Read Pashto (Nangahari) — د پښتو مقدس کتاب لوقا 20 Bible Online

لوقا 20 - Pashto (Nangahari) — د پښتو مقدس کتاب bible

لوقا 20

¹یوه ورځ کله چې عیسی د خدای په کور کې خلکو ته تعلیم ورکاوه او زېری یې ورته اعلانولو، مشران کاهنان او د شریعت عالمان د نورو یهودي مشرانو سره راغلل

²او هغه ته یې وویل: «ته څه حق لرې چې دا کارونه کوې؟ چا تاته دا اختیار درکړی دی؟»

³عیسی هغوی ته ځواب ورکړ: «زه هم ستاسو څخه یوه پوښتنه کوم، ما ته ووایئ چې

⁴د یحیی د تعمید غسل د خدای له خوا ؤ که د انسان له خوا؟»

⁵هغوی په خپل منځ کې بحث وکړ او ویې ویل: «که چېرې ووایو چې د خدای له خوا ؤ، نو هغه به ووایي چې بیا تاسو ولې په هغه باندې ایمان رانه وړ؟

⁶خو که چېرې ووایو چې د انسان له خوا ؤ، نو ټول خلک به مونږ سنګسار کړي، ځکه چې هغوی په دې عقیده دي چې یحیی پیغمبر ؤ.»

⁷نو ځواب یې ورکړ: «مونږ نه پوهېږو چې له کوم ځایه ؤ.»

⁸عیسی هغوی ته وویل: «زه هم تاسو ته نه وایم چې په کوم اختیار دا کارونه کوم.»

⁹بیا عیسی خلکو ته دا مثال راوړ: «یو سړي د انګورو باغ جوړ کړ او هغه یې باغوانانو ته په اجاره ورکړ او په خپله د اوږدې مودې دپاره یو بل وطن ته لاړ.

¹⁰کله چې د انګورو د راټولولو وخت راورسېد نو هغه خپل یو نوکر اجاره دارانو ته ورولېږه چې د باغ د حاصلاتو څخه د هغه برخه راوړي. خو باغوانانو هغه وواهه او تش لاس یې بېرته ولېږه.

¹¹بیا هغه بل نوکر ورولېږه، خو باغوانانو هغه هم وواهه، د هغه سپکاوی یې وکړ او تش لاس یې بېرته راولیږه.

¹²بیا یې دریم نوکر ورولېږه، خو هغه یې هم ټپي کړ او دباندې یې وغورځاوه.

¹³د باغ خاوند د خپل ځان سره وویل: «اوس څه وکړم؟ زه به خپل ګران زوی ورولېږم، کېدای شي چې د هغه لحاظ وکړي.»

¹⁴خو کله چې باغوانانو هغه ولید، نو یو بل ته یې سره وویل: «دا یې وارث دی. راځئ چې مړ یې کړو، نو میراث به یې زمونږ شي.»

¹⁵نو هغه یې د انګورو د باغ څخه دباندې وویست او ویې واژه.» عیسی پوښتنه وکړه: «اوس به د باغ خاوند د هغوی سره څه کوي؟

¹⁶هغه به راشي او دا باغوانان به ووژني او د انګورو باغ به نورو ته ورکړي.» کله چې خلکو دا واورېدل نو ویې ویل: «خدای دې نه کړي.»

¹⁷عیسی هغوی ته وکتل او پوښتنه یې وکړه: «نو بیا د زبور د کتاب د دې برخې معنی څه ده؟ «کومه تیږه چې ګلکارانو ایسته وغورځوله، هغه د ودانۍ د تهداب اصلي تیږه شوه.»

¹⁸هرڅوک چې په دې تیږه راولوېږي نو ټوټې ټوټې به شي او که هغه تیږه په چا باندې راولوېږي نو هغه به ذرې ذرې کړي.»

¹⁹د شریعت عالمانو او مشرانو کاهنانو غوښتل چې په هماغه ساعت عیسی ونیسي، ځکه چې هغوی پوه شول چې دا مثال یې د دوی په هکله وویلو، خو د خلکو څخه وېرېدل.

²⁰بیا هغوی د فرصت په لټه کې وو او ځینې جاسوسان یې چې خپل ځانونه یې صادقان ښودل ولېږل، تر څو عیسی په خپلو خبرو کې راونیسي او هغه د روم والي ته چې د قدرت او واک خاوند دی وسپاري.

²¹جاسوسانو عیسی ته وویل: «استاده! مونږ پوهېږو ته چې څه وایې او کوم تعلیم چې ورکوې هغه صحيح دی. ته د هیچا پلوي نه کوې بلکې په رښتینولۍ سره د خدای د لارې تعلیم ورکوې.

