Read Pashto (Nangahari) — د پښتو مقدس کتاب لوقا 2 Bible Online

لوقا 2 - Pashto (Nangahari) — د پښتو مقدس کتاب bible

لوقا 2

¹په هغه وخت کې امپراتور اګوستوس د روم په ټوله امپراتورۍ کې د سرشمیرنې په خاطر یو فرمان جاري کړ.

²دا لومړنۍ سرشمیرنه وه چې د سوریې د والي کرینوس په وخت کې وشوه.

⁴نو یوسف هم د جلیل د ناصریې د ښار څخه د یهودیې د ولایت د بیت لحم ښار ته چې د داود پادشاه د زیږېدنې ځای ؤ لاړ، ځکه چې هغه د داود د کورنۍ څخه ؤ.

⁵یوسف د مریم سره چې کوژدنه یې وه او امیدواره وه د نوم لیکنې لپاره هلته لاړ.

⁶او کله چې هغوی په بیت لحم کې وو د هغې د ماشوم د زېږېدلو وخت راورسېد.

⁷هغې خپل لومړنی ماشوم چې هلک ؤ وزېږاوه. هغه یې په اورني کې تاو کړ او په آخور کې یې کېښود، ځکه چې په مسافرخانه کې د هغوی دپاره ځای نه ؤ.

⁸په هغې سیمه کې څو شپانه وو چې په شاوخوا ځمکو کې اوسېدل او د شپې به یې په خپلو رمو پام کاوه.

⁹د څښتن فرښته هغوی ته ښکاره شوه او د څښتن د جلال رڼا په هغوی باندې وځلېدله. هغوی سخت ووېرېدل.

¹⁰خو فرښتې هغوی ته وویل: «مه وېرېږئ، ما تاسو ته یو زېری راوړی چې د ټولو خلکو دپاره به یوه لویه خوشحالي وي.

¹¹همدا نن د داود په ښار کې ستاسو دپاره یو ژغورونکی زیږېدلی دی چې هغه مسیح او څښتن دی.

¹²او ستاسو دپاره به دا نښه وي چې یو ماشوم به پیدا کړئ چې په اورني کې به تاو شوی وي او په آخور کې به پروت وي.»

¹³ناڅاپه د هغې فرښتې سره یو لوی آسماني لښکر راښکاره شو چې د خدای دا ثناه یې ویله:

¹⁴«خدای ته دې وي جلال په لوړو آسمانونو کې او سوله او سلامتي دې وي په ځمکه باندې په هغو خلکو باندې چې ترې راضي دی هغه»

¹⁵کله چې فرښتې هغوی پرېښودل او بېرته آسمان ته لاړې، نو شپانو یو بل ته سره وویل: «راځئ چې بیت لحم ته لاړ شو او هغه څه چې پېښ شوي دي او څښتن خدای مونږ د هغې څخه خبر کړي یو، ووینو.»

¹⁶نو هغوی په منډه لاړل او مریم او یوسف یې پیدا کړل او ویې لیدل چې ماشوم په آخور کې پروت دی.

¹⁷کله چې شپانو هغه ماشوم ولید، نو څه چې یې د هغه په هکله اوریدلي وو ټول یې خبر کړل.

¹⁸هر چا چې د شپانو خبرې اوریدلې نو حیران پاتې کېدل.

¹⁹خو مریم دا ټول شیان په خپل زړه کې ساتل او د هغو په هکله یې ډېر زیات فکر کاوه.

²⁰شپانه بېرته لاړل او څه چې يې اوریدلي او لیدلي وو د هغې دپاره یې د خدای لویي بیانوله او ثناه يې ویله، ځکه دا هماغه څه وو چې فرښتې هغوی ته ویلي وو.

²¹په اتمه ورځ کله چې د ماشوم د سنتولو وخت راورسېد، نو په هغه یې عیسی نوم کېښود. دا هغه نوم ؤ چې مخکې له دې چې مریم امیدواره شي فرښتې ورباندې ایښی ؤ.

²²کله چې د موسی د شریعت له مخې د یوسف او مریم د پاکوالي د مراسمو وخت راورسېد، نو هغوی هغه ماشوم اورشلیم ته بوتلو چې څښتن ته یې وړاندې کړي.

²³لکه څنګه چې په شریعت کې لیکل شوي دي: «هر لومړنی نر ماشوم چې پیدا شي باید څښتن ته وقف شي.»

²⁴نو هغوی د شریعت له مخې قرباني وکړله یعنې یوه جوړه کوترې یا دوه ځوانې قمري.

²⁵هغه وخت په اورشلیم کې د شمعون په نوم یو سړی اوسېده. هغه یو رښتینی او پرهیزګاره سړی ؤ او د اسراییلو د ژغورنې انتظار یې کاوه او روح القدس ورسره ؤ.

²⁶روح القدس شمعون ته دا په ښکاره ویلي وو چې ترڅو پورې د خدای له خوا وعده شوی مسیح ونه ویني هغه به نه مړ کیږي.

²⁷شمعون د روح القدس په لارښودنه دننه د خدای کور ته راغی. کله چې د عیسی مور او پلار ماشوم هلته راوست ترڅو د هغه دپاره هغه څه وکړي چې د موسی شریعت یې غوښتنه کوله،

²⁸نو شمعون هغه ماشوم په غېږ کې واخیست او د خدای ثناه یې وویله:

²⁹«ای څښتن تعالی، اوس دې رخصت کړه خپل خادم د دې نړۍ نه په سلامتۍ سره لکه چې څنګه تا وعده کړې وه

³⁰ما ستا خلاصون ولیده په خپلو سترګو،

³¹هغه خلاصون چې تیار کړی تا د ټولو خلکو په حضور کې

³²یوه رڼا چې به ښکاره کړي اراده ستا غیریهودو ته او کړي به ستا قوم اسراییل سرلوړی»

³³د ماشوم مور او پلار په هغو خبرو چې شمعون د هغه په هکله وکړې حیران شول.

³⁴شمعون د هغوی دپاره د خیر دعا وکړه او د عیسی مور مریم ته یې وویل: «دا ماشوم په اسراییلو کې د ډېرو د بربادۍ او یا سرلوړۍ دپاره د خدای له خوا غوره شوی دی. هغه د خدای له خوا یوه نښه ده چې ډېر خلک به یې مخالفت وکړي

³⁵او په دې ډول د ډېرو زړونو پټ خیالونه به ښکاره شي. او ای مریمې، غم به لکه د تیرې تورې په شان ستا زړه هم سوری سوری کړي.»

³⁶هلته یوه پیغمبره وه چې حنا نومیدله، د فنوییل لور وه او د اشیر د قبیلې څخه وه. هغه د واده څخه وروسته یوازې اووه کاله د خپل میړه سره واوسیدله او له هغې وروسته یې میړه مړ شو.

³⁷اوس هغه څلوراتیا کلنه او کونډه وه. هغه هیڅکله د خدای د کور څخه نه وتله، بلکې شپه او ورځ به یې په روژه نیولو او دعا کولو سره د خدای عبادت کاوه.

³⁸حنا په هماغه وخت کې یوسف او مریم ته راغله، د خدای شکر یې وویست او د هغو ټولو خلکو سره یې چې د اورشلیم د آزادۍ په تمه وو د هغه ماشوم په هکله خبرې وکړې.

³⁹کله چې یوسف او مریم هر څه د شریعت له مخې سرته ورسول، نو بېرته خپل ښار ناصریې ته چې په جلیل کې ؤ راستانه شول.

⁴⁰هغه ماشوم لوی او قوي شو، هغه د حکمت څخه ډک ؤ او د خدای فضل ورسره ؤ.

⁴¹د عیسی مور او پلار به هر کال د فسحې د اختر دپاره اورشلیم ته تلل.

⁴²کله چې عیسی دولس کلن شو نو هغوی د خپل دود او دستور له مخې د اختر دپاره اورشلیم ته لاړل.

⁴³کله چې د اختر ورځې پای ته ورسیدلې، هغوی بېرته خپل کور ته روان شول او عیسی چې لا کوچنی هلک ؤ په اورشلیم کې پاتې شو، خو د هغه مور او پلار ترې خبر نه وو.

⁴⁴هغوی ګومان کاوه چې عیسی د نورو مسافرو په ډله کې روان دی. هغوی ټوله ورځ سفر وکړ او بیا یې د خپلو خپلوانو او دوستانو په منځ کې د هغه په لټولو پیل وکړ.

⁴⁵کله یې چې هغه پیدا نه کړ نو بېرته اورشلیم ته لاړل ترڅو هغه ولټوي.

⁴⁶درې ورځې وروسته یې هغه د خدای په کور کې پیدا کړ چې د دیني عالمانو سره ناست ؤ، هغوی ته یې غوږ نیولی ؤ او پوښتنې یې ترې کولې.

⁴⁷هر چا چې د عیسی خبرې اوریدلې نو د هغه پوهې او ځوابونو ته حیران پاتې کېدل.

⁴⁸کله چې مور او پلار یې هغه ولید نو حیران شول او مور یې ورته وویل: «ګوره زویه، مونږ سره دې ولې داسې وکړل؟ ما او پلار دې په ډېرې اندیښنې سره ته لټولې.»

⁴⁹هغه ورته وویل: «تاسو ولې زه لټولم؟ آیا په دې نه پوهېدلئ چې زه باید د خپل پلار په کور کې واوسم؟»

⁵⁰خو هغوی د هغه د خبرې په مقصد پوه نه شول.

⁵¹نو عیسی د هغوی سره بېرته ناصریې ته لاړ او د هغوی تابع ؤ. مور یې دا ټولې خبرې په خپل زړه کې ساتلې.

⁵²عیسی د قد او حکمت په لحاظ لویېده او د خدای او خلکو خوښیده.