ویل یې: «ای خدایه! په ما ګناهکار رحم وکړه.»»

¹⁴عیسی وویل: «زه تاسو ته وایم چې هغه مالیه ټولوونکی چې خپل کور ته لاړ بخښل شوی دی، نه هغه فریسي. ځکه هرڅوک چې خپل ځان لوی ګڼي هغه به خوار شي او هرڅوک چې خپل ځان عاجز کړي نو هغه به سرلوړی شي.»

¹⁵ځینو خلکو به عیسی ته خپل ماشومان راوستل چې خپل لاس په هغوی باندې کیږدي. کله چې شاګردانو دا ولیدل نو هغوی یې ورټل،

¹⁶خو عیسی هغه ماشومان خپل ځان ته راوغوښتل او ویې ویل: «پرېږدئ چې ماشومان ماته راشي، هغوی مه منع کوئ، ځکه چې د خدای پادشاهي د همداسې خلکو ده.

¹⁷زه تاسو ته رښتیا وایم، هرڅوک چې د خدای پادشاهي د یو ماشوم په څېر ونه مني نو هیڅکله به هغې ته وردننه نه شي.»

¹⁸یو یهودي مشر د عیسی څخه پوښتنه وکړه: «ای نېک استاده! زه باید څه وکړم چې تلپاتې ژوندون وګټم؟»

¹⁹عیسی ورته وویل: «ولې ماته نېک وایې؟ پرته له خدایه بل هیڅوک نېک نه دی.

²⁰ته په حکمونو باندې پوهېږې: زنا مه کوه، قتل مه کوه، غلا مه کوه، د دروغو شاهدي مه ورکوه او د خپل مور او پلار درناوی کوه.»

²¹هغه سړي ځواب ورکړ: «ما له ځلميتوب څخه په دې ټولو حکمونو عمل کړی دی.»

²²کله چې عیسی دا واورېدل نو هغه ته یې وویل: «په تا کې اوس هم د یو شي کمی شته. هرڅه چې لرې هغه خرڅ کړه او پیسې یې غریبانو ته ورکړه نو ته به په آسمان کې خزانې ولرې، بیا راشه او زما پیروي وکړه.»

²³کله چې هغه سړي دا خبره واورېدله نو ډېر غمجن شو، ځکه چې هغه ډېر شتمن سړی ؤ.

²⁴کله چې عیسی ولیدل چې هغه غمجن شو نو ویې ویل: «د یو شتمن سړي دپاره د خدای په پادشاهۍ کې ننوتل څومره ګران کار دی.

²⁵د ستنې د سوري نه د اوښ تېرېدل آسانه دي له دې نه چې یو شتمن سړی دې د خدای پادشاهۍ ته ورننوځي.»

²⁶کومو خلکو چې دا واورېدل نو د هغه نه یې پوښتنه وکړه: «نو بیا څوک کولای شي چې خلاصون ومومي؟»

²⁷عیسی ځواب ورکړ: «هغه څه چې د انسانانو دپاره ناشوني دي، هغه د خدای دپاره ممکن دي.»

²⁸پطروس وویل: «وګوره، مونږ خپل هرڅه پریښي دي او تا پسې روان شولو.»

²⁹عیسی هغوی ته وویل: «هو، زه تاسو ته رښتیا وایم هرڅوک چې د خدای د پادشاهۍ دپاره خپل کور، خپله ښځه، ورونه، مور او پلار او اولادونه پرېږدي،

³⁰نو هغه به په دې دنیا کې د هغې څو چنده بدل ترلاسه کړي او په آخرت کې به تلپاتې ژوندون ولري.»

³¹بیا هغه خپل دولس شاګردان ګوښه کړل او هغوی ته یې وویل: «واورئ! مونږ اوس اورشلیم ته ځو او هغه څه چې پیغمبرانو د انسان د زوی په هکله لیکلي دي، هغه به پوره شي.

³²هغه به غیریهودیانو ته په لاس ورکړل شي، هغوی به ورباندې ملنډې ووهي، سپکاوی به یې وکړي او لاړې به ورباندې تو کړي.

³³هغه به په دورو ووهي او وبه یې وژني، خو په درېمه ورځ به بیا راژوندی شي.»

³⁴خو شاګردان په دې خبرو پوه نه شول، ځکه چې د دې خبرو معنی د هغوی څخه پټه ساتل شوې وه او هغوی نه پوهېدل چې عیسی د څه شي په هکله خبرې کولې.

³⁵کله چې عیسی اریحا ته نږدې شو، نو یو ړوند سړی په لاره کې ناست ؤ او خیر یې غوښته.

³⁶کله چې هغه سړي د ګڼ شمیر خلکو شورماشور چې له هغه ځایه تېرېدل واورېد نو پوښتنه یې وکړه: «څه خبره ده؟»

³⁷هغوی ورته وویل: «ناصري عیسی په دې لاره تېریږي.»

³⁸نو هغه چیغې ووهلې: «ای عیسی د داود زویه! په ما رحم وکړه.»

³⁹کوم خلک چې د عیسی څخه مخکې روان وو هغه سړی ورټلو او ورته ویې ویل: «غلی شه.» خو هغه نور هم په لوړ آواز چیغې کړې: «ای د داود زویه! په ما رحم وکړه.»

⁴⁰نو عیسی ودرېد او امر یې وکړ چې هغه سړی هغه ته راولي. کله چې ورنږدې شو نو عیسی ورڅخه پوښتنه وکړه:

⁴¹«څه غواړې چې درته ویې وکړم؟» هغه وویل: «ای ښاغلیه! غواړم چې بینا شم.»

⁴²عیسی هغه ته وویل: «بینا شه، ته خپل ایمان روغ کړې.»

⁴³او هغه سمدلاسه بینا شو او په داسې حال کې چې د خدای ثناه یې ویله په عیسی پسې روان شو. کله چې خلکو دا هرڅه ولیدل نو ټولو د خدای ثناه وویله.