²²آیا مونږ ته روا ده چې امپراتور ته مالیه ورکړو که نه؟»

²³عیسی پوه شو چې هغوی ورسره چل کوي نو ورته ویې ویل:

²⁴«ما ته د سپینو زرو یوه سيکه وښایئ، په هغې باندې د چا تصویر او د چا نوم دی؟» هغوی ځواب ورکړ: «د امپراتور.»

²⁵عیسی وویل: «نو بیا څه چې د امپراتور دي هغه امپراتور ته ورکړئ او څه چې د خدای دي هغه خدای ته ورکړئ.»

²⁶هغوی ونه شو کولی چې عیسی د خلکو په مخکې په خپلو خبرو کې راونیسي او د هغه په ځواب حیران شول نو غلي پاتې شول.

²⁷بیا ځینې صدوقیان چې د مرګ څخه وروسته د بیا راژوندي کیدو څخه منکر وو، عیسی ته راغلل او د هغه څخه یې یو سوال وکړ:

²⁸«ای استاده! موسی په شریعت کې مونږ ته لیکلي دي چې که چېرې د چا ورور مړ شي او ښځه یې ترې پاتې شي او اولاد ونلري نو د دې سړي ورور باید د هغې کونډې سره واده وکړي ترڅو د هغه اولادونه پیدا شي او هغه یې د مړه ورور اولادونه وګڼل شي.

²⁹نو داسې وشول چې اووه ورونه وو، لومړني یې ښځه وکړه او بې اولاده مړ شو.

³⁰بیا دوهم یې هماغه ښځه وکړله، هغه هم بې اولاده مړ شو.

³¹بیا دریم هغه وکړله او په همدې ډول اووه واړو د هغې سره وادونه وکړل او هر یو مړ شو، خو د یو هم اولاد ونه شو،

³²او له ټولو وروسته هغه ښځه هم مړه شوه.

³³نو د قیامت په ورځ به هغه د کوم یو ښځه وي؟ ځکه چې اوو واړو د هغې سره وادونه کړي وو.»

³⁴عیسی ځواب ورکړ: «په دې دنیا کې نر او ښځې وادونه کوي،

³⁵خو کوم خلک چې د راتلونکې دنیا او د مرګ څخه د بېرته راژوندي کېدلو لایق ګڼل شوي دي، هغوی یو د بله سره وادونه نه کوي.

³⁶هغوی به نور نه مړه کیږي ځکه چې د فرښتو په شان به وي. هغوی د خدای اولادونه دي، ځکه چې د مړو څخه د تل دپاره راژوندي شوي دي.

³⁷او دا چې مړي بیا راژوندي کیږي، موسی دا په خپله د سوځېدونکي بوټي په پېښه کې وښودله او هلته یې څښتن د ابراهیم خدای، د اسحاق خدای او د یعقوب خدای وباله.

³⁸هغه د مړو نه بلکې د ژوندیو خدای دی، ځکه چې د هغه په نظر کې ټول ژوندي دي.»

³⁹د شریعت ځینو عالمانو وویل: «استاده! ډېر ښه ځواب دې ورکړ.»

⁴⁰له هغې وروسته نور چا جرات ونه کړ چې د هغه څخه بله پوښتنه وکړي.

⁴¹بیا عیسی د هغوی څخه پوښتنه وکړه: «هغوی څنګه ویلی شي چې مسیح د داود زوی دی؟

⁴²ځکه چې خپله داود د زبور په کتاب کې وایي: څښتن زما بادار ته وویل: «زما ښي لاس ته کښینه،

⁴³ترڅو ستا دښمنان ستا د پښو لاندې کړم.»

⁴⁴نو کله چې داود مسیح ته بادار وایي، بیا دا څنګه کېدای شي چې هغه د داود زوی وي؟»

⁴⁵په داسې حال کې چې ټولو خلکو د عیسی خبرو ته غوږ نیولی ؤ، خپلو شاګردانو ته یې وویل:

⁴⁶«د شریعت د عالمانو څخه چې دا خوښوي چې په اوږدو چپنو کې وګرځي او د خلکو څخه تمه لري چې په بازارونو کې ورته سلامونه واچوي او غواړي چې په کنیسا ګانو کې په مخکې ځایونو او په میلمستیاوو کې په ښو ځایونو کې کښېني، خپل ځانونه وساتئ.

⁴⁷هغوی د کونډو مالونه خوري او د ځان ښودنې دپاره اوږدې اوږدې دعاګانې کوي. د داسې خلکو سزا به د نورو نه سخته وي.